Despues cu na maart Aruba a conoce su prome caso di COVID-19, Gobierno di Aruba a introduci un periodo di alivio den e proceso di bijstand y recientemente e periodo di alivio a keda prolonga cu tres luna mas y pues ta valido te cu 28 februari 2021.
Proceso di bijstand normal
E proceso di bijstand ta traha a base di ley y tur calculacion ta regla den ley. Tur persona cu haci un peticion pa un ayudo financiero temporal esta bijstand y cu por en berdad haya e ayudo temporal, ta hay’e a base di su situacion y con su situacion ta pas den e cuadro di ley di bijstand.
Cada decision sea pa duna, kita, subi of baha bijstand, ta stipula den un maneho cu e trahado publico mester mantene su mes na dje.
Periodo di alivio temporal
Na maart 2020 en conexion cu COVID-19, a keda introduci un periodo di alivio como meta pa acelera full e proceso di aplicacion pa bijstand. Pa por logra acelera e proceso di aplicacion pa bijstand, a duna algun excepcion temporal pa loke ta trata e parti di cumplimento cu Departamento di Progreso Laboral (DPL) y Medwork.
Cantidad di peticion nobo
Departamento di Asunto Social (DAS) su seccion di bijstand a ricibi te cu dia 5 di november 2020, 1662 peticion nobo pa bijstand. Diferente trahado di otro seccionnan interno a sigui un curso pa asina por asisti e seccion di bijstand cu ‘data-entry’ pa asina facilita e trabou di e consulent na momento di cuminsa procesa un peticion nobo.
Final
Por ultimo, DAS kier informa cu si un cliente no ta di acuerdo cu cualkier decision, e por entrega un keho na Departamento di Asunto Social cu un copia pa e Secretariado di e ‘Bezwaaradviescommissie’ LAR. E keho mester ta entrega dentro di seis (6) siman for di e fecha cu tin riba e carta di notificacion.
