Angel Bermudez: Un ABB lo cumbini Aruba y ta cla pa ranca sali; E proposicion lo simplifica cobranza di belasting na Aruba

E Algemene Bestedingsbelasting, ABB lo ta un quick win pa Aruba. Esey ta opinion di ex Minister di Finanzas di Aruba Angel Bermudez, kende tabata envolvi den e introduccion di e sistema di e belasting aki na islanan BES. Es mas, Bermudez tabata trahando pa introduci e ABB na Aruba ora cu Prome Minister, e tempo ey Mike Eman, a contradeci su propio Minister di Finanzas y a bisa cu Aruba lo no introduci e ABB.

Pero awor e ABB of e Value Added Tax, VAT cu ta similar na e BTW di Hulanda ta riba mesa y e Organo Caribense pa Reforma y Desaroyo COHO tin como meta reforma di nos structura di belasting unda ta move mas pa belasting indirecto. Y a uza VAT of e ABB como alternativa.

VAT vs ABB

COHO a menciona cu Aruba lo por introduci un modelo di VAT, estilo BTW manera Hulanda of un ABB.

E VAT ta un omzetbelasting. E empresario ta paga e VAT na Belasting y ta cobra esaki bek na clientenan. Ora e cadena di benta ta largo, e ta nifica un administracion mas complica, pasobra e gastonan cu e empresario haci pa compra di servicio y producto cu tin VAT of BTW riba dje, por kita despues for di belasting. “E ta un impuesto cu ta usa na Europa cu tin kolomnan largo y na Aruba tin kizas tres cadena. Pero cu ta trece hopi administracion basta intenso. Ta procesonan administrativo cu ta pone cu un sistema BTW of VAT ta mas sensitivo pa fraude. Hulanda a experiencia esaki,” Bermudez a splica.

Cobranza simpel

ABB di otro banda, ta mas simpel y ta un solo cobranza, cu a keda crea pa Hulanda pa islanan BES. Ta un cobranza tin na momento cu e producto ta drenta frontera. E ta un belasting cu mester reemplasa tarifa di importacion, y ta inclui e BAVP, BAZV y e BBO, cu nifica cu e ta un bay ta un belasting di dos cifra. “Ta un biaha ta cobra y e ora ta cla,” Angel Bermudez, kende ta un fiscalista a splica. “E sistema cu conoce na BES, cu ta cobr’e na frontera y riba productonan cu ta importa. E producto ta drenta den mercado, y no ta haya ningun agregacion di belasting mas. Locual por bin acerca ta e ABB riba e servicio, y tambe riba productonan cu ta produci na e pais mes. Por ehempel, cerbes cu ta produci na Aruba. Asina cu sak’e for di fabrica, ta cobra e ABB. Pero Bermudez ta splica cu e unico complehidad ta ora cu berdad mester inclui e ABB pa e gasto di servicio. Por ehempel si un bar ta bende un cerbes cu ta importa, si sigui e producto, na un bar por ehempel mester agrega e ABB riba e servicio cu e bartender ta duna, y e dosnan aki ta keda refleha den e prijs final. Pero eseynan ta cosnan cu for di inicio ta scoge, pa no haya e discusion den mercado. E ta un heffing relativamente simpel. “E ta simpel den ehecucion y simpel pa siguie den mercado.”

Otro ehempel por ta si ta hiba un auto pa un garashi pa servicio. E productonan cu ta usa, ya ta inclui e ABB. E mecanico tin su prijs pa ora. Y tin un ABB riba e prijs pa ora aki. E cliente ta paga e prijs di e producto mas e prijs pa ora di e trabou cu ta inclui otro ABB. “Riba su mes e no ta administracion complica, pasobra cada compania tin e administracion separa pa e productonan. Si e tarifa di ora di e mecanico ta 50 florin, y trabou ta tuma dos ora, ta nifica cu lo mester paga un ABB riba e 100 florin.”

Ley di Duana ta mas cu 100 aña

Manera a bisa caba, Angel Bermudez a cuminza traha riba un plan pa modernisa e sistema di belasting na Aruba, estilo islanan BES. Riba su mes ta necesario pasobra na e momentonan aki Duana di Aruba ta traha cu un ley di 1908, e Landsverordening Invoer, Uitvoer, Doorvoer cu no ta duna tur autoridad pa haci un trabou optimal na 2020. Mr. Jane Jansen kende tabata e lider di proyecto pa reforma di belasting na e Oficina di Coordinacion Asuntonan Fiscal a hinca henter e proyecto nobo den otro. Jansen kende awor ta Huez di Belasting, a traha tur e calculacionnan pa e tarifanan y kico por exclui di e belasting aki.

“Na Islanan BES a exclui producto di prome necesidad for di e ABB. Tampoco ta paga ABB riba awa y coriente. E ta depende con hancho cu ta haci e base, cu por determina e porcentahe pa haya un cierto cantidad di entrada di belasting. E tempo ey Jansen a yega na un cifra di 15 porciento pa Aruba.”

E complicacion di Aruba ta cu tin diferente tarifa di importacion. Pa auto so tin cuater a cinco. “Y netamente mester yega na un tarifa pa categorianan grandi. Pa ABB en general tambe mester tin un tarifa. No mester di un scala di tarifa. Bo ta simplifica e aumento di belasting cu na mesun momento ta bira mas comprendibel pa comunidad,” Bermudez a splica, agregando cu asina ey e ta bira mas aplicabel tambe.”

Fuera di tur esaki, e ta un ley hopi simpel compara cu un BTW of VAT.

Politica 2015

Angel Bermudez na 2015 a anuncia e ABB. Pero a bin resistencia for di su mesun hefe di Gabinete. E resistencia di un banda ta comprendibel pasobra locual a purba haci ta pa baha loonbelasting y inkomstenbelasting, y laga hende paga segun nan ta gasta. Pues, locual ta perde den e belasting directo, mester logra recupera den e esfera indirecto. Pa di dos, ta elimina e diferente tarifanan pa yega na un promedio. Bo ta perde aki, pero ta gana aya. Pero toch, e number cu ta sali afo ta dos. “Pa politica, e cifra ey, di dos number ta duna miedo. Pasobra, e ciudadano ta mira cu a kita e porcentahe di BBO, pero diripiente ta keda confronta cu un cifra mas halto.” Sinembargo, locual lo mester a haci ta splica e ciudadano cu e cifra di dos number ta representa tur e tarifanan hunto. Bermudez a bisa cu el a nota cu pa politiconan, ta e cifra ta representa un imagen cu nan no por a bende na comunidad. “E tabata djis cosmetica,” Bermudez a ilustra. “A par’e, a pesar cu nos tabata hopi leu.”

Dos ley nobo

Pa por introducie e ABB, mester di dos ley. Uno pa modernisa e forma cu Duana ta cobra, cu ta e instancia cu ta encarga pa E ley ta e ALDA cu Algemene Landsverordening Duana en Accijnzen. “E ta nifica inverti pa cambia di control visual pa uno administrativo. Duaneronan lo mester bay mas den e control administrativo. Ya no ta cuestion di bay controla den un container si tin producto cu ta cay bou e tarifa di cinco, 10 of 22 porciento. Ta un tarifa tin. E ta bay haci e trabou di e Duanero mas eficiente. “ Ademas tin tecnologianan pa scan container pa producto ilegal. Ta haci un cambio den mentalidad cu ta mas moderno y mas interesante pa e Duanero. Y ta elimina un ley cu ta mas di 100 aña bieu.” E ALDA ta skirbi caba y a bay pa Direccion Legal y di Asuntonan Huridico, DWJZ. E otro ley ta riba e ABB mes cu mr. Jansen a skirbi, pero Angel Bermudez no sa si a logra entrega esaki caba na DWJZ.

Concordancia

E ABB ademas tin un balor adicional, pasobra e ta crea un grado di concordancia den e islanan ABC. BES tin e ABB pa 10 aña caba y ta funcionando satisfactoriamente. Corsou tambe a cuminza traha riba su leynan pa ABB. E concepto di e ABB di Corsou ta na Raad van Advies caba. Angel Bermudez no ta kere si cu Corsou lo por introducie pa prome di Januari 2021, pasobra mester tuma tempo pa splica tur partido envolvi, incluso comercio, con pa cobra e ABB y con mester ahusta e sistema administrativo. “E ta bay keda introduci si na Corsou. Den cuadro di COHO y ya caba nan a cuminza cu e procedura pa legalis’e Pues, si logra haci’e na Aruba tambe, e ta nifica cu tur tres isla cu tin un ley semehante cu ta haci’e mas facil pa e Belastingkamer cu ta trata disputanan riba tereno di belasting.” Den concepto di Bermudez, ta simplifica e trabou di Corte, pero tambe ta yuda esnan cu ta duna e consehonan huridico fiscal mas oportunidad y posibilidad pa haci un miho trabou den e asina yama ‘rechtsvinding,’ esta buskeda legal. “E conseheronan tin un mercado mas amplio y por intercambia nan opinion legal entre e tres islanan. Asina aki, mi ta mira mas beneficio.”

Bon Dia Aruba lo publica mas di e combersacion cu ex Minister di Finanzas di Aruba y fiscalista mr. Angel Bermudez, riba implicacionnan di e posibel introduccion di e ABB, e facilidad administrativo, pero tambe e implicacion pa e Servicio di Impuesto di Aruba, SIAD.