Ya caba a cuminsa e preparacion pa e festival di Dande 2020 cu e aña aki, mescos cu otro eventonan masivo y popular, ta wordo realisa di forma virtual debi na e pandemia di Covid-19.

Asina a keda confirma durante un conferencia di prensa cu presencia di minister di Cultura, Xiomara Maduro, Sra. Ray-anne Hernandez di fundacion Promove Nos Cultura, Jessica Croes di fundacion Dande pa adulto y Sr. Aaron Arenas, kende ta esun encarga cu e campaña di e festival.

E mandatario a expresa su satisfaccion cu a pesar di e situacion di Covid, toch e festival di Dande 2020 lo wordo celebra. Ya cu mirando e situacion di e pandemia, varios evento patrocina y sosteni pa gobierno a wordo cancela, entre nan celebracion nacional di Himno y Bandera.

E mandatario ta haya cu tin hendenan cu ta puntra su mes dicon cosnan di Aruba no ta sigui, pero otro cosnan of ‘cultura aheno’ si a wordo celebra. E ta kere cu como Gobierno nan tin cu duna ehempel. P’esey nan no por laga organisa actividadnan cu tin aglomeracion. Nos mester reduci e casonan di Covid ya cu nos economia ta depende di turismo.

P’esey denter di e situacion cu nos ta pasando aden e creatividad a bin dilanti pa realisa e festival di Dande, pero virtualmente, e ta algo aceptabel. “Nos tur sa tambe cu Dande ta algo hopi importante den temporada di Fin di Aña. Un Dande sigur ta un bendicion pa nos tur,” e mandatario a bisa.

P’esey hunto cu e fundacionnan cu ta organisa Dande infantil, hubenil; y tambe pa adulto, y gradiciendo e patrocinio di Setar, nos por bay biba nos expresion cultural di Dande e aña aki. E biaha aki di un forma diferente haciendo uzo di tecnologia.

Ayera merdia mes, unabes cu e inscripcion ta disponibel via online, nan lo por tin un bista mas cla riba interes di e participantenan. Pero tambe ken tur a logra prepara, specialmente den e categoria infantil y hubenil, ya cu tin preparacion mas largo cu mester tuma luga prome cu e festival.

Hernandez a bisa cu ultimo añanan den caso di e festival di Dande tanto infantil como hubenil nan tin calculacion di 30 pa 40 participante. Nan expectativa ta cu nan por yega mantene e averahe aki. Esaki ta un cantidad cu ainda nan por acomoda den e situacion virtual cu e festival ta tuma luga na 2020.

Expectativa

Ya caba e inscripcion ta habri y segun Sra. Hernandez, kende ta di fundacion Promove Nos Cultura, nan expectativa ta uno positivo. E fundacion aki ta encarga cu e parti infantil y hubenil di e festival.

El a bisa cu ya caba nan ta bin hayando desde juli preguntanan di persona interesa riba si Festival di Dande ta bay tuma luga e aña aki. “Esey ta mustra cu tin interes pa e festival tuma luga,” el a declara.

Cada organisacion lo haya un invitacion pa bin cu nan participante den un estudio pa realisa e grabacion di cada un di e participantenan di ambos festival. Despues durante e dianan 27 y 28 di december lo tin e parti di presentacion live. El a splica cu e parti di cantantenan y bandanan no lo t’ey live, pero si lo tin un grupo chikito di e miembronan di hurado y tambe un MC pa haci e presentacion di cada un di e participante pregraba.

Participacion

E parti di infantil y hubenil lo ta parti den cuater diferente categoria manera semper, y den cada categoria e maximo di tempo ta 4 minuut pa cada Dande. Pero tin excepcion tambe, specialmente pa e mucha chikito di 4 pa 6 aña. Igualmente mester tin solamente un representante di nan pa ta presente durante e grabacion.

Tambe e presidente di e hurado lo ta presente pa evalua cada participacion, caminda e por duna un chens na un participante cu kisas a haci un fout den su presentacion. Maximo un biaha e participante por haya pa drecha su presentacion.

Pa e parti di Dande pa adulto nan tabatin deliberacion cu Crisis Team y DVG, caminda nan a yega na e acuerdo cu cada banda por participa cu solamente cu 12 integrante ariba e escenario di grabacion.

Tambe Jessica Croes a bisa cu den nan caso ta 3 cantante of participante adulto di Dande pa agrupacion. Pues nan no ta permiti asina tanto cantante pa grupo, manera añanan anterior. E categorianan ta propio composicion y tipico, tanto pa dama como pa cabayero y cada Dande ta consisti di 4 minuut te cuater minuut y mey.

Den varios ocasion di parti di e comision encarga cu e festival aki nan a yega di informa cu e evento aki ta sigui, pero cumpliendo nan mes cu tur exigencia y protocol di DVG. Na inicio nan no tabata sa con pa haci’e, pero nan a dicidi di haci’e miho virtual cu accesibilidad pa tur hende pa medio di diferente forma di transmision.

Accesibilidad

A pesar cu e biaha aki no lo tin presencia masivo di publico. Sinembargo Sra. Hernandez ta mira cu un di e beneficionan di haci grabacion, prome y despues di e presentacion, tin di haci cu no ta bay tin momento di break hopi largo entre bandanan.

Esaki ta haci cu e biaha aki nos ta bay wak un festival posiblemente mas cortico cu loke nos ta custumbra cune den tempo. Pero si den cantidad di participante e comision di e festival di Dande aki ta sperando e mesun cantidad di añanan anterior.

Intencion ta cu tur radio emisora y tur canal di television lo haya señal pa retransmiti e festival. Nan ta pensando cu esaki lo por tuma luga den forma di cadena di un transmision nacional, caminda tur media specialmente electronico of digital por sinti parti di e festival aki pa yuda promove y sostene e tradicion aki cu ta parti di nos cultura.

Hernandez a bisa cu e señal di transmision ta gratuitamente disponibel na cada un di e medionan di comunicacion cu kier tin acceso na e festival. Tampoco nan no mester di permiso di adelanta pa retransmiti e festival aki. Di e forma aki comision aki kier sigura cu tur hende di nos comunidad di tur edad ya sea na Aruba of pafo di Aruba por ehempel na Hulanda lo por sigui e festival aki via social media. “Intencion ta pa e festival ta accesibel pa un y tur na Aruba y na mundo henter,” el a declara.