Incidente y malcontento relaciona cu Bureau Examen Rijbewijs (BER)

Ayera mainta, medionan di comunicacion a wordo convoca pa un conferencia di prensa pa trece dilanti algun incidentenan y malcontento cu ta existi relaciona cu Bureau Examen Rijbewijs (BER).

Thomas Ruiz, kende ta fungi como secretario di Vereniging Rijscholen Aruba, expresa cu tin malcontento pa loke ta trata continuacion di politica pa laga un studiante Arubiano residencia den exterior pasa su examen sin dificultad den tempo di vakantie.

El splica cu e situacion a cuminsa na momento cu un rijschool a cuminsa meld cu esey no ta wordo acepta mas. Di esaki el a afirma cu te ainda ningun minister a drecha esaki riba papel. E consecuencia ta cu e clientenan, aunke nan a bay curso, na momento cu nan tabata cla pa bay examen nan a wordo notifica cu nan mester warda te proximo aviso.

Ruiz a señala cu minister encarga di esaki, Andin Bikker ta trahando pa por regla e situacion. Pero asina mes el a pidi pa informa pueblo ki dia esaki ta keda cla y si nan por haci examen prome cu nan bay bek den exterior. Di mesun manera a puntra si e personanan aki ta haya preferencia tambe pa haya un fecha, pa motibo cu esey no a wordo regla y nan ta hinca den problema cu nan no por pasa examen.

Un otro topico cu Ruiz a trece dilanti ta cu den ultimo dos dia aki, nan ta hayando keho y reclamo di esnan cu ta presenta pa rijbewijs. Den dianan aki el a haya mas cu ocho reclamo tocante e sistema tradicional di examen.

Ruiz a menciona cu den ley ta regarda cu e examen aki “mester wordo haci mondeling of schriftelijk, den meerkeuze vragen y no open vragen.” Alabes el a indica cu nan a haya un e-mail cu varios cambio riba e politica aki, pero den e-mail no ta skirbi ken a tuma e decision ni a base di ki ley. “Pasobra nos ta traha cu ley, esaki ta inaceptabel,” Ruiz a afirma. El a anuncia cu nan a pone minister Bikker na altura di esaki, pero te ainda nan no a haya contesta

Di e grupo di persona cu mester haci examen tradicional, Ruiz a conta cu ta trata di personanan cu no por traha cu computer, personanan cu tin IQ un tiki abao, cu tin autismo, por ehemplo, y cu no por haci examen cu sistema digital di 50 pregunta den 30 minuut.

El a afirma cu den esaki nan semper ta haya cooperacion di BER, pero “nos a ripara atrobe cu nan ta purba, pero te hasta nos a scucha cu nan ta descurasha pa haciele of nan ta sinti nan mes discrimina, cu ta pio ainda. Pero nan tambe tin derecho” Ruiz a bisa.

Pa motibo aki el a pidi Bikker pa lo mas pronto posibel drecha e situacion aki na BER cu un reglamento ministerial cu minister mes a introduci pa september 2018, riba cual ta para duidelijk con e mester wordo haci.

Tocante e reclamonan cu nan ta haya pa loke ta trata fecha di examen mes, Ruiz a menciona cu nan ta hayando hopi informacion y reclamo tocante “faboritismo pa loke ta fecha” y kico esaki ta nifica. “Con ta posibel cu un hende ta wardando dos of tres luna pa un fecha, y un otro persona cu a manda un e-mail siman pasa si ta haya fecha?” El indica cu esaki ta algo ‘hopi straño,’ y cu nan mes ta bay purba di investiga kico ta pasando y pa cua motibo.

Igualmente el a declara cu nan tin un retraso basta grandi pa fecha di examen, cu personanan mes riba rednan social ta manifesta cu nan ta manda e-mail pero no ta haya contesta. “Esaki ta algo importante. Nan tin cu haya fecha lo mas pronto posibel, pasobra algun hende ta depende di esaki pa haya of pa mantene un trabao”, Ruiz a señala.

Di su parti, Roberto Solognier, tesorero di Vereniging Rijscholen Aruba, a trece dilanti cu loke nan ta pidi ta pa privatisa e departamento di rijbewijs, pa esaki no sigui keda bao maneho di cuerpo di polis, pa motibo cu e mes a sigura cu no tin suficiente polis riba caya.

“Minister mes mester kita e peso aki for di su lomba y bisa pa nan cuminsa bay privatisa”, Solognier a manifesta.

Pero di mesun manera, el a informa cu minister ta haciendo un bon movecion pa e inscripcion y maneho di rijbewijs lo bay directamente pa Censo y cu esey a cuminsa cana. “Pero di un manera hopi slow”.

El a bisa cu nan tin un comision, pero cuerpo di polis no tabata presenta den e reunionnan. “Nan no tin interes den e parti ey.” El a sigura cu minister Bikker tabata duna den reunionnan aki 100% di dje, pero “bo ta sinti cu KPA no kier toca e tema aki y mi no ta compronde dicon”, Solognier a señala.

Pa loke ta trata otro aña, Ruiz a tuma e palabra y a expresa cu nan a caba di manda un carta pa minister Bikker, minister Lampe, algun parlamentario, di cual tres di nan cu ta ex-polis – como Alan Howell, Robert Candelaria y Rocco Tjon – pero nan ta wardando pa nan contesta pa asina haya un cambio.

Pa finalisa, Ruiz a menciona cu nan a manda e-mail pa alto comisario di cuerpo di polis Vanessa Tjon-Kock pa sinta na mesa, pero nan no a haya oido.