ORANJESTAD – Departamento di Combatimento di Sangura no a neglisha e menasa di otro virus transmiti pa e mesun sangura cu ta transmiti Dengue, Zika y Chikungunya y cu nos tin na Aruba. Ta trata di e virus Mayaro y otro virusnan cu a haci su aparicion den varios pais di nos region.
Hefe di GKMB Clayton Croes ta bisa cu te ainda no tin niun caso di Mayaro registra oficialmente na Aruba. Pero no solamente ta Mayaro sino e virus Usutu cu ta hopi presente den nos region specialmente na Brasil. Otro virus cu GKMB tin bista riba dje ta e Oropouche presente na Peru. P’esey nan a lanta un comision bou Vector Action Team cu ta traha a base di e instruccion cu PAHO y Organisacion Mundial di Salud ta duna. E ta e manera di traha mas innovativo y proactivo, sr. Croes ta splica. Tur e ingredientenan pa combati e diferente vector ta poni den un plataforma pa monitor nan y plania kico ta wordo haci tambe. Nan ta keda actualisa di tur loke ta pasando mundialmente, regional y nacional. Pero tambe kico nan por pa evita cu e tipo di malesa aki por yega na nos isla. Ya cu hopi di e vectornan of sanguranan aki ta bin den fase di webo.
Sr. Croes ta indica cu malesanan tin hopi, specialmente den e region mas di selva, particularmente na Amazonia, unda tin diferente tipo di encefalitis cu ta wordo transmiti pa sangura sin conta cu keintura gel. Malaria Pues virus tin hopi y esaki ta haci cu GKMB y demas instancia ta comparti informacion riba tur e topiconan aki. E idea di facilita e tipo di informacion aki ta pa tur instancia concerni keda den comunicacion di tur loke ta pasando tanto local como regional.
Un biaha pa luna GKMB ta sinta cu diferente departamento entre nan Servicio Meteorologico, Departamento di Epidemiologia, Departamento di Higiena, Seccion di Promocion di Salud, Serlimar y Landslaboratorium, pa atende algun datonan, entre nan casonan sospechoso entre nan di Mayaro, pero tambe nan ta pendiente cu casonan di malaria cu ta wordo raporta den nos region. Te aworaki nos no tin e vector of e sangura cu ta pica y pasa e Malaria. “Nunca a keda confirma riba nos isla y nunca a keda registra tampoco.” Nan ta haya e asunto aki interesante y nan ta pendiente di su desaroyo, ya cu tin cantidad di caso di Malaria cu ta tumando luga den e pais bisiña di Venezuela, y den nos cercania tin otro islanan cu tin caso di Malaria. E echo cu nos no tin e sangura transmisor di Malaria ta haci pa ehempel, si ta bin un hende afo cu malaria y un sangura ta pik’e, no mester tin miedo cu e sangura aki ta bay pas’e pa otro hende , ya cu no tin e sangura cu por pike.
Di e banda ey nos comunidad lo por ta trankil. Ya cu e sangura Aedes aegypti ta diferente na e sangura Anopheles cu ta esun di e malaria. “Esey ta un dolor di cabes menos”, segun sr. Croes. Sinembargo pa Mayaro si mester tene mas control, ya cu nos tin e vector of sangura cu ta transmiti e virus, manera e Chikungunya, Zika y nan no ta descarta e posibilidad cu e virus Mayaro lo haci su introduccion na Aruba .
