E proyeccion di e recuperacion economico di Aruba no ta alentador. Hasta despues di Covid, e recuperacion lo confronta un estorbo pa motibo di debe nacional enorme, desempleo y demanda mas abao pa turismo.
E pronostico ta tene cuenta cu 15 a 30 porciento di caida di economia y un quota di debe cu ta mas halto cu locual ta considera sostenibel pa paisnan den Caribe. E prestacionnan economico tin un caracter structural, banda di motibonan incidental y externo manera Venezuela, refinerianan etc. Sin reforma pues, economia di Aruba den e miho condicion lo bolbe despues di e crisis riba e paso slow di decada di 2010. Sinembargo, segun economistanan cu a hinca e landspakket pa Aruba den otro, e probabilidad ta grandi cu mester spera cu e crecemento economico lo ta mas slow debi na e retonan nobo.
No por warda mas
Como tal, tin necesidad pa traha un economia y sociedad mas duradero y resiliente, y pa logra esey, mester di reformanan economico, financiero, social y institucional. E situacion den cua Aruba ta den no ta duna espacio pa mas posponemento. E gastonan di Gobierno mester baha drasticamente pa asina baha e presion di belasting pa stimula inversion y consumo na Aruba. Mercado laboral tambe mester cambia pa duna un grupo grandi y creciente di asina yama ‘outsiders’ oportunidad. Un mercado laboral flexibel como tal ta contribui na mas cupo di trabao y un mercado di capital cu ta funciona bon lo percura cu inversionnan rendabel por yega mas facil na e fondonan necesario. Y un clima di inversion atractivo ta atrae inversionistanan, ta contribui na desaroyo di creacion di trabao y ta fortifica e posicion di competencia di Aruba.
Bista riba situacion actual
Pero pa por ehecuta reforma mester di tin un bista cla y skerpi di e situacion actual, pa haya un bon imagen di e problematica, e direccionnan di solucion, e coherencia y e acercamento. Ministerio di Asuntonan Interior y di Reino di Hulanda y e departamentonan Hulandes concerni lo investiga y analisa e aspectonan aki hunto cu Aruba. E revision aki lo mester resulta den un agenda di ehecucion integral, bao guia di e COHO. E agenda di ehecucion lo duna direccion pa palabracionnan di resultado cu ta mara na e siguiente sosten di likides. E agenda di ehecucion ta inclui programanan, proyectonan y pasonan cu ta necesario, tur cu obhetivonan cla y plaso di tempo cu tin pa logra, un descripcion di e capacidad necesario y experticio, ademas di e medionan financiero necesario. Aki lo tuma cuenta cu e coherencia entre medidanan, e factibilidad, e contexto local, e secuencia, efectonan secundario y e medidanan necesario. Mester tin un acercamento gradual y fasenan cla, den relacion cu e agenda di ehecucion y cu ta pas cu e posibilidad di realisacion na Aruba. COHO tin e tarea pa sostene e reformanan palabra den e landspakket, por ehempel pa medio di pone na disposicion e experticio y capacidad.
Fondonan
COHO, banda di e tarea di sosten y supervision ora di ehecuta e programanan di reforma, lo por inicia, promove y ehecuta proyectonan independientemente, otorga subsidio na ciudadano y companianan, incluso companianan di Gobierno, como tambe participa den e accionnan di companianan. Inversionnan asina tin como meta pa ehecuta, reforsa y agrega na e reformanan y medidanan, ademas di contribui na e obhetivonan global di e landspakket. Asina por pensa riba inversion den educacion di trahadonan pa yuda promove e migracion di laboral di sectornan cu poco oportunidad pa sectornan cu ta brinda mas perspectiva; inversion den desaroyo di tecnologia di data, fortificacion institucional of e desaroyo di instrumentonan cu tin como meta pa proteha of hasta stimula e actividadnan economico, y di e forma aki, contribui na un impulso economico
Den principio, e reformanan aki lo mester ta cubri pa presupuesto di Aruba. E punto di salida di e inversionann aki ta cu despues di tempo nan lo paga pa nan mes, pasobra nan ta contribui na hisa e capacidad di ganashi, como tambe reduccion di gastonan publico. COHO, basa riba un ‘business case’ adecuado, lo sostene e proyectonan di reforma denter su propio presupuesto. Lo mira cada medida a base di locual kier y si por logra. Si ta bay uza fondonan di COHO, e decision politico lo sosode na Hulanda. E por sosode na forma di un prestamo, regalo, co-financiamento of cu ta pone un contribucion di un of mas departamento.
Banda di tur menciona, lo keda sosten di likides pa necesidadnan specifico manera loonsubsidie, e NOW-regeling (cu ta conta pa dunadonan di trabao na Hulanda y lo conta pa Aruba tambe) y gastonan pa servicio regular, por ehempel continuacion di e asina yama funcionnan vital. Pero Aruba mester mustra cu e sosten ta necesario y mester cumpli cu e condicionnan palabra.
COHO lo percura pa e sosten di likides a base di conseho di Caft y e decision di Conseho di Minister di Reino.
E posibilidad di prestamo pa inversion di capital tambe ta keda habri pa medio di e ruta regular, esta via Caft. Pero, e lo ta indeseabel di Gobierno lo haci prestamonan cu ta bay contra e reformanan y inversionnan palabra den e landspakket. Pa e motibo ey, COHO lo haya autoridad pa evalua e prestamonan pa nan merito.
Acercamento integral
E landspakket ta forma un programa coherente. Aunke cu mester tin prioridad y tin diferencia den e totalidad di efecto di reforma, e kiebro cu e tendencianan di pasado lo ta unicamente posibel cu un acercamento integral. Reformanan di mercado laboral por ehempel mester keda ehecuta hunto cu reforma di seguro social, mehoracion di enseñansa, atende cu e problematica di pobresa y atende cu e economia informal
Como tal, e landspakket pa Aruba ta consisti di reformanan riba e terenonan di: gobierno y Finanzas; reforma economico; cuido y enseñansa; y fortificacion di e estado di derecho.
Un organisacion di trabao ta bay ta encarga cu e tareanan di e Organisacion Caribense pa Reforma y Desaroyo ( Caribische Orgaan Hervorming en Ontwikkeling), COHO.
