Ayera atardi a tuma luga un incidente na Boca Catalina, na unda un boto a pasa riba dos persona di e cual un di nan a haya mas herida cu otro y tabata den un estado delicado.
Mesora personanan a dirigi esunnan cu a keda herida pa banda di Fisherman Huts, pa asina nan por logra bay di biaha hospital y nan por haya asistencia medico.
Esaki no ta e prome biaha cu incidentenan di e sorto aki ta tuma luga. Manera por a mira tin algun beachnan cu no tin boei, na unda botonan y jetski tin e libertad di pasa y core rond cerca hende cu por causa un peliger. Un di e beachnan na unda esaki ta tuma luga ta Fisherman Huts cu hopi doño ta baha nan boto y jetski pa bay lama y traha cu nan.
Ta importante pa trece dilanti conscientisacion di cierto capitan di botonan y esun cu ta core cu jetski pa tuma precaucion ora ta den lama y tin personanan cu ta landando. Igualmente, tambe autoridadnan concerniente por tuma accion den e caso cu a sucede ayera, y pone boei den cierto luganan pa adverti cu botonan y jetski no mag di drenta na e luga ey, pa asina evita cu accidentenan di e sorto aki lo sigui tuma luga.
Boeinan tin como principal obhetivo sirbi como medida di señalisacion pa botonan y tambe pa esunnan cu ta landa, pa motibo cu ta sirbi pa conoce ki parti di e area ta dividi y sirbi pa botonan y pa personanan cu ta gusta bay lama y landa.
