Parlamentario Richard Arends di AVP: “No tin diferencia fundamental entre loke a firma awor y loke tabat’ey na juli”

Manera a keda conoci ayera, Hulanda y Aruba a yega na un acuerdo pa dos rijkswet (ley di Reino), cu ta significa sosten di liquidez bao condicionnan fuerte pa Aruba di Hulanda.

Pa esaki, Bon Dia Aruba primeramente kier a tuma contacto cu sr. Mike Eman, lider di partido AVP pero despues a notifica redaccion cu na e momentonan aki parlamentario Richard Arends ta esun encarga di e topico aki, pa asina por haya sa kico ta nan pensamento tocante e firma di acuerdo cu a tuma lugar y kico nan partido por a haci si dado caso nan tabata esnan cu tabata na e lugar di tuma e decision ey.

Arends a sigura cu e acuerdo aki tabata cla caba for di juli pasa, e diferencianan entre loke a firma ayera y loke tabat’ey na juli caba no ta nada fundamental: “nos no sa eigenlijk si esey ta e motibo pakico nos tabatin obhecion contra e luz berde cu gobierno a haya”.

Tambe el a splica cu nan a sinti cu no tabatin un esfuerzo pa por convence Hulanda cu e base legal cu a usa no ta esun corecto; a bay negocia di biaha riba e contenido sin para keto un rato riba e forma y caminda con e ta bay hinca den otro.

Pa loke ta trata e carta di secretario di Estado Knops, na unda el a informa e acuerdo pa yega na Landpakket tambe tin otro banda; Knops ta bisa cu Aruba mester entrega dos presupuesto complementario e aña aki y cu un deficit maximo di 800 miyon florin, “esey ta algo cu tin nos atencion aworaki”, pa motibo cu algun siman atras a pasa un presupuesto supletorio cu un deficit di 1.3 biyon florin y mester bay corta den cinco siman 500 miyon florin pa yega na e cantidad di 800 miyon florin.

Tambe Arends a menciona cu ya caba secretario di estado Knops ta bisa cu 40 miyon florin cu Aruba a presupuesta pa inversion no por wordo usa pa esey, sino pa inversionnan cu ta forma parti di e pakete di reforma, “e poder constitucional di parlamento y gobierno ta wordo poni bao presion pa ahusta un presupuesto den un termino cortico y pa re-aloca fondonan cu a wordo aloca”, el a afirma.

Di esaki el a sigura cu mayoria di parlamento a dicidi cu ta bay aloca esaki pa cierto sectornan cu mester draai riba esaki: “nos a adverti esaki y p’esey mes nos ta lamenta cu el a sucede asina,” Arends a señala.

Mey ora despues cu a firma e acuerdo, segun Arends, e prome carta a sali pa parlamento pa haci algun ahuste cu dos siman pasa nan a aproba den e presupuesto complemetario.

Den caso cu partido AVP tabata esun den gobierno aworaki, Arends a trece dilanti cu nan for di luna di maart caba nan ta kere cu e asunto aki mester a wordo atendi na un manera nacional. El a sigura cu sr. Mike Eman, lider di partido, a extende un man na varios ocasion cuminsando na luna di maart caba “y esey sin sa mes kico lo tabata e condicionnan di Hulanda, just pa abarca e retonan cu e crisis aki lo a impone riba nos pais y cu bo no por hacie cu un coalicion fragil, sino di un manera amplio y nacional,” Arends a enfatisa.

Di e invitacion aki di sr Eman, Arends a manifesta, cu el a haya contesta back den un serie di insulto y hasta a tilda nan di ‘Universidad di Corupcion’, “pero dificilmente bo por logra algo nacional cu e actitud ey di parti di Gobierno”.

El a declara cu nan ta sigur cu na momento cu tin un amplio sosten di parlamento y cu tur ta riba e mesun linea “bo lo tabata hopi mas fuerte para na mesa di negociacion”.

Pa loke ta trata e biahe di prome minister, sin cu a anuncia esey, Arends a bisa cu e no ta haya ilogico cu el a bay Hulanda pero, e por a bisa si un par di dia prome cu e lo ta bayendo. Contrario na loke a sucede cu Corsou, prome minister di Aruba a biaha Hulanda pa firma e acuerdo y loke nan ta ripara di esaki ta e mensahe cu e accion aki ta manda.

Despues cu a firma e acuerdo, hopi comentario a bin dilanti encuanto ‘autonomia’ riba rednan social manera Facebook; pa cu esaki Arends a bisa cu e ta un palabra amplio cu no ta trata poder politico so, esey hopi biaha ta tilda parlamentario of politiconan di esey, segun Arends, pero nan como fraccion no ta defende poder politico: “no ta bay pa esey, e ta bay pa e podernan constitucional”.

Aworaki ta bay tin un entidad cu ta estableci bao di ley Hulandes ta bay goberni e maneho financiero, economico, social, y enseñansa. Den nan concepto, “bo no por aplica constitucion Hulandes ni estado Hulandes sin mas na Aruba, pasobra Aruba tin su mesun recurso huridico pa establece e mesun tipo di identidad bao di leynan local y dunando Hulanda e garantia cu e tin mester”. Algo cu nan (AVP) a ofrece como alternativa pero segun Arends e no sa si gobierno a haci esfuerzo pa convence Hulanda di esaki.

Pa loke ta trata e recuperacion di Aruba despues di impacto di Covid-19, Arends a manifesta cu esey ta depende hopi di turismo pero lo no recupera di un dia pa otro. Cantidad di turista ta aumentando pero den cifra mas abao di loke a premira y esencial ta bay ta pa bin cu un maneho economico cu di berdad por yuda empresa mediano y chikito, comerciante, doño di negoshi, etc. pa mira con por yuda e empresanan aki sobrevivi e dos of tres aña cu e situacion aki ta bay dura.

Parlamentario Richard Arends di AVP:
“No tin diferencia fundamental entre loke a firma awor y loke tabat’ey na juli”

Manera a keda conoci ayera, Hulanda y Aruba a yega na un acuerdo pa dos rijkswet (ley di Reino), cu ta significa sosten di liquidez bao condicionnan fuerte pa Aruba di Hulanda.

Pa esaki, Bon Dia Aruba primeramente kier a tuma contacto cu sr. Mike Eman, lider di partido AVP pero despues a notifica redaccion cu na e momentonan aki parlamentario Richard Arends ta esun encarga di e topico aki, pa asina por haya sa kico ta nan pensamento tocante e firma di acuerdo cu a tuma lugar y kico nan partido por a haci si dado caso nan tabata esnan cu tabata na e lugar di tuma e decision ey.

Arends a sigura cu e acuerdo aki tabata cla caba for di juli pasa, e diferencianan entre loke a firma ayera y loke tabat’ey na juli caba no ta nada fundamental: “nos no sa eigenlijk si esey ta e motibo pakico nos tabatin obhecion contra e luz berde cu gobierno a haya”.

Tambe el a splica cu nan a sinti cu no tabatin un esfuerzo pa por convence Hulanda cu e base legal cu a usa no ta esun corecto; a bay negocia di biaha riba e contenido sin para keto un rato riba e forma y caminda con e ta bay hinca den otro.

Pa loke ta trata e carta di secretario di Estado Knops, na unda el a informa e acuerdo pa yega na Landpakket tambe tin otro banda; Knops ta bisa cu Aruba mester entrega dos presupuesto complementario e aña aki y cu un deficit maximo di 800 miyon florin, “esey ta algo cu tin nos atencion aworaki”, pa motibo cu algun siman atras a pasa un presupuesto supletorio cu un deficit di 1.3 biyon florin y mester bay corta den cinco siman 500 miyon florin pa yega na e cantidad di 800 miyon florin.

Tambe Arends a menciona cu ya caba secretario di estado Knops ta bisa cu 40 miyon florin cu Aruba a presupuesta pa inversion no por wordo usa pa esey, sino pa inversionnan cu ta forma parti di e pakete di reforma, “e poder constitucional di parlamento y gobierno ta wordo poni bao presion pa ahusta un presupuesto den un termino cortico y pa re-aloca fondonan cu a wordo aloca”, el a afirma.

Di esaki el a sigura cu mayoria di parlamento a dicidi cu ta bay aloca esaki pa cierto sectornan cu mester draai riba esaki: “nos a adverti esaki y p’esey mes nos ta lamenta cu el a sucede asina,” Arends a señala.

Mey ora despues cu a firma e acuerdo, segun Arends, e prome carta a sali pa parlamento pa haci algun ahuste cu dos siman pasa nan a aproba den e presupuesto complemetario.

Den caso cu partido AVP tabata esun den gobierno aworaki, Arends a trece dilanti cu nan for di luna di maart caba nan ta kere cu e asunto aki mester a wordo atendi na un manera nacional. El a sigura cu sr. Mike Eman, lider di partido, a extende un man na varios ocasion cuminsando na luna di maart caba “y esey sin sa mes kico lo tabata e condicionnan di Hulanda, just pa abarca e retonan cu e crisis aki lo a impone riba nos pais y cu bo no por hacie cu un coalicion fragil, sino di un manera amplio y nacional,” Arends a enfatisa.

Di e invitacion aki di sr Eman, Arends a manifesta, cu el a haya contesta back den un serie di insulto y hasta a tilda nan di ‘Universidad di Corupcion’, “pero dificilmente bo por logra algo nacional cu e actitud ey di parti di Gobierno”.

El a declara cu nan ta sigur cu na momento cu tin un amplio sosten di parlamento y cu tur ta riba e mesun linea “bo lo tabata hopi mas fuerte para na mesa di negociacion”.

Pa loke ta trata e biahe di prome minister, sin cu a anuncia esey, Arends a bisa cu e no ta haya ilogico cu el a bay Hulanda pero, e por a bisa si un par di dia prome cu e lo ta bayendo. Contrario na loke a sucede cu Corsou, prome minister di Aruba a biaha Hulanda pa firma e acuerdo y loke nan ta ripara di esaki ta e mensahe cu e accion aki ta manda.

Despues cu a firma e acuerdo, hopi comentario a bin dilanti encuanto ‘autonomia’ riba rednan social manera Facebook; pa cu esaki Arends a bisa cu e ta un palabra amplio cu no ta trata poder politico so, esey hopi biaha ta tilda parlamentario of politiconan di esey, segun Arends, pero nan como fraccion no ta defende poder politico: “no ta bay pa esey, e ta bay pa e podernan constitucional”.

Aworaki ta bay tin un entidad cu ta estableci bao di ley Hulandes ta bay goberni e maneho financiero, economico, social, y enseñansa. Den nan concepto, “bo no por aplica constitucion Hulandes ni estado Hulandes sin mas na Aruba, pasobra Aruba tin su mesun recurso huridico pa establece e mesun tipo di identidad bao di leynan local y dunando Hulanda e garantia cu e tin mester”. Algo cu nan (AVP) a ofrece como alternativa pero segun Arends e no sa si gobierno a haci esfuerzo pa convence Hulanda di esaki.

Pa loke ta trata e recuperacion di Aruba despues di impacto di Covid-19, Arends a manifesta cu esey ta depende hopi di turismo pero lo no recupera di un dia pa otro. Cantidad di turista ta aumentando pero den cifra mas abao di loke a premira y esencial ta bay ta pa bin cu un maneho economico cu di berdad por yuda empresa mediano y chikito, comerciante, doño di negoshi, etc. pa mira con por yuda e empresanan aki sobrevivi e dos of tres aña cu e situacion aki ta bay dura.