Actualmente, Jason Momoa ta un di e streanan di accion mas grandi na mundo, pero prome cu su ascenso meteorico na fama, e actor tabatin problema financiero.
E actor, di 41 aña di edad, a wordo contrata como Khal Drogo den e hit di HBO, ‘Game of Thrones’. Sinembargo, Drogo a muri den e serie na 2011. Momoa a admiti cu e tabata den problemanan serio despues cu a perde e rol aki.
“Mi kiermen, nos tabata pasa hamber despues di ‘Game of Thromes’”, Momoa a bisa revista InStyle. “Mi no por a haya trabao. E ta un reto grandi ora bo tin baby y bo ta completamente den debe.” E actor ta comparti yiu muhe Lola y yiu homber Nakoa-Wolf cu actriz Lisa Bonet.
Carera di Momoa a cambia curso drasticamente na momento cu el a wordo contrata como Aquaman den ‘Justice League’ na 2016, y despues a lidera su propio pelicula na 2018 como e superheroe di DC den ‘Aquaman’.
Awo su agenda ta yen te cu 2024 cu rolnan den ‘See’ di Apple TV+, e adaptacion di ‘Dune’ di Denis Villeneuve, un secuela di ‘Aquaman’.
Momoa a bisa cu ora el a mira e trailer di ‘Dune’ pa prome biaha, e no por a kere con leu el a yega den su carera. “E tabata, ‘Josh Brolin, Jason Momoa, Javier Bardem’, y ami tabata manera, ‘Mi Dios. Mi no por kere mi nomber tabata cu e nombernan ey’. Mi ta sinti cu ami ainda ta un mucha, freaking out”, el a bisa.
El a agrega con e no por spera pa audiencia mira e pelicula pasobra hopi di e temanan ta paralelo na asuntonan awendia. “No ta djis alien contra alien – e ta tocante conflictonan entre tribunan humano”, Momoa a bisa. “Y codicia. Realmente e ta conecta na e momento aki.”
