Sindicato di hospital (ABV) ayera mainta a organisa un conferencia di prensa pa informa riba ultimo desaroyonan den hospital. Decisionnan cu director nobo ta tumando cu cual nan no ta di acuerdo.

Gina Maduro, presidente di sindicato, a expresa cu hospital a haya un directiva nobo dia 21 di september. Den esaki tambe a nombra un director medico nobo, hunto cu un director financiero y nan a wordo forma e Raad van Bestuur. Aki nan a ripara cu desde algun dianan, cambionan ta tumando luga.

Di mesun manera, Maduro a splica cu door di e cambionan ey tin hopi inkietud rond di e trahadonan, “hasta miedo trahadonan tin.” Y mirando cu e situacion aki ta bin sucediendo desde un corto tempo, esaki tin di haci cu director medico, ken tambe ta presidente di Raad van Toezicht. Segun Maduro a sigura “e mes ta controla su mes.” Ademas cu tambe e ta representa nan den e vierlandenoverleg, loke ta nifica cu e tin tres funcion.

Maduro a expresa cu pa nan esaki caba ta un forma di duna hende un poder asina grandi, den sentido cu e tin tres funcion clave den organisacion aki y na unda nan a tuma nota cu cambionan a cuminsa tuma luga. “Cu tur respet p’e, el a cana riba e departamentonan y e ta kere cu e mester conoce su organisacion, algo cu ta bon,” pero cu tambe a haci otro cambio cu tabata den cluster management cu tabatin nan departamento y nan mester a bin sinta hunto cune y cu tur e management.

Maduro a afirma cu nan a wordo saca for di nan departamento y e desbentaha ta cu awor nan ta mas leu for di nan departamento. Por ehemplo, recurso humano, cu ta e curason di e organisacion, Maduro a menciona cu te hefe di comunicacion tin cu sinta cerca dje y cu esaki ta cambionan cu normalmente no tabata pasa, cu por tin su parti bon of malo.

“Locual cu tin tras di cambionan si nos no ta sostene” el a bisa, pa motibo cu nan a laga sa cu e clusternan di management existente tin cu bay solicita di nobo. “Con bo ta bay solicita pa bo funcion di nobo?” Maduro a expresa.

For di siman pasa, a keda publica riba website di hospital cu tin dos vacatura pa cluster management, locual Maduro a insisti ta trata di reorganisacion y “ora bo ta haci un reorganisacion, bo mester tin un plan”.

Nan como trahadonan di hospital a pasa den e mesun situacion aki na aña 2008, segun loke Maduro a anuncia. Na 2007 tambe un otro persona a presenta un plan pa un reorganisacion na unda 54 hende a haya carta cu nan mester bay cas, a hinca tur e management y saca nan for di CAO y a bin cu mas hefe, locual tabata un fracaso total y sindicato hunto cu trahadonan a haya nan rason.

Na e momentonan aki, Maduro a señala cu nan ta wak cu e mesun historia ta bay ripiti atrobe, pero di un full otro forma, cu nan no ta haya ni habri ni transparente, “pasobra bo no por cuminsa cu un reorganisacion sin tin un plan”.

Alabes, el a splica cu e persona aki ta kibrando tur ley na unda nan tin un CAO vigente cu tin dos partido den e organisacion aki y cu tin condicionnan laboral fundamental. Por ehemplo, el a trece dilanti cu tur aña dunado di trabou mester presenta plannan, vacaturanan. Pero ABV a tuma nota cu riba e website di hospital “tin un tsunami di vacatura, esaki ta hustifica? E mester splica nos pakico e mester di tanto hende asina”, Maduro a enfatisa.

Igualmente, el a expresa cu e mester comunica cu sindicato y cu p’esey mes nan ta ripara cu tin movecionnan straño sin comunica cu e sindicato. “Ta un falta di respet pa sindicato y pa tur trahado. E no por haci esey cu ta contra di CAO cu ta vigente y cu ta palabracionnan cu tin añanan”.

Tambe el a conta di un caso di un trahado di hospital cu a bira malo y a keda sin bay traha mas di 200 dia pa motibo di salud. Ora e trahado a yega bek na su trabou, e director a bisa cu su funcion no ta existi mas y cu otro hende por haci su trabao sin mester di dje mas. Esaki despues cu e persona aki tin 19 aña trahando na hospital, segun loke Maduro a sigura.

Di esaki, el a afirma cu e persona a haya un oferta pa bay na un otro departamento, pero no cu su mesun funcion. Tambe a bisa cu e persona aki a pidi ayudo na sindicato pa motibo cu e ta conoce su derechonan. “Awe ta e persona aki, mañan ta otro y asina e casonan aki ta bay sigui. Esey no por, nos tin ley”.

Nan como sindicato di hospital ABV sa cu mester bin cambionan pa mehora hospital. Pero el a expresa cu manera con e cambionan ta tumando luga no ta e forma corecto, y cu hospital den ultimo tempo a pasa pa situacionnan hopi pisa. Entre esakinan ta destaca hacking, candela, instabilidad den Raad van Bestuur, pandemia, entre otro. A pesar di tur esey hospital no a para, el a sigui funciona. Pa e motibo aki ya tur trahado ta cansa mentalmente, trahadonan cu a duna di nan parti pa nan trabou, y awor e director ta trece esaki, “cu no ta ni e momento ni e forma, nos tin cu haci’e hunto”, el a finalisa.