– Te aworaki apenas 48% di e automobilista a cumpli cu e pago di impuesto di vehiculo di motor. Kiermen cu un 62% di nan no a cumpli cabalmente cu e impuesto aki. Esaki ta un cifra record of historico segun departamento di Impuesto, ya cu pa tur e añanan anterior esaki ta e cifra mas halto di incumplimento di pago di e impuesto di vehiculo di motor.
Nos ta na december y ainda 46 mil automobilista no a cumpli cu e pago di impuesto aki. “E ta un cantidad enormemente halto”, vocero di departamento di Impuesto sra. Meverly Romano ta bisa.
Mayoria di nan 41.825 ta di e plachinan di auto categoria A; y di e cifra aki 13.545 ainda no a paga e ultimo kwartaal.
Den pasado nan a yega di cera december cu 3% te cu 7% di automobilistanan cu no a cumpli. Na 2015 el a yega te cu un 30%, cu ta esun mas halto. Te aworaki departamento di Impuesto ta confronta cu un 62% di nos automobilista no a cumpli na 2016. Den e cifra aki ta poni esun di 2015 tambe, ya cu logicamente esun cu no a paga 2015 prome, no por cumpli cu 2016 despues.
“E ta bastante placa cu no ta drentando aworaki manera mester ta”, segun sra. Romano.
Concepto di ley
Departamento di Impuesto kier conta cu un instrumento legal pa contraresta e situacion aki cu practicamente ta saliendo for di man, entre otro pa falta di control stricto.
Aworaki tin un concepto di ley nobo cu a drenta na Parlamento pero ainda no a wordo trata. Tampoco nan no tin un fecha pa su tratamento prome cu fin di aña. E concepto di ley aki kier bin cu cierto cambio entre nan si e cliente na momento di paga un kwartaal e deadline a pasa, e lo ricibi un carta di departamento di Impuesto y ta haya un boet acerca.
Si acaso e persona no ta cumpli, nan por manda un deurwaarder pe. Na e momento aki e departamento aki no tin e instrumento di ley pa ehecuta e tipo di sancion aki. E control di autonan ta den man completamente di cuerpo di polis. “Si acaso parlamento ta aproba e concepto di ley cu tin actualmente, lo bin un cambio hopi drastico den añanan cu ta bin”, e vocero ta splica.
Tur aña nan ta haya clientenan cu ta argumenta como excuus cu su auto pa algun of otro motibo tabata para. Of e persona kisas tabata den exterior, pero departamento di Impuesto no ta bay haci excepcion. “Nan no por purba nos cu e auto no tabata riba caminda.”
Otro punto di atencion tin di haber cu e clientenan cu tin dos auto. Si un di nan no ta na ordo cu su pago di impuesto y e di dos si ta paga, ora cu e cliente kier paga riba e di dos auto, e pago aki no ta wordo acepta tanten cu e no paga e otro auto completamente.
Factornan di incumplimento
Un factor pa garantisa e pago di e impuesto aki; y pa realisa un bon control, tin di haber cu e sistema di sticker cu a keda introduci e aña aki. E sistema aki ta haci mas dificil pa polis realisa un control pa stricto. Antes ora cu ta wordo cambia e plachi tur aña, e automobilista ta sinti su mes obliga pa paga, ya cu for di leu polis por ripara si e tin plachi bieu of nobo.
Actualmente debi cu nos ta uzando e mesun color di plachi di 2015, dificilmente por wak di biaha si e persona a paga su belasting of no. E unico indicacion cu tin aworaki ta sticker. Segun vocero di departamento di Impuesto tin otro factornan cu ta hungando un rol tambe, entre nan cu e automobilista kisas no por a cumpli cu su pago di seguro. E seguro mester ta na ordo como exigencia pa paga e belasting aki. Otro factor eventualmente lo tin un dificultad financiero cu e cliente ta pasando aden.
Reunion cu polis
Sra. Romano ta bisa cu durante ultimo siman departamento di Impuesto a trata di sostene un reunion cu cuerpo di Polis, pero te ainda nan no a reuni. “Mi ta comprende cu cuerpo tambe ta hopi ocupa.” Nan ta spera cu ora cu nan ta sinta hunto nan lo por haya mas claridad riba e parti di control riba vehiculonan cu ta coriendo sin nan impuesto paga. Tampoco nan no tin dato si polis ta repartiendo hopi boet pa esun cu no ta coriendo cu nan papelnan na ordo.
E ta haya cu esun cu no a cumpli ainda ta cometiendo un falta di respet pa nos leynan; y tambe contra esnan cu si ta percura pa cumpli cu nan belasting y pa tene tur nan papelnan na ordo. Ya cu posiblemente un gran cantidad di e 46.058 automobilista cu no a paga nan impuesto di vehiculo di motor pa 2016, tambe kisas no tin nan seguro na ordo.
