“Nos tabatin ocho dia cu nos a habri despues di un largo ciere pa via di e pandemia, y dialuna y diamars ultimo nos tabata testigo di con awa di lama a hiba mi negoshi. Nos no por haci nada, ta un impotencia hopi grandi”.
Asina Edwin Neira a recorda con poco a poco lama, agita pa bientonan, a destrui un cas di palo na unda tabata funciona su local di watersports e cual el a dedica mas di 20 aña pe na San Andres.
“Bientonan a calma y akinan autoridadnan ta evaluando e dañonan. Pero ta hopi dificil pa nos sa ki ora nos lo recupera, el a sigura. E situacion pa Covid tabata hopi mal pa nos y awor esaki”, e comerciante a relata.
Pa hopi isleño, e horcan aki tabata uno sorpresa y tabata esun mas pio cu nan a sufri den ultimo añanan, fin di siman ultimo pronosticonan tabata afirma cu na e momento ey e depresion tropical y tormenta lo bira horcan di categoria 1 ora e lo crusa e awanan di Nort di archipielago Colombiano, sinembargo, e fenomeno a duna un buelta inespera via west y a aumenta e potencia di su bientonan.
E bientonan aki a yega te 75 kilometer pa ora y a genera e caida di centenares di palo, e collapse di un dozijn di cas y un aumento fuerte di marea a provoca inundacionnan, den cual e awa a yega hopi halto na algun zona di e isla.
E perdidanan material, segun informacion di Gobierno local, a alcansa tres mil miyon peso. No obstante, ekiponan electrico di casnan y mueblenan cu hopi isleño a perde ta wordo conta apart.
E balans final tabata di 53 famia damnifica, 45 cas cu a wordo afecta, igual cu 8 negoshi comercial. Diabierna ultimo inundacionnan a wordo supera, palonan cu a cay a wordo retira y servicionan di awa cu coriente y telecomunicacion tabata operando normalmente.
Gobernacion di San Andres, cu su gobernador (e) Alen Jay Stephens, y Unidad di Gestion di Risico (UNGRD) a declara calamidad publico na departamento pa por utilisa tur e recurso disponibel pa recuperacion di infrastructura y brinda ayudo pa comunidad.
