Luis Chong di GKMB: Criadero di sangura haya na tur cas cu ta bishita

Durante un conferencia di prensa di Departamento di Salud Publico y seccion GKMB un par di dia pasa a trece dilanti e problematica, peligernan y solucion pa situacion cu ta surgiendo di sangura y tambe e malesanan transmiti pa sangura.

Jurette Croes, PR di DVG, a expresa cu esaki ta un topico cu tur aña mester wordo treci dilanti pa motibo cu den temporada di yobida, sanguranan ta aumenta. Esey ta trece cune malesanan di sangura, specialmente considerando e cantidad di awa cu Aruba ta ricibiendo cu yobidanan ta diferente e aña aki.

Pa e motibo aki, GKMB ta pone extra atencion riba e topico, mirando cu e situacion por causa un brote di malesanan cu ta wordo transmiti pa sangura, manera a sucede den pasado, y ta hopi importante pa por ataca e problema aki den comunidad.

Igualmente, el a informa cu seccion di GKMB, cu ta conta cu un personal di 25 persona, no por bishita tur cas na Aruba. P’esey nan ta haci un yamado pa comunidad pone nan man na obra y tuma accion pa minimalisa e riesgonan di brotenan di malesa transmiti pa sangura.

Luis Chong, director di GKMB, a splica cu e situacion cu tin aworaki pa loke ta trata sangura rond di Aruba ta un tiki diferente, pa via cu awa a cay hopi mas compara cu otro biaha y esey ta pone cu tur e awa cu tin rond di cas no ta seca lihe; pa loke ta hayando hopi mas criadero di sangura.

Chong a sigura cu nan ta hayando hopi yamada di molester di sangura. Nan a registra un aumento drastico y nan ta atendiendo cu esey debidamente, segun loke Chong a afirma. Tambe Chong a destaca cu hende ta pensa cu sangura ta bin pa motibo di bisiña of rooinan cu tin banda di cas. Pero ora GKMB ta bin controla na cas, nan ta ripara cu na e cas mes tin criadero di sangura.

Ademas, Chong a declara cu maske Aruba tin aproximadamente 10 aña cu no a pasa den un brote grandi of un epidemia di dengue, pero na e momentonan aki e situacion por ta posibel si un persona ta drenta cu dengue na Aruba y por causa un brote of un epidemia, cu ta peligroso y por mata hende.

“Esaki ta un situacion di peliger. Nos no tin indicacion ainda cu tin brote di dengue na Aruba, pero e por pasa si un persona contagia ta drenta Aruba”, Chong a sigura.

Chong a papia tambe tocante un situacion di sanguranan cu na e momentonan aki tin banda di hotelnan. El a bisa cu hopi yamada ta drenta, pero esakinan ta un sangura diferente compara cu esun di dengue. Nan ta sangura di mangrove cu ta crece den e area aki y door di yobidanan nan a haya diferente plasnan rond di e mangrove cu normalmente no tin criadero, pero aworaki ta creando un molester pa e area.

Di esaki, el a señala cu nan ta trahando conhuntamente cu AHATA na unda nan ta fumiga e area aki pa baha e cantidad di adulto, e sanguranan aki no ta un peliger, pero si ta un molester y nan ta atendiendo e caso aki.

Aparte di esey, el a declara cu GKMB den e dianan aki ta ehecutando tareanan pa preveni y elimina e criaderonan den areanan publico, pero esey ta cayendo atras door cu nan tin cu atende tur dia cu problemanan na cas di hende. Pero cu esaki ta un problema cu comunidad mes por yuda, cada persona tuma 5 minuut di nan tempo pa cana rond di cas y elimina loke por ta un criadero pa sangura. Mirando e temporada di yobida, esaki ta keda un trabou continuo.

“Cada biaha cu yobida ta cay, ban hacie tres biaha of cada tres dia pa cana rond di bo cas y wak si tin awa para riba un caminda, pasobra tur bishita cu nos ta haci na cas nos ta haya criaderonan di sangura y den futuro nan por haya un boet”, Chong a declara.

Igualmente, el a expresa cu ora nan ta haya yamada di comunidad pa molester di sangura, nan ta bay controla, y si tin terenonan cu ta bandona, nan tin e permiso pa drenta sea un cas of propiedad pa controla tur esey. Tambe el a bisa cu door di e situacion actual, nan no ta yega ni na esey, pasobra nan ta ricibi hopi yamada pa haci control na cas y nan tin cu atende esey.

“Nos ta mira cu algun hende ta dedica pa agricultura na nan cas, pero nan mester tene cuenta cu e awa di yobida den hanchi, baki, freezernan bieu, bari di sushi. Tur esakinan ta un posibel criadero pa sangura”, Chong a señala.

Ta un eror cu hende por pensa cu sangura por bin door di matanan of yerbe. Chong a menciona cu esaki ta un idea cu ta core rond, pero no ta berdad. “Sangura mester di awa pa nan por broei, nan ta bay pa e yerbenan pa nan por sconde pasobra eynan ta scur”, el a bisa.

Chong a recorda cu algun añanan pasa turismo a cay hopi door di epidemia di Zika cu tabatin na Aruba. Den e caso aki, el a expresa cu DVG hunto cu GKMB y ministernan por a yega asina leu di dicidi di manera mas fuerte pa conscientisa hende. Pa motibo cu e informacion ta afo caba tur caminda y medionan di comunicacion, pero comunidad tin cu dicidi di cuminsa actua cerca nan mes contra criaderonan di sangura.

Pa finalisa, fumigacion por ta un solucion, pero no ta permanente pa via cu sanguranan ta biba den awa. Na momento cu GKMB ta fumiga, nan ta mata esunnan cu ta bula rond y no ta algo temporal, pero e problema mester wordo soluciona for di criaderonan mes.