Autoridadnan siman pasa a bolbe detene Richi Danies, kende pa simannan consecutivo a protesta hunto cu un cantidad di otro persona riba Plaza Henny Eman. Vocero di OM a bisa cu a detene Danies e biaha aki pa 60 dia, pa instigacion y menasa, agregando cu “ta acusacionnan grave cu ta hustifica su gevangenhouding”.

Pero pa e colectivo di activista Aruban Warriors (AW), e accionnan di tuma represalia di parti di polis ta un violacion di e derecho fundamental di protesta. “No ta solamente cu Richi, ora nan a bay aresta e muchanan aki, […] nan a aresta nan manera cu si ta cacho nan ta aresta”.

Asina Tacamahaca, kende ta e lider principal di e grupo activista, a bisa riba e pagina di Facebook “Aruba Human Rights for All”. Pa Tacamahaca y Aruban Warriors, e mero echo cu a kita e banner unda tabata para Aruba Pro Pedofiel, ya caba ta un violacion di e derecho di protesta y derecho di expresion. “Nos mag di skirbi kico cu nos kier riba nos banner, kisas nos mester skirbi gobierno pro pedofiel, pasobra ami tambe ta parti di Aruba. Pero esey ta nan manera, esey tambe bo mester respeta”, Tacamahaca a comenta.

Aruban Warriors kier pa autoridadnan laga Danies liber, despues cu hues comisario a tuma decision di want’e den detencion pa 60 dia, cual ta un autoridad delinea den articulo 100 di codigo di enhuiciamento criminal (Wetboek van Strafvordering).

‘No ta cera 2 polis cu a mata, pero si ta cera mi pa menciona Papa su nomber’

Den un video cu a circula diahuebs ultimo graba pa su persona, Danies ta aparece unda e ta indica cu e no a wordo cera pa haci menasa contra prome minister Evelyn Wever-Croes, pasobra hues ya a bis’e cu e no tin niun carta di Wever-Croes unda ta haci denuncia contra su persona. Segun Danies ta splica, ta Wever-Croes hunto cu su mama a zorg pa saca Danies, su yiunan y su casa for di nan cas, haciendo esaki a base di un denuncia — cu segun Danies ta falso —entrega pa su mesun mama.

“Aworaki nan tin mi cera pa stop di protesta y pa stop di menciona nomber di Papa, nan kiermen cu mi tin e gobierno terorisa, yen cos, cu mi ta menasa pa comunidad, cu esaki cu esey, pasobra mi ta bringando pa Hulanda penetra Aruba. Kiermen cu mi ta cera por nada, mi kier pa e rechter-commisaris sa cu bo ta cera mi por nada, pero bo no ta cera e dos polisnan cu a mata y bo no ta cera Otmar Oduber cu ta horta placa di pueblo.”

Den mesun rosea Danies ta haci un yamado pa por sinta cu PG nobo Bote ter Stege. Aruban Warriors riba diasabra ora a protesta pa libera Danies, a canta feliz cumpleaños pa Danies na mes momento. Tacamahaca a bisa cu no lo strañ’e si en berdad a cer’e pasobra e ta menasa prome minister, pasobra, asina Tacamahaca a splica, un integrante di Aruban Warriors a skirbi ‘Are you the woman who is destroying Aruba? We are coming for you’ hunto cu un potret di prome minister. Despues cu el a publica esaki, e integrante a haya un yamada di FBI.

“Pero el a hasta bira amigo cu FBI. FBI a bis’e, cu loke el a haci ta den cuadro di su derecho di expresion. No ta manera cu el a bis’e den un manera pa insinua cu e ta bay mat’e, of algo asina. Despues cu el a sali di FBI el a bolbe pone e mensahe.”

‘Pa cambia beneficio si ta cambia ley den 6 minuut’

Tacamahaca a agrega, despues cu e persona entrevistando e a puntra si no tin libertad di expresion, cu “ami kier sa cu ultimamente, bo sa, AVP a haci hopi daño, mi no ta mee eens, mi no ta papia bon pa AVP, pero ora mi wak bao MEP, semper tin persecucion politico, tin persecucion, pues pa mi, Richi no ta un preso normal, Richi ta segun mi un preso politico. E mester wordo trata manera un preso politico e ora ey tambe. Pasobra si bo bay expresa bo derecho fundamental di protesta, anto nan ta cera bo, esey kiermen bo ta un preso politico. Pasobra e politico no kier pa e ta eynan sinta. Y despues su hendenan cu a sigui’e.”

Tacamahaca a bisa cu e tipo di actuacionnan aki ta hustifica entrega un keho internacional p’e. “Ami ta warda pa si polis bin y mester haci algo.” Aunke Tacamahaca no ta na altura di e detayenan preciso di kico ta e base pa detene, el a bisa cu cera un persona pasobra “el a bisa loke e ta pensa, di ‘kinan, cu e ta haya cu e luga aki ta pro pedofiel pasobra nan no kier cambia ley. Mi kiermen, nan a cambia nan beneficio den 6 minuut, pero si bo kier cambia e ley aki nan no kier cambi’e. Nan ta bin cu yen pito y flauta pakico nan no kier hacie. Ami ta sostene [Danies] su lucha.”

Nota di redaccion: Potretnan cortesia di pagina di Facebook “Aruba Human Rights for All”.