Segun resumen di Departamento di Salubridad Publico, DVG tocante e desaroyo di Covid-19 na nos isla, ayera a registra un total di 14 caso nobo, treciendo e total di casonan activo na 172. Esaki ta mustra un aumento compara cu e cantidad di casonan activo un siman prome, y tambe ta mustra un tendencia di aumento durante e periodo stipula.

Segun e resumen di ayera, tabatin 15 persona cu a recupera di e malesa. Di e 14 caso di Covid-19 cu a registra ayera, 2 no tabata residente, pa loke e tasa di positividad entre residente ta 16 porciento. E total di casonan activo te cu ayera a keda na 172. DVG a realisa un total di 229 test, di cual a haci 77 entre residentenan na laboratorio di hospital. E total di morto pa e malesa na Aruba ta 39.

Di su banda, hospital a informa cu tin un total di dies persona interna. Di esakinan, un ta den Unidad di Cuido Intensivo y nuebe ta isola riba piso general.

Ayera, dia 6 di november, Aruba tabatin 172 caso activo, compara cu un siman atras, diabierna dia 30 di october, cu tabatin 158 caso activo, pues un aumento di 14 caso activo den un siman. Pero mirando e tendencia den ultimo dos siman, por a nota cu poco poco ta mirando un aumento den casonan activo.

Celebracion di Halloween
 Riba diasabra dia 31 di october ultimo, DVG riba su pagina di Facebook a publica un aviso recordando hende pa mantene cautela y asina evita contagio. “Sea alerto y consciente di cada un di bo actividadnan ora cu nos tur ta consciente, hunto den union nos ta trahando na mantene e casonan abou”, DVG a manifesta. Ademas, a recorda tur hende tocante e medidanan cu ainda ta na vigor pa preveni transmision di coronavirus: “Sigui mantene distancia, sigui aplica higiena, sigui uza tapa boca, sigui test pa covid si bo tin sintoma, sigui mantene isolacion of cuarentena ora bo wordo indica, sigui cumpli y sigui cuida Aruba ta conta cu bo!”

Riba e mesun post, DVG a informa cu tabatin extra control di Polis y Taskforce, mirando cu Halloween a bira un celebracion popular riba nos isla, cu ta haci cu tin hopi fiesta y bebemento. “Polis y Taskforce lo ta realisando extra control pa asina segura cu tur negoshi ta cumpli cu reglanan stipula pa preveni un situacionnan cu por conduci na un brote of mas plamento di e virus di Covid-19 na Aruba”, DVG a informa. E advertencia a bin pasobra mirando e cantidad di caso positivo y activo,segun DVG, por mira “cu tin hendenan cu ta positivo ta cana rond y ta pega otronan sin cu nan sa of nan sa y no ta interesa pa cuida nan mes of otronan.”

Manera Bon Dia Aruba a reporta, sinembargo por a nota cu durante anochi di Halloween polis a parti 45 boet y a cera algun luga.

Pero e cantidad di caso activo na Aruba tabata aumentando poco poco prome cu Halloween sin mucho comentario. Por ehemplo, den e siman 26 di october te cu 1 di november, e averahe di caso activo tabata 154. Pero ya pa e siman di 2 di november te cu ayera dia 6, e averahe di caso activo tabata 165.2. Maske ta un aumento chikito den casonan activo, toch por mira cu ta un tendencia cu ta avansando, lentamente.

Sinembargo, mirando e advertencianan di DVG pa cu celebracion di Halloween, e cantidad di boet cu a parti pa no cumpli cu medidanan di prevencion, y teniendo cuenta cu e 2 siman di incubacion di e virus, tin un posibilidad cu proximo siman e cantidad di caso activo lo sigui aumenta.