Durante un tayer virtual entre Aruba, Greenland y Mayotte a tuma nota di participacion di dos entrepreneur di Aruba, esta Cornerstone Economics y Happyponics.
E tayer virtual tabatin como titulo ‘Social Economy, an opportunity to transform the Europe of the Sea’ (‘Economia Social, un oportunidad pa transforma e Europa di Lama’. Den esaki, e dos entrepreneur di Aruba a comparti nan experiencia cu entrepreneurship social durante e crisis, segun minister di Economia, Finanzas y Cultura, Xiomara Maduro, a comparti den un post riba su pagina di Facebook, hunto cu e dos potretnan, cu e mensahe “Den bida no ta tur cos ta placa, ta solidario cu otro durante un crisis ta inpagabel.”
Happyponics, segun nan pagina di Facebook, ta un compania comercial di hydroponics Arubano, incorpora na 2014. Despues di un fase experimental durante cual e compania a proba di cosecha lechuga den un forma sostenibel, cumpliendo cu demanda di calidad y continuidad, e compania a expande substancialmente na 2017 pa provee un produccion mas grandi pa cumpli cu demanda pa alimentonan produci localmente. Happyponics ademas ta colabora cu Fundacion Eliezer, cu ta encarga cu rehabilitacion pa adiccion di droga y alcohol, asina ehecutando entrepreneurship social.
Cornerstone Economics ta un compania di consulting cu enfasis riba impacto social. Segun su pagina di Facebook, Cornerstone Economics ta un compania di consulting enfoca riba duna asistencia na manager, doño di negoshi, entrepreneur, compania, organisacionnan y comunidad en general pa tuma decisionnan empodera door di considera informacion externo y interno cuidadosamente pa yuda e proceso di toma di decision. Nan ta enfoca riba area di finanzas, economia, negoshi y analisis di investigacion.
