Edjean Semeleer ta un persona hopi conoci den comunidad cu dianan pasa a lansa un cantica nobo. Den e temporada aki di pandemia y cu personanan ta sinti hopi stress, el a sigura cu “musica ta extremadamente importante”.

Den un entrevista cu Bon Dia Aruba el a anuncia su tema ‘For di un distancia’ cu e produccion di Nigel Hoek hunto cu Felix ‘Chucho’ su tata. Ademas el a expresa cu e ta bay haci dos concierto graba desde su cas sin invitadonan dia 24 di december y 31 di december pa finalisa e aña y cu hende lo por wak e dos dianan ey riba television of rednan social.

Di e cantica, el a afirma cu el a acerca Chucho, cu ta compositor, na unda el a sigura e cu e sa cu e por skirbi algo cu e ta desea. “Normalmente mi ta saca cosnan hopi alegre, locual mi ta kere cu hende tin mester. Pero honestamente mi ta desea algo mas sentimental cu por haci e persona hopi emocional”, Semeleer a splica.

Di mesun manera, el a informa cu e lo kier refleha un tiki di kico a pasa e aña aki y kico a siña di dje, pero toch pa no perde speransa cu cosnan lo mehora. Di esaki el a bisa cu Chucho a crea e fantasia di e cantica ‘For di un distancia’. El a expresa cu el a keda hopi contento cu e resultado pa motibo cu segun el a bisa, Hoek no a perde e esencia tradicional di instrumentonan y elementonan moderno.

“E cancion aki, compara cu mi otro exitonan, ta mas trankilo den ritmo pero profundo den contenido”, Semeleer a afirma.

El a conta cu e cantica tin palabranan hopi simpel, pero door di e situacion cu pandemia di Covid-19 a trece, hopi hende despues di estreno na radio a manda mensahenan p’e y nan a bira hopi emocional. No pa via cu e cancion ta tristo, sino loke e ta nifica. El a trece emocion cu e kier logra pa e cantica crea speransa, pa motiva y keda positivo aunke nos ta pasando den un situacion dificil.

Temporada di Pasco ta cada dia mas cerca, pa loke a puntra Semeleer si e tin pensa di haci algun colaboracion cu Grupo di Betico, cu ta un grupo musical hopi scucha na Aruba den temporada aki. Semeleer a sigura cu no. Dos aña pasa el a graba cu Grupo di Betico pa celebracion di nan 50 aña, pero su plan di e aña aki ta pa enfoca desde e principio riba conciertonan.

“Mi ta kere hopi si den uni forsa, den e unidad simbolico ey, tambe pa bo ta bini hunto pa alegra, motiva y inspira. Pero e aña aki esey no tabata un plan, aunke mi ta habri pa ideanan y colabora”, Semeleer a comenta.

Di mesun manera, el a señala cu su deseo pa hopi tempo tabata pa lansa un album cu no ta mara na un temporada. Tabata un exito y un fout di dje semper, manera el a menciona, cu exito tabata e temporada na Aruba como dia di mama, dia di himno y bandera, fin di aña, den e cual e semper tabata presente. Y pafo di e celebracionnan aki e tin dos of tres exito romantico, pero den su añanan como adulto, e no a lansa un album musical cu por wordo scucha cualkier dia.

El a conta cu despues di experiencia cu Nigel, “mi a gusta e combinacion entre a mi como vocalista, Chucho como compositor y Nigel como productor musical.” Di esaki, el a afirma cu e ta kere cu el a haya e combinacion cu e tabata desea pa traha cune pa un eventual album y cu pa e prome seis luna di 2021 el a pone como meta pa lansa un album musical.

“Door cu mi ta gusta e genero romantico, e tin un idea caba di ki direccion mi kier bay” Semeleer a comenta.

Den un di su plannan, el a relata cu e tin un par di aña caba purbando di trece un programa di television na unda e ta presenta artistanan, yama ‘Ed Show’. Den e programa aki e kier trece ideanan na nivel di loke tabata wordo traha na otro paisnan, como Venezuela, unda por ehemplo tabatin orkestanan sinfonico y combina cu modernismo di Nigel. Esaki nunca a wordo concretisa door di varios motibo, pero te ainda e lo kier hacie na 2021.

E manera cu Semeleer por comunica algo miho ta cu musica. E ta kere cu e Pasco aki, cu tur loke a tuma luga durante e aña, ta un temporada di hopi reflexion. E situacionnan ta diferente, algun hende a perde nan sernan keri door di e malesa Covid-19, otro a perde nan trabou, stabilidad, pero e ta considera nan como momentonan den bida cu ta forsa e persona pa dicidi con ta bay pasa door di dje y con ta bay supera como ser humano. “Pasobra ta dificil pa bisa un hende cu a perde su ser keri cu ‘get over it’, esey no ta posibel. E unico cos cu eigenlijk bo no tin cu perde ta e constancia y e gana di sigui purba”, el a finalisa.