Recientemente e bishita cu representantenan diplomatico di Consulado di Merca na Corsou a realisa na Aruba, a trece hopi speransa cerca gobierno, pero tambe cerca Aruba Tourism Authority (ATA).
Minister di Turismo y Salubridad Publico, Dangui Oduber a yega di declara na Bon Dia Aruba cu siman pasa nan tabatin un reunion cu Consul Mericano staciona na Corsou, locual e mandatario a cualifica como un “bon combersacion.”
Segun minister Oduber, mirando e esfuersonan cu nos ta bin haciendo pa contraresta e virus di Covid, Consul Mericano ta dispuesto pa yuda intermedia cu CDC pa gobierno di Aruba. E diplomatico su intermediacion ta importante pa yuda convence CDC pa kita Aruba for di e lista di pais di halto riesgo di Covid cu ta hopi importante pa e high season.
Minister di Turismo su opinion ta, Aruba no mester wordo considera dor di CDC como uno di halto riesgo, ya cu nos ta den un nivel “hopi aceptabel.”
ATA
Di su banda, directora di Aruba Tourism Authority (ATA), Ronella Tjin Asjoe-Croes a considera e anuncio di minister di Turismo sumamente importante, y ATA a yega di tene reunion cu e mandatario relaciona na e asunto aki.
El a bisa cu nan ta trahando hunto cu ministerio di Turismo pa asina manda un documentacion pa e consulado. E intencion tras di esaki ta pa nan por trece dilanti e hecho cu Aruba basicamente a baha e cantidad di caso drasticamente. Pero tambe kico nan por haci na nivel diplomatico pa baha nos nivel di riesgo como Aruba.
Nos ta den e nivel di riesgo 4, y naturalmente -segun directora di ATA- nos kier yega na un otro categoria. “Esey lo stimula ainda mas e cantidad di bishitantenan cu nos lo por spera,” segun Tjin Asjoe-Croes a declara na Bon Dia Aruba.
