Tin decision na Merca… Y nos tin un rumbo…?

Hopi di nos tabata claba na television diamars anochi, manera hopi miyones na tur parti di mundo. Durante dia ayera (diarazon) nos por a sigui e acontecimentonan na e pais ey, pasobra eleccion no a termina e nochi anterior.

Cu posiblemente por lo menos un par di caso den corte nos por spera suficiente suspenso den e proximo simannan. Banda di e probable resultado, candidato democrata Joe Biden como proximo presidente, tabatin hopi mas aspecto pa contempla di cual nos por siña. Por ehemplo, cu den e pais supuestamente mas digitalisa, un simple virus ta hiba henter e pais na maneha principalmente votacion riba papel… Casi 100 miyon hende a vota den e simannan anterior caba, lagando un parti menor pa vota en persona. Gran parti di e votacion ta tuma lugar na un manera ‘anticua’ cu hopi ta critica pero otro ta defende como mas sigur. E miedo di ‘hacking’ a keda e aña aki aumenta pa miedo di e virus loke a causa e votacion masal tempran y via post, a pesar di e gritonan di presidente Trump cu esaki lo conduci na fraude na gran escala, loke ta nonsense pasobra vota via post no ta algo cu a inventa e aña aki pasobra tin Covid, pero semper tabat’ey. Nos por conclui cu e metodo cu nos ta aplica na Aruba no ta asina malo, ya cu pa e manera cu ta organisa e participacion di e partidonan den supervision di e resultadonan ta practicamente ‘bulletproof’. Tur aña electoral ta tende e gritonan pa cambia pa digital, pero realmente nos mester e cambio ey? ‘If it ain’t broke, don’t fix it’ nan ta bisa.

En todo caso, nos por cuminza saca conclusion pa loke nos por spera di e proximo presidente, cu probablemente ta Biden. Pa e cosnan cu ta relevante pa nos restart nos economia, esun mas importante por ta e final di e maneho desastroso di e crisis di coronavirus na Merca, aunke esey riba su mes no ta bay cambia e situacion unda e pais a drenta caba den loke ta parce un invierno sumamente dificil. Awor Biden por bay proba cu e por haci mihor cu Trump pa dirigi e pais na un limitacion razonable di e virus, sin mata economia, al contrario, creando e base pa un recuperacion economico solido. Esey ta naturalmente loke henter Caribe ta sperando, ya cu tur teritorio di e region aki ta depende di esaki pa nan por recupera nan propio economia. Esey ta implica anto cu nos mester ta prepara lo mihor posible pa esaki, pa pr enfrenta e competencia cu lo ta fuerte tambe, cu tur pais den Caribe luchando pa e aumento den e demanda Mericano pa servico turistico. Den esey ta necesario pa nos no asumi cu automaticamente nos ta haya back looke nos tabatin. Y esey na su turno ta requeri cu a corto plazo nos mester haya claridad riba kico nos ta bay haci pa yuda nos mes pa nos por probecha maximamente di e oportunidadnan cu ta presenta.

Y aki ta unda nos preocupacion ta bolbe inmediatamente. Te na e momento aki nos a haya sa con financieramente gobierno ta sobrevivi e aña aki, pero no mucho mas cu esey. Di loke nos a mira y tende e aña aki, nos no por haci otro cu saca e conclusion cu por lo pronto no tin un alternativa pa sector turismo. Nos a mira un serie di propuesta di opcion pa sectornan ‘prometedor’ cu a keda pega den e fase di ‘idea riba papel’ cu por lo pronto no ta significa un alternativa economico, mucho menos alternativa cu ta trece divisa aden. Di e alternativanan cu gobierno mes a impulsa, nos no ta mira e proyecto di cannabis ta avanza, ademas cu nos no ta kere tanto den e aventura aki, ya cu aparentemente no ta tene cuenta cu loke ta sucede caba den nos region, y den condicionnan climatico y empresarial hopi mas faborable. Aki ta unda, ironicamente, nos nivel halto di costo di labor ta un estorbo pa cualkier actividad di produccion agricola o industrial. Pakico nos nunca ta tende nos ‘expertonan’ papia di e limitacionnan cu nos tin riba e tereno aki? Fuera di esey, nos ta tende e mesun storianan atrobe di un refineria renoba, mientras e mundo petrolero rond di nos ta ‘sangrando refineria’. Practicamente tur e operadornan grandi den e sector petrolero mundial ta reorientando nan actividadnan, di petroleo den direccion di otro formanan di energia no fosil. Ta asina dificil ta pa comprende e materia aki, o kier simplemente storia pa tende hende contento? Si esey ta e caso, ta ken e hendenan ta cu por engaña ainda na e altura aki?Un vistazo rapido riba internet ta duna cualkier persona, experto o simplemente ciudadano interesa, e informacion cu e ultimo refineria construi na Merca tabata na 1977… Si acaso ta asina cu gobierno tambe sa cu e refineria no tin futuro, henter e pantomima aki ta solamente pa para e critica di e partido den oposicion, cu tambe ta cultiva nan variante ridiculo di e supuesto renacimento di industria petrolero na Aruba, si nan tabata den gobierno? Aruba merece mihor cu esaki, y ta obvio cu loke ta mustra te awor no ta suficiente pa nos bay guera cune.