Fin di siman ultimo cu na varios pais di mundo fiestanan di celebracion di Halloween a wordo cancela pa via di pandemia di Covid-19, na Aruba e situacion tabata diferente. Algun detencion a cay, luganan a wordo cera y tabatin fiestanan riba caya cu aglomeracion di hende y zonido basta fuerte.

Tocante esaki, Cuerpo di Polis a convoca medionan di comunicacion pa ofrece un conferencia di prensa y splica kico a pasa den fin di siman y con polis a actua den diferente caso.

Alto comisario Vanessa Tjon Kock a comenta cu un gran parti di comunidad a celebra e fiesta di Halloween y nan a confronta masha hopi problema di orden publico. El a conta cu nan a enfrenta tiramento di boter, gruponan cu ta lanta contra autoridad – no solamente di polis sino di salubridad, cu ta forma parti di crisis team tambe – como tambe agresion contra cuerpo di polis.

“Di ningun forma comunidad no a comporta su mes y no por a tene su mes na e reglanan stipula pa loke ta trata e medidanan cu crisis team a bin cune”, Tjon Kock a afirma.

Di mesun manera, el a bisa cu nan a delibera cu grupo di musiconan, nan a sinta cu Horeca pa yega na un acuerdo, pero asina mes establecimentonan nocturno no kier tene nan mes na reglanan di ciere y no kier cera. Tabatin hopi aglomeracion, hendenan cu tabata den establecimentonan cu no kier bandona e sitio y no por saca nan afo tampoco, pa motibo cu na e momento ey polis mester tuma e decision conhuntamente cu DVG pa cera e establecimentonan aki.

Ademas el a expresa cu nos pais ta drentando den un temporada di fiesta cu ta Pasco, y ya caba peticionnan a yega Cuerpo Policial pa permiso. “Desde aworaki te dia 31 di december tur peticion pa fiesta pa temporada di Pasco ta wordo para, tanten cu no yega na un maneho hunto cu Crisis Team pa wak con lo sigui e lunanan venidero”, Tjon Kock a sigura.

El a bisa cu mesun situacion ta pasa cu permisonan di kerstboom y klapchi, cu tambe tabata decisionnan cu mester a palabra prome, pa wak di ki forma por duna permiso.

El a trece dilanti cu si comunidad no ta adapta nan comportamento, esey por trece como consecuencia e di tres ola di Covid-19, segun expertonan di DVG a indica. El a haci un yamado pa doñonan di establecimentonan nocturno: “Boso comportamento ta hunga un rol hopi importante”, Tjon Kock a declara.

Tambe, el a indica cu Cuerpo Policial no ta acepta ningun agresion contra ningun di su miembronan. Tampoco lo acepta ningun grupo cu ta bay lanta contra autoridad na e momento cu, segun el a afirma, nan ta cumpliendo cu nan reglanan y leynan cu tin cu cumpli cune.

Tocante limite di persona cu mester tene den cada establecimento, Tjon Kock a comenta cu tin diferente protocolnan cera y acuerdonan haci entre musiconan y establecimentonan nocturno cu tin un otro plataforma, cu a sinta varios biaha pa wak con nan por yega na un miho manera. Pero pa loke ta trata cantidad di hende, tin protocol stipula di DVG pa distancia social y tur doño di establecimento sa esey, segun el a manifesta.

Pa e motibo aki tin e task force, cu ta consisti no solamente di miembronan di Cuerpo Policial, sino tambe di bomberonan y DVG.

Di loke ta trata e fiesta di Halloween, cu ta un fiesta cu Aruba a tuma over den su cultura, el a bisa cu na e momento ey nan no ta bay stop un fiesta, pero ta debi na e forma. Mescos cu otro celebracionnan cu ta bin na caminda, nan no por para pa via di celebracion, sino ta pa via di e forma con ta haci’e.

“Esaki ta cosnan cu ta deliberadamente papia den crisis team y mirando e situacion actual di contagio”, Tjon Kock a specifica.

Na momento cu un luga ta wordo cera, e luga ta haya un proces verbal. Pero na momento cu luga tin cu habri of keda cera, nan tin cu tene cuenta cu leynan existente. Ora nan ta cer’e, nan por haci esey a base di ley; y pa habrie of lag’e cera mester tene cuenta cu decreto ministerial.

Tin hende den comunidad cu a expresa riba rednan social pa pone toque de queda bek. Pa cu esaki, Tjon Kock a contesta cu esey ta un medida hopi pisa. E ta compronde cu un gran parti di comunidad no tabata kier pa kita e medida aki y otronan a pensa mucho menos pa keda cune pa fin di aña. Di otro banda el a expresa cu un medida asina no ta solamente Polis ta tuma decisionnan riba dje, sino e team completo.

Tjon Kock ademas a informa cu e siman aki nan tin otro reunion y na e momento ey nan lo wak kico tin cu e situacion di contagio y Cuerpo Policial lo trece dilanti puntonan caminda nan ta bisa cu por bin cu mehoracion. Y manera por a mira tambe, por bin cu un maneho pa fin di aña.