Chauffeur di un trein metro na Hulanda a sali ileso despues cu e prome seccion di e metro a dal den e borde di un seccion eleva di rails y a wordo gara pa un escultura di e rabo di un bayena cerca di Rotterdam.
E metro a keda para riba e dos aleta di e rabo, conoci como ‘flukes’ na ingles, varios meter riba suelo.
Localmente esaki a crea asina un sensacion cu autoridadnan mester a urgi mirones pa keda leu, agregando cu restriccionnan di coronavirus ta na vigor. Asina mes, alrededor di 50 persona tabata na e sitio dialuna mainta, mientras ingenieronan tabata purba di haya un manera pa stabilisa y kita e trein, memey di biento cada bes mas fuerte.
“Un team di expertonan ta investigando con nos por hacie safe y bah’e”, Carly Gorter, un vocero pa autoridad di seguridad local, a bisa den un entrevista telefonico. “Ta dificil”, el a agrega. E autoridad a bisa awe laat cu un crane lo intenta eleva e trein for di e bayena awe mainta.
E arkitecto kende a diseña e escultura, Maarten Struijs, a bisa RTL cu e tabata contento cu e escultura probablemente a salba bida di e conductor. “Mi ta sorprendi cu e ta asina fuerte”, el a bisa. “Si plastic tabata para eynan pa 20 aña, bo no ta spera cu e lo wanta un metro.”
E compania cu ta opera e linea di metro a bisa cu e conductor a sali ileso y no tabatin pasahero den e trein na momento cu el a crash door di bareranan na fin di e stacion den Spijkenisse, frontera sur di Rotterdam, awe mainta. E stacion ta e ultimo parada di e linea di metro.
Autoridadnan a lansa un investigacion riba con e trein por a pasa door di e barera na fin di e rail. Tabata interogando e conductor como parti di e investigacion, segun autoridad di seguridad Rijnmondveilig a bisa.
