Kico tin den e carta cu Presidente di Parlamento a manda pa Minister President y cu unicamente a bira conoci despues cu Parlamentario Independiente Daphne Lejuez a ricibi e numbernan di registro den su postbus? En todo caso, e hecho cu Lejuez a haci e pregunta aki dia 22 di October den un carta pa mr. Juan Ady Thijsen a genera hopi disgusto cerca e Presidente di Parlamento.
Es mas, el a conduci na un reunion dia 27 di October, diamars ultimo, cu despues a sigui pa e decision di diarazon pa hala e mocion di desconfianza contra Marisol Lopez Tromp aden.
E reunion cu Daphne Lejuez sinembargo, tabata basa riba locual Presidente di Parlamento a declara, esta cu e Parlamentario Independiente mester para responsabel pa su actonan.
Parlamentario Daphne Lejuez a bira enfoke di iritacion di Presidente Thijsen pa motibo di a haci pregunta riba dos carta cu mr.Thijsen como Presidente di Parlamento a manda sin cu Parlamento tabata informa di e contenido. Tabata dia 22 di october cu Lejuez a manda puntra e contenido di e cartanan di cual el a haya unicamente e registro, cu ta UV/20-21/036 y UV/ 20-21/038.
Den e carta di 22 di october Lejuez a bisa di a tuma nota di cartanan cu a bay na nomber di Parlamento sin cu e Presidente a tene un asina yama seniorenconvent of sin informa Parlamento den un reunion di Comision Central.
Segun Lejuez, e ta inusual cu un Presidente kende ta papia na nomber di tur Parlamentario, pero no ta informa Staten, di kico el a comunica cu otro. Daphne Lejuez a bisa cu e actuacion aki ta di lamenta.
Responsabilidad pa acto
Por corda con mr. Thijsen, despues di a anuncia cu el a entrega keho na Ministerio Publico contra ex-Minister Marisol Lopez Tromp pa difamacion, tambe a bisa cu e lo bay haci un investigacion riba e comportamento di Daphne Lejuez y cu e Parlamentario Independiente mester bay tuma responsabilidad pa su actonan. Mas Thijsen no a bisa.
Y a yama e reunion pa diamars ultimo. Segun Lejuez e reunion tabata pa trata su carta di dia 22 y e peticion pa e dos cartanan cu Presidente di Parlamento a manda, cualnan no a keda comparti cu miembronan di Parlamento. E reunion a conclui cu e ponencia cu no por a comparti e cartanan aki te ora cu tene un reunion publico pa trata tur carta y documento ricibi pa Parlamento. Esaki ta un procedura prescribi pa e Reglamento di Orden y cu mester sucede regularmente. “Pero sigur den e tres añanan cu mi ta miembro di Parlamento, esaki nunca a tuma lugar.
” Durante e reunion a priminti cu lo tin un cambio den e maneho y cu pa otro siman lo planea un reunion publico pa repasa tur e cartanan y documentonan ricibi y manda pa Parlamento. Pa Lejuez ta yamativo, cu mester warda te un reunion publico pa un documento cu ya a yega su destino, pa Parlamentarionan por ricibi esaki.
Lejuez a puntra unda esaki ta regla pa ley of reglamentacion, cu un miembro di Parlamento no por tin acceso na e documento te ora cu e reunion en cuestion tuma lugar. Den cuadro di transparencia, integridad y bon gobernacion, e paso aki ta lanta hopi pregunta.
Anotacion di reunion cu Presidente Parlamento
Lejuez a dicidi pa haci un anotacion di e reunion di diamars, 27 di October den un carta unda e ta enfatisa cerca Presidente di Parlamento cu den cuadro di transparencia y bon gobernacion, y den su funcion como miembro independiente di Parlamento, pa a termino corto, presenta via email, copia di e cartanan cu tin e registronan menciona.
Ademas di a pidi Griffier pa registra su carta, mirando e expresion di Thijsen cu e mester para publicamente responsabel pa su actonan. Realidad ta si cu ta e propio Presidente a manda carta sin comparti e contenido cu ningun miembro di Parlamento.
Postbus
“Mi a haya e numbernan di e cartanan aki den mi postbus,” Lejuez a bisa Bon Dia Aruba. “Mi a ripara cu ta trata di documentonan di Parlamento cu nunca mi a mira. Tur documento cu ta registra na Parlamento ta pertence na Parlamento.”
Durante e reunion cu Presidente di Parlamento, a puntra Lejuez con el a yega na e numbernan di e cartanan, pero no a nenga existencia di esakinan. E ponencia tabata cu Griffie lo mester a bay haci un investigacion pa mira ken lo por a lek e informacion na Lejuez.
“Sin embargo, ami a haci e pregunta na Griffier, si e cartanan a sali di Parlamento y e contesta tabata ‘si.’ Mi a puntra si e cartanan a yega nan destino y e contesta tabata ‘si.’ Pues tin mas hende cu por sa di existencia di e cartanan y nan number, y riba e pregunta ey, e contesta tabata afirmativo tambe. Pues mi a splica durante e reunion, cu no tin mester di haci investigacion den Griffie pa haya sa di unda mi a haya e informacion.”
Kier tene contenido secreto?
Despues di e intercambio aki, a bira cla cu e cartanan a bay pa Minister Presidente di Aruba, y como cu el a bay pa Conseho di Minister, e ta un documento cu mester keda secreto. “Mi a bisa cu ami no tin control di locual ta pasa den Conseho di Minister.
Pues, si no a hacie publico na Parlamentarionan y sa cu documentonan cu ta bay Conseho di Minister no ta publico, e pregunta cu ta lanta ta si a tuma e paso pa mantene e contenido di e carta(nan) secreto pa miembronan di Parlamento.
E Reunion Publico pa trata documentonan cu drenta of sali, cu awor numa lo bay tuma lugar despues di tres aña, ta importante pasobra ta durante encuentronan asina ta reparti documentonan of ta determina kico ta haci cu nan. “Por ehempel si un documento di Comision Flora y Fauna drenta, ta durante e reunion publico ta pasa esakinan pa e comision fiho encarga cu medio ambiente. No ta tarea di Presidente di Parlamento pa anda cu tur documento. E reparticion ta sucede segun e Reglamento di Orden y Constitucion, durante un reunion publico.
Lejuez a sigui splica cu unavez un Presidente di Parlamento manda un carta na nomber di Parlamento, e mester hacie publico. Mester sa si e contenido tabatin e necesidad pa haya aprobacion of sikiera conocimento di e contenido. “Mi a haya como contesta, cu den e reunion publico cu mester yama ainda lo splica di con e cartanan ta confidencial.”
Mester bisa cu e dia despues di e reunion cu Parlamentario Lejuez, cu mr. Ady Thijsen a bisa di lo hala e mocion di desconfianza contra Marisol Lopez Tromp aden y lo sigui maneha e votacionnan den Parlamento segun articulo 27 di e Reglamento di Orden.
