Tin les pa siña…
E awasero fuertisimo di algun dia pasa a pone nos bira consciente con vulnerabel nos isla ta y con fragil nos infrastructura ta den cierto aspecto. Fuera di e areanan mas isola riba e isla unda tabatin problema pa salida di awa di menor grado, e problema grandi ta semper den e areanan cerca costa, di Arashi te San Nicolas.
Tin un motibo pakico semper e area di Palm Beach y Madiki tin problema grandi ora tin yobida fuerte. Esey ta pasobra e areanan ey ta parti di e antiguo saliñanan cu a keda converti den luga di biba, pero esey no a cambia e realidad cu ora awa yobe, e no tin caminda di sali. E problema no ta di awor sino di tempo cu a cuminsa construi den e saliñanan bieu. Den añanan cincuenta a sucede varios biaha cu tabata core rond cu boto, algo cu a keda ripiti tambe den añanan mas reciente.
A busca un solucion structural pa e problema aki y a yega na planificacion y construccion di e bario di vivienda popular Dakota. Un proyecto cu varios bentaha, por ehemplo e ta traha riba un halto mas leu for di lama, cu pa cuminsa caba no por tin e problema di exceso di awa manera Madiki. Igualmente a construi na San Nicolas un bario basa riba e mesun concepto, e bario cu a haya nomber di flor pa su cayanan.
Tambe e barionan aki a haya riolering, algo cu den e añanan despues a bira un fenomeno desconoci.
Pa loke ta e asunto di riolering; e escogencia pa no construi esaki mas, a haci cu cada ken cu traha cas, mester regla su pos pa awa sushi, y e mes regla con e ta deshaci di e awa sushi ey, ora su pos yena. Esey naturalmente a start tambe henter un negoshi nobo di carga awa sushi di cas hiba otro caminda, cu den e añanan despues a bira e sitionan di purificacion di awa. Esey pasobra nos a haya nos cu introduccion di e medidanan, a base di tratado internacional, cu mester a tuma pa para e tiramento di awa sushi den lama. Algo necesario pero costoso.
Sin embargo, e area problematico pa loke ta awasero a bira mas pobla ainda y nunca a yega na un solucion contundente, sigur no ora awa yobe hopi fuerte, manera tabata e caso siman pasa. Realmente no tin solucion simpel tampoco. Igualmente e problema na Noord unda e awa no ta yega na e area mas pabao di unda, via e reserva di Bubali, e awa tin salida pa lama. E area banda di pomp di gasolin ta asina abao, cu realmente no tin otro solucion cu lanta e pisonan di edificio y cas di tal manera cu awa no ta drenta paden den caso di emergencia. Esaki tambe ta e unico solucion, cu no tur hende ta aplica si nan tin duda cu nan por mantene nan caso seco ora sucede calamidad manera recientemente.
Si nos mester bay pensa riba solucion mas permanente, anto nos mester cuminsa puntra nos mes prome si ta hinca placa grandi den percura pa awa yega lama mas pronto cu ta posibel, o cu nos ta bay inverti den warda awa na un manera sigur, di tal forma cu nos por uza e awa ey pa por ehemplo agricultura. Nos a comprende cu nos Prome Ministro tambe a cuminsa papia den e direccion ey y esey por ta un bon comienso.
Talbes pa e areanan mas cerca lama esaki no ta bay ta un solucion completo, pero en todo caso nos tin tambe ainda e zonanan di reserva, manera na Malmok, cu por tuma bastante awa como reserva. Sin embargo, aki tambe nos ta mira cu construccion den e saliña a cuminsa caba, den un area cu potencial peligro den caso di yobida fuerte.
Tur loke nos por haci pa busca solucion mas structural, sin embargo, ta pega riba un realidad grandi: e cosnan aki ta costa hopi placa, y esey ta loke nos politiconan a gasta na mannan yen cu proyecto di prestigio cu no tabatin ningun prioridad. Awor cu placa a caba, y cu den e proximo añanan aki mester hala faha mara, nos ta tende cu ta bay pone un miserabel cinco miyon florin disponibel pa ataca e problema aki. Esey no ta ni sombra di e sumanan enorme cu mester pa realisa un plan cu ta sigura vivienda den tur e areanan bao o casi na nivel di lama cu nos tin.
Cu mas di cuatro mil miyon di debe di prestamo, mas casi mil miyon di proyecto ‘PPP’, nos ta na cinco mil miyon florin di debe, sin speransa di por fia mas, aunke cu e por ta pa algo util. Sin duda algun cu pa e cinco miyon florin lo bay haci un par di cos ‘cosmetico’, pa por saca potret cu e bisiñanan hunto cu Prome Ministro y e ‘kroonprins’ di Infrastructura, pero esey lo ta hopi aleha di loke realmente mester pa yega na solucion duradero. Pregunta: ki dia por spera e siguiente cinco miyon?
