Manera Bon Dia Aruba a informa ayera den forma di primicia, minister di Finansa y Asunto Economico, Xiomara Maduro a anuncia e 11 puntonan cu ta forma parti di e dos pakete di alivio fiscal. E alivio aki lo drenta na vigor 1 di november proximo, y nan ta busca activa nos economia.
El a bisa cu e alivio fiscal aki ta concentra su mes pa tene cuenta cu loke gremio comercial a yega di trece den nan peticionnan riba kico gobierno por haci pa yuda nan pa nan por keda draai economicamente.
Logicamente lo bay tin publicacion di e maneho aki relaciona cu e 11 punto di e alivio fiscal, hunto cu nan respectivo reglanan. Pa locual ta e puntonan mas tecnico, departamento di Impuesto lo publica esaki riba nan website.
Ainda tin dos punto cu ta pendiente. Nan ta e reduccion di tarifa di inkomstenbelasting y loonbelasting debi cu ainda nan no a keda cla cu e calculacion di nan impacto. El a splica cu denter di e reforma fiscal mes, nan a cuminsa caba pa baha e peso di e dos impuesto aki pa asina por yuda activa economia di nos pais pa asina comunidad por keda cu mas placa den nan cartera cu por yuda nan hopi pa loke ta cash flow. E ta spera cu prome cu e aña caba nan lo por anuncia esaki pa drenta na vigor na comienso di otro aña.
Pa minister Maduro importante ta cu nan ta trahando continuamente pa por brinda alivio pa atende e situacion actual cu no ta uno facil pa economia di nos pais y nos sector comercial, specialmente pa comerciantenan micro, chikito y mediano cu ta e musculo di nos economia.
E ta spera cu comercio por haci un bon uso di e incentivo fiscal aki, y cu esaki lo por duna un empuhe na economia di Aruba pa asina economia por produci pa caha di gobierno. “Pa caha di gobierno kiermen produci pa full Aruba.” el a bisa.
