Nunca a aproba 6.5 miyon extra pa Serlimar pero a bay di acuerdo den cuadro di presupuesto 2020

Parlamentario Endy Croes a tuma nota cu constantemente e Minister di Infrastructura problematico esta Marisol Lopez Tromp constantemente na un manera sistematico kier keda trece mentira dilanti te hasta durante debatenan den Parlamento al respecto un suma di 6.5 miyon florin pa cu Serlimar. Pa tur claridad kier splica lo siguiente.

Reunion di Comision Central di 26 maart 2020 :

Minister Marisol Lopez Tromp berdad tabata na Parlamento dia 26 di maart 2020 algun dia despues cu Parlamento a caba di aproba presupuesto di Pais Aruba. E peticion aki a wordo trata den un otro settings y otro tipo di reunion esta den Comision Central unda cada Fraccion tin mester di solamente 1 representante den sala.

Asina nan ta pidi pa e gevoelens di Staten al respecto cualkier tema. Marisol Lopez Tromp a presenta en realidad un peticion pa gevoelens di Staten riba 6.5 miyon florin pa Serlimar. Esaki tabata Parlamento momento a aproba caba un presupuesto di aña 2020 cu un deficit enorme al respecto e efecto di corona virus no sin mas por keda aproba extra placa pa cada minister individual. Lo bay over na splica kico cada Fraccion a bisa den Staten durante e reunion di Comision Central pa asina ilustra cu FEITEN con Marisol Lopez Tromp ta keda gaña sin fin.

Notulen di Staten di dicho reunion:

Sr. Rocco Tjon: Nos ta di acuerdo cu e peticion mirando cu ta trata di fondonan cu ya caba a wordo aproba y cu no ta fondonan ADICIONAL. Delanira Maduro: Contal cu esaki ta den cuadro di presupuesto aproba mi ta duna ok. Marlon Sneek: Manera cu colega Tjon a trece dilanti cu ta simplemente un informacion pa Parlamento y cu ya esaki ta den e presupuesto cu ta acorda. Esaki ta saca literalmente for di notulenan di Parlamento y Minister Marisol a wordo informa.

Pues Parlamento ta di acuerdo pa e saca e 6.5 miyon for di su mesun presupuesto aproba caba pa parlamento y ningun caminda Parlamento a otorga Minister Marisol 6.5 miyon extra. Pues e minister mester a schommel den su propio carteranan pa asina mira unda e lo corta y unda e lo schuif di un post pa otro pa yega na e 6.5 miyon. Parlamento tabata cla y raspa riba esaki.

Pa tur claridad Parlamento a aproba den presupuesto 21.6 miyon pa Serlimar pa cu aña 2020 di cual te cu Augustus Serlimar a haya caba rond 14 miyon. Pues Minister di Financien basa riba e situacion ta coriendo dilanti den pagonan pa cu e DVO 2020. Parlamentario Endy Croes ta termina splicando e no por compronde con un minister cu un trayectoria asina largo den politica mester keda gaña te hasta den Parlamento. Notulennan di reunion no ta gaña!