Un anuncio cu sigur a trece un preocupacion extra den comunidad, y principalmente den sector laboral, tin di haci cu e anuncio cu Caribbean Mercantile Bank (CMB) a haci di bin cu un reduccion substancial di 44 trahado full-time of ekivalente.

Presidente di FTA, Hubert Dirksz a bisa cu nan a yega na un acuerdo cu gerencia di e banco cu nan a firma, pero nan no mester kere cu e ta un acuerdo pa reduci trahado. E ta un proposicion cu mester wordo entrega na e trahadonan cu nan a señala pa retira. “E trahado ta keda liber pa acepta si of no,” el a bisa.

E sindicalista a bisa categoricamente cu e acuerdo cu nan a firma no ta uno di retiro, ya cu como organisacion sindical nan no por mara niun trahado. Tampoco banco no por kita un trahado gewoon pasobra ley ta protege nan.

Situacion dificil

Presidente di FTA a informa cu gerencia di banco a acerca e sindicato cu ta representa e trahadonan di e entidad bancario aki, caminda nan informa cu e banco ta den situacion dificil y cu nan mester reduci empleado. Ya cu segun gerencia di e banco, hopi tempo nan tin trahado di mas y cu entrada di e banco a baha. Mientras tanto e gastonan a keda mesun cos y no ta keda nan nada otro cu bin cu e sorto di medida aki.

Loke FTA a scucha di banco ta cu dia 1 di november nan kier keda cla y nan kier reduci alrededor di 40 trahado. Pero actualmente nan a yega di reduci 28 trahado: 7 di nan ta miembro di FTA. Mayoria di e 21 hendenan cu no ta miembro di FTA, nan ta personal di departamento di security.

Nan intencion ta pa laga otro compania atende cu e trabao aki. Pues e trahadonan cu ta miembro di FTA, y cu no ta di acuerdo cu gerencia di banco kier kita nan, sindicato ta para su tras pa yuda nan. Den e caso aki hues tin cu bay dicidi si nan ta keda cu nan trabao of no.

Dirksz a bisa cu na final gerencia di e banco kier retira e cantidad di trahado anuncia y nan ta bay usa e criterio di ‘esun cu ta bin ultimo ta bay prome.’ Tambe nan lo tene cuenta con e trahado ta funciona, produccion y si e trahado tin situacion cu nan mester tene cuenta cune. Pues esaki ta e forma cu nan lo balansa e retiro di personal na diferente edad. E ta un plan di reorganisacion, ya cu un cantidad di funcion ta bay stop di existi.

FTA a negosha cu gerencia di banco, caminda nan a bin cu nan proposicion. Di su banda FTA a bin cu su proposicion pa negosha kico ta mas husto posibel pa e trahadonan. Nan a yega na un acuerdo y e formula cu ta wordo usa mas tanto den caso di reorganisacion of retiro grandi. Nan a pone pa un acuerdo di factor 1.1. Pero cu nan lo mantene pa un aña largo, si e trahado tin hipoteca of debe na banco y/of beneficio di credit card.

Banco lo percura pa afecta e trahadonan menos posibel. Nan mester retira hende cu un minimo di impacto pa e trahadonan pa sigura e viabilidad di e banco na termino largo. Dirksz a bisa cu banco su entrada a baha hopi y nan ta sinti cu no ta sostenibel mas.