E tanker Venezolano “Nabarima” ta un tema di preocupacion debi na e peliger cu e ta nifica pa nos region si nan contenido di 1.3 miyon di crudo ta basha riba lama. E ta un tipo di deposito di crudo di 264 meter di largura riba lama pa abastece otro tankernan di combustibel.

Prome Minister, Evelyn Wever-Croes a referi na e asunto aki treciendo informacion mas positivo. Pero si lagando sa cu ainda nos ta keda bao alerta. Na inicio di siman tabatin indicacion cu eventualmente e barco aki lo por candel te hasta zink. E bon noticia, meymey di e situacion delicado aki ta, cu e compania Venezolano di petroleo, esta PDVSA a manda otro tanker “Icaro” pa traspasa parti di e crudo for di Nabarima. Segun informacion cu e mandatario a divulga, te aworaki nan a logra traspasa mita di combustibel. Informacion internacional ta indica cu ademas di “Icaro”, otro barco “Inmaculada” a wordo manda pa PDVSA pa sigui realisa e labor di almacenamento di crudo for di Nabarima.

E hecho cu mita di e crudo a wordo traspasa caba – segun nos prome mandatario – e nivel di peliger of riesgo pa Aruba a baha. “Esey ta pone cu e barco ta bay tin menos chens pa candel y riesgo pa Aruba ta birando un poco menos,” el a bisa. E mandatario a sigura cu comunidad por ta trankil pasobra e situacion aki ta kedando cla.

Estado di alerta

E riesgo ta cu e crudo riba lama lo por afecta Aruba. Ya caba pa medio di Rampen Burea a wordo activa estado di alerta. E mandatario a pidi e bureau aki pa busca un ekipo di “response” como un forma preventivo den caso e crudo cuminsa sali y bin den nos direccion. “Esey nos tabatin regla y nos tine regla caba,” el a bisa. Igualmente WEB a institui un ekipo pa asina nan por ta alerta y sigura cu e calidad di awa no lo resulta afecta den caso di un derame di crudo preveniendo di barco Nabarima.

 

El a bisa cu for di cu accidente a presenta den interior di e tanker aki cu un leakmento, ya caba Aruba tabata den estado di alerta. Ya cu e cantidad di crudo abordo lo por nifica un problema grandi pa Aruba. Pero na e momento aki premier Wever-Croes por bisa “cu e situacion ta bao control.” Pero logicamente nos isla ta keda na estado di alerta pa monitor kico ta sosode; y pa mira con e proceso ta bayendo di saca e crudo for di Nabarima.

Pa sigura cu e informacion cu nos ta bin hayando pa monitor e situacion di e Nabarima ta uno confiabel, relacion exterior di Reino a keda envolvi. Premier Wever-Croes a bisa ora cu Aruba a cuminsa haya hopi alerta for di Trinidad & Tobago, ya cu nan ta mas cerca di e tanker y logicamente nan lo por resulta afecta mas prome cu nos. Nan a dicidi hunto pa involucra Relacion Exterior di Reino na Hulanda. Aworaki embahada di Reino na Washington ta nos wowonan. El a agrega cu Washington mes ta purba di wak mas leu, y asina Aruba por haya mas informacion. Asina na Aruba nos por ta mas trankil cu e informacion ta mas confiabel.

E mesun prome mandatario a reconoce e importancia di logra e tipo di monitor aki. Ya cu for di e prome fase cu Nabarima a cuminsa presenta problema, tabata dificil pa nan por haya informacion. “Pasobra nos ta depende di autoridadnan Venezolano cu no tabata comparti tur informacion cu nos, ” segun e prome mandatario.