Reciente un audio basta comenta den social media a wordo plama di un señora Venezolano cu despues di realisa un biahe largo di mas cu 18 ora for di Scotland su entrada di transito a wordo nenga na Aruba.

Minister di Husticia, Andin Bikker no a referi specificamente na e caso aki, pero si el a laga sa cu tabatin ‘un mal entendimento.’ El a cita e articulo 5.2 di decreto ministerial cu ta referi for di juli caba cu pais Aruba a habri parcialmente su frontera, caminda a wordo determina cu cierto paisnan, entre nan Venezuela, cierto restriccion.

Den e decreto ta poni cu si e persona ta residente di Venezuela y si e vuelo ta procede di Venezuela of e otro paisnan, nan no lo wordo transporta pa Aruba. Pero tambe e persona lo wordo nenga e admision na Aruba, el a declara durante e conferencia di crisis team di diaranson anochi.

Minister Bikker a bisa cu recientemente tabatin un par di caso cu a tuma luga y te hasta a bin cierto reclamo ariba e maneho gubernamental aki. “Esaki no ta pasobra nos di repenti a bin cu medida adicional,” el a expresa.

Sinembargo el a indica cu aworaki a bin un par di casonan di persona cu a bin Aruba di transito cu mester di un permiso special di departamento di Aeronautica Civil. E mandatario a ripiti cu e tipo di casonan aki ta laga un impresion cu aworaki gobierno a bin cu e medida di restriccion aki pa biahero di cierto procedencia of residencia, entre nan di Venezuela.

Igualmente minister Bikker a sigui bisa cu e medida aki no ta nada inusual. El a referi por ehempel cu Alemania pa cierto areanan di Hulanda a bin cu cierto restriccion. Tambe el a sigui bisa cu otro paisnan rond mundo ta cera di bes en cuando y temporalmente e proceso di acceso di personanan cu e frontera bisiña. Pues e medida aki pais Aruba a bin ehecuta for di juli ultimo caba. Pero e ta haya cu te aworaki e medidanan aki a wordo ripara debi na e casonan cu a yega di presenta, pero e no ta algo inusual. E mandatario a argumenta cu e medida tin di haber netamente cu e crisis actual di coronavirus.

El a pidi comunidad pa tuma nota di e decreto ministerial cu ta wordo publica digitalmente den e corant oficial di pais Aruba, caminda eynan nan por tuma nota di e paisnan cu ta cay den e lista.

Caso

E caso relaciona cu e señora Venezolano den su relato el a bisa cu nan a dicidi di bula di Scotland pa Amsterdam pa finalmente yega Aruba, unda nan tabatin pensa di permanece dos siman di cuarentena y nan destino final tabata Merca. Pero e señora no a keha solamente cu nan entrada a wordo nenga, sino di e mal trato cu a ricibi for di funcionario di migracion durante nan breve estadia den nos aeropuerto. El a bisa cu a mustra su dos paspoort entre na esun di Venezolano. “Ora e persona a wak e paspoort Venezolano e homber a bira manera un colebra a mord’e,” el a bisa.

A pesar cu el a splica e funcionario di inmigracion e motibo di nan biahe y cu nan a bin pa bay Merca, despues di permanece dos luna na Europa, pues nan no tabata biniendo for di Venezuela. “Nan a deporta nos den e mesun vuelo cu nos a yega y ata mi aki na Amsterdam, ” el a bisa.

Despues a circula e rumor cu e señora aki ta casa di e periodista renombra di Venezuela, Nelson Bocaranda. Pero e mesun periodista via su cuenta di Tweeter a nenga cualkier relacion familiar cu e señora envolvi den e caso aki.