En vista di e aumento di prijs di productonan di canasta basico na Republica Dominicana, presidente Luis Abinader a revela cu autoridadnan ta trahando pa identifica e productonan cu ta subiendo den prijs, pa busca manera pa stabilisa nan.
El a indica cu ta un gran preocupacion di gobierno, pa cual nan ta bay informa den detaye den e proximo dianan a traves di ministerio di Agricultura y ministerio di Industria, Comercio y ‘mipymes’ (empresa micro, pequeña y mediana).
E mandatario a referi na e tema aki den su participacion na e XIX aniversario di Conseho Nacional di Comercio di Provision (CNCP), unda el a indica cu si e empresanan micro, chikito y mediano ta bay malo, asina e pais unda nan ta, tambe ta bay malo. El a agrega cu “si nos tin mipymes fuerte, nos ta bay tin un gran Republica Dominicana y nos ta bay sali di e crisis aki mas fuerte cu nunca (…).”
Den e evento Abinader a pidi su ministro di Industria, Comercio y Mipymes, Victor Bisono, pa traha hunto cu e sector mipymes pa entrega pa dia 30 di november un plan nacional di desaroyo y fomento di mipymes.
Di otro banda, Luis Abinader a declara cu despues di dos luna di su gobierno practicamente e mayoria di sector di economia a normaliza nan operacion o ta den proceso pa normaliza, cu excepcion di turismo, cu “ainda mester di un apoyo mayor di nos”.
Presidente di CNCP, Tomas Marcano, a indica cu e empresanan di e categoria di mipymes pa nan naturalesatin problema cu cumpli cu e actual reglanan impositivo, loke ta haci cu nan ta 90% di e problemanan di imposicion na e pais. Ademas cu mayoria di nan, despues di pasa den e proceso di formalisacion, dentro di tres aña ta cera nan porta atrobe.
