– Pa preveni y disminui e risiconan y peligernan na pia di trabou, DTI a cuminsa reforsa un ordenansa gubernamental cu ta institui e figura di e inspector di siguridad. Recientemente un grupo di 15 persona a ricibi nan certifica como inspector di grua otorga pa Inter American Inspection & Certification Bureau (IACB).
E training manager di IACB, Ing. Audy Puyosa a declara na Bon Dia Aruba cu ora un mashin pisa manera un grua no ta wordo opera di un forma adecua. Of no tin un bon programa di mantencion di e mashin pisa of simplemente ora cu ta wordo neglisha e criterionan di e fabricante, esaki ta crea e posibilidad di sufri un accidente laboral cu mashin pisa, caminda mayoria di nan ta fatal.
E meta tras di e training aki tabata esun di crea un cultura normativo. Ta asina cu DTI lo por aproba e operacion di un grua of mashin di hisamento pa medio di e inspectornan aki. Nan ta realisa e inspeccion aki cu un criterio profesional a base di reglanan local y internacional.
El a bisa cu e meta no ta exclusivamente pa cumpli cu un rekisito di inspeccion. Sino cu nan mester percura un mehoracion continuo di normanan di siguridad den e proceso di operacion di ekipo pisa di hisamento riba nos isla.
Training di inspeccion
Ing. Puyosa a indica cu tin sector laboral manera turismo, oficina, etc. cu un accidente di trabou ta lesion menos grave. “Pero e tipo di accidente relaciona cu e operacion di ekipo of mashin pisa manera grua, normalmente ta resulta fatal. No solamente un persona por muri sino cu mas persona lo por perde nan bida”, el a bisa.
Ademas di e perdida ireparabel di bida humano, e tipo di accidente aki ta ocasiona daño material grandi di ekiponan pa sumanan astronomico. Un accidente di e caliber aki por hasta pone den peliger full e realisacion di un proyecto a consecuencia di un mal operacion di un mashin pisa manera un grua.
P’esey e training aki organisa pa DTI den cuadro di implementacion di e ordenansa gubernamental di inspeccion di siguridad ta uno di suma importancia.
El a bisa cu e tipo di training aki ta brinda e posibilidad di mehora e desaroyo di e trabou di inspeccion di ekipo di mobilidad pisa.
Sra. Isabel Wernet-Reyes tabata e unico hende muhe cu a participa di e training aki hunto cu otro 14 colega mas. El a bisa cu e tin un compania, esta I.C.M. Contractors cu lo traha riba diferente tipo di inspeccion den area di siguridad industrial y inspeccion di grua.
E ta haya hopi necesario cu na Aruba a wordo introduci e tipo di inspeccion aki pa asina garantisa e siguridad na pia di trabou. El a elogia e echo cu DTI ta bin cu e tipo di training aki pa asina mas hende por ripara e necesidad cu ta existi den empresanan pa mantene un ambiente laboral safe.
Aunke e curso aki ta uno di 5 dia so, e ta un curso intensivo. Pero e proceso di formacion di inspector di siguridad ta uno continuo. Ya cu semper ta bin normanan nobo cu ta trece mehoracion di e trabou aki.
Normanan y IACB
E grupo di inspector di grua a ricibi un certificado internacional. Tambe nan training tabata a base di e norma ASME B-30-5 di 2011. Sinembargo ora cu nan a cuminsa e training aki su dia siguiente a bin acerca e ultimo norma di aña 2014 cu a drenta na vigor siman pasa na Latino America y Caribe.
Danki cu nan tin un aliansa cu Sociedad di Ingeniero Tecnico di Siguridad y Medio Ambiente, nan ta realisa trabou di gestion preventivo na Latino America y Caribe.
Tambe Ing. Puyosa a bisa cu nan a actualisa nan mes na e format nobo. Ademas nan a cuminsa traha e base legal pa incorpora e norma nobo aki na e legislacion existente relaciona cu e trabou di inspeccion.
Inter American Inspection & Certification Bureau (IACB)nan actividad ta conta cu reconocimento na Latino America y nan ta valido na nivel mundial. Nan sede academico ta situa na Maracaibo (Venezuela), pero nan sede principal ta estableci na Merca y Panama.
Nan organisacion tin 16 aña di experiencia riba tereno di ekipo di hisamento tanto ariba tera como ariba lama. Nan ta dunando e tipo di training aki den otro islanan di Caribe manera Rep. Dominicana, unda nan lo duna training cu otro instancia pa e hendenan cu ta traha den e sector minero. Tambe nan a ofrece e training aki na Mexico, Cuba, Costa Rica, El Salvador y otro paisnan di Centro America y Caribe. Igualmente nan a certifica personal di inspeccion entre otro na Chile, Argentina, Uruguay, Bolivia, Brasil.
