Arkeologonan Egipcio a descubri otro tesoro di cahanan di morto antiguo, den un necropolis grandi sur di Cairo, segun autoridadnan a bisa dialuna.
Ministerio di Turismo y Antiguedad a bisa den un declaracion cu arkeologonan a haya e coleccion di sarcofago colorido, seya, dera mas di 2,500 aña pasa den necropolis di Saqqara.
Mostafa Waziri, secretario general di e Conseho Supremo di Antiguedad, a bisa cu a haya mas di 80 sarcofago.
Arkeologonan tambe a haya estatua colorido di palo cubri cu metal, e ministerio a bisa. Lo anuncia detayenan di e hallazgo na un conferencia di prensa na e famoso Pyramid di Trapi na Djoser.
Egipto ta publica su hallazgonan arkeologico den un esfuerso pa rebiba su sector clave di turismo, cual a sufri un golpi fuerte pa e disturbionan cu a sigui e accionnan na 2011. E sector tambe a keda afecta pa e pandemia di coronavirus e aña aki.
Prome minister Mustafa Madbouly, y minister di Turismo y Antiguedad, Khalid el-Anany a haci un tour di e area y a inspecciona e descubrimento nobo, cual a yega poco mas di dos siman despues cu e ministerio a revela cu a haya 59 sarcofago cera, cu momia den mayoria di nan, den e mesun area di Saqqara.
E sitio na Saqqara ta parti di e necropolis den capital di Egipto antiguo, Memphis, cu ta inclui e famoso Pyramid di Giza, como tambe pyramid chikito na Abu Sir, Dahshur y Abu Ruwaysh. E ruinanan di Memphis a ser designa como un sitio di Herencia Mundial pa UNESCO den añanan 1970.
E plateau tin alrededor di 11 pyramid, incluyendo e Pyramid di Trapi, hunto cu centenares di graf di oficialnan antiguo y otro sitionan variando desde e prome Dinastia (2920-2770 B.C.) te cu periodo Coptico (393-642).
