FADA su Siman di Bisti na Locura 2020: “Be Happy, Be Brave, Be Drug Free!”

E Siman di Bisti na Locura 2020 ta e campaña mas popular di Fundacion Anti Droga Aruba (FADA) cu e aña aki nan forma di participa a cambia.

Pa 8 aña sigui FADA ta bin realisando e campaña aki, y 2020 a pesar di e pandemia di Covid-19, no a bira un excepcion tampoco pa bin cu nan siman di bisti na locura. E siman aki ta cuminsa oficialmente dialuna awor 26 di october te cu 30 di october.

“Nos ta spera un biaha mas cu e comunidad ta duna sosten na e campaña aki,” asina trahado preventivo di FADA, Rulienne Arends a bisa. El a declara na Bon Dia Aruba cu cada aña FADA ta mira cu e campaña aki ta bira uno hopi grandi. E hecho cu e ta riba social media a contribui cu cada aña mas hende ta participa.

Un biaha mas e campaña aki ta cla pa cuminsa. Ya for di algun siman caba FADA via su Facebook page (Fada Aruba), ya nan a bin cu algun informacion. E lema di e aña aki ta: “Be Happy, Be Brave, Be Drug Free!” . E ta e lema cu a gana na Merca y cu ta wordo uza internacionalmente na 2020.

Siman di Bisti na Locura

Den cuadro di Siman di Bisti na Locura, entre dia 26 te cu dia 30 di october, cada dia e participantenan lo bisti di un forma special, unda bo ta uni hunto cu FADA como un forma pa bisa cu abo tambe ta contra e uso, abuso y traficacion di droga, sin lubida e parti di consumo di alcohol y tabaco tambe. Durante e siman aki di bisti na locura, entre otro, nan ta dedica dia 29 di october como Dia di Profesion di bo Soño.

Arends a bisa cu e dia aki nan kier dedica un rato na loke ta front liners. Den e caso aki no solamente e dia lo ta dedica na e trahadonan di salubridad, entre nan enfermeria, dokternan; pero tambe cuerpo policial. Pero tambe esunnan cu abo mes ta sinti cu e ta un front liners for di luna di maart caba cu Aruba ta bin confronta e situacion di Covid.

Arends a bisa cu e forma cu bo ta participa sea cu bo ta haci’e full e siman of bo ta scoge un dia particular, bo ta saca un potret. E potret aki por ta sea di bo persona, grupo of bo klas y bo ta pone riba website di FADA (www.fada.aw) unda bo ta haya e poster di E Siman di Bisti na Locura y bo ta click riba esaki caminda bo ta yena tur bo informacion, entre nan nomber, fam, e-mail adres, etc… Despues bo ta subi bo potret pa asina participa den e campaña aki. Despues FADA ta post riba su Facebook page e potretnan di tur esunnan cu ta participa. Nan lo pone un video riba nan Facebook page caminda bo ta haya un splicacion detaya con bo ta haci esaki.