Tin circunstancia unda Gobernador mester actua como cuidador di estado di derecho democratico y e responsabilidad aki ta basa riba su huramentacion. Asina Mr. A. Hoeneveld ta bisa, kende a skirbi un nota riba e posicion di Gobernadornan den Reino Hulandes. Mr. Hoeneveld ta traha na Direccion di Asuntonan Constitucional di Ministerio pa Asunto Interior y Relacion di Reino, y tabata Director di Gabinete di Gobernador di St. Maarten.

Hoeneveld a ilustra e tarea di Gobernadornan como representante di Rey, y tambe hefe di gobierno di e paisnan. Ta funcionnan di inmunidad, unda entre otro no solamente ta representa Rey como hefe di e diferente gobiernonan, pero tambe ta actua como organo di Reino, unda ta representa gobierno di Reino.

Historia recien a mustra diferente caso, no solamente na Aruba, pero tambe na Corsou y St. Maarten unda Gobernador mester a tuma un postura cu pa hopi kizas ta mustra di no ta su tarea.

E pregunta pues ta, si Gobernador no ta carga responsabilidad politico, e tin derecho pa keda sin firma un decision di un gobierno? Hoeneveld ta puntra si e Gobernador tin derecho di veto.

E ta kere cu e contesta ta sinta den e huramentacion y e conseho di Raad van State na momento cu Rey Willem-Alexander a haci su huramentacion como Hefe di Estado di Reino.

Raad van State a bisa den su splicacion di 23 di december2010, cu Rey tin su propio responsabilidad cu ta basa riba su huramentacion di ta sostene Constitucion y mantene y defende e independencia di teritorionan di e estado, manera un bon Rey ta obliga di haci. Gobernadornan di Reino Hulandes tin e mesun responsabilidad aki. Nan ta huramenta na Statuut y ta hura di ta mantene y sigura cu ta mantene Constitucion di nan paisnan y nan reglamentonan.

Esakinan no ta promesa bashi y no ta promesa simbolico. Mirando cu e huramentacion mes no ta duna autoridad riba su mes, mester conclui basa riba e formalidad di e promesa, cu tin responsabilidad. Sin esaki, e promesa di Rey y Gobernadonan ta bashi. Rey Willem Alexander a papia di e responsabilidad aki dia 30 di April 2013, ora cu el a declara cu “E hecho cu e Rey no tin responsabilidad politico no ta nifica cu e no tin su propio responsabilidad. Sino, e promesa, cu lo mi haci durante e Reunion di Staten General, lo ta sin nificacion.”

Gobernadonan como tal tin como responsabilidad di fungi como Cuidador di e proceso Constitucional, segun Hoeneveld. E hefe di estado, como un institucion no politico, ta forma parti di un democracia parlamentario unda e ta tira bista si ta sigui e proceduranan di un estado di derecho.

Ki ora por keda sin firma un ley

Tin circunstancianan baodi cual Gobernador tin e derecho pa keda sin pone su firma baodi un landsverordening of landsbesluit? Pa e contesta aki, mester haci distincion entre Gobernador como organo di Reino of Gobernador como hefe di gobierno. Segun e reglamento di Gobernador como Organo di Reino, Gobernadorpor keda sin firma si e ta considera e decreto o ley ilegitimo.

E autoridad aki ta basa riba articulo 21 di e Reglamento di Gobernador. Raad van State lo keda consulta y lo evalua e uso di e articulo aki. Despues, a base di e evaluacion di Raad van State, Gobierno di Reino ta determina si ta mantene e decision di Gobernador, o ta instrui Gobernador pa firma e documento toch. E derecho di veto di Gobernador, basa riba articulo 21 di Reglamento di Gobernado tin asina uncaracter limitativo den tempo. Pues, por yega na e conclusion, despues di e evaluacion menciona, cu e no mester a aplica e articulo aki. Asina ta evita cu Gobernador por stroba e proceso di decision indefinidamente.

E pregunta ta si Gobernador como organo nacional tin e mesun derecho di veto. Aki e asunto ta mas delicado y mas complica. No tin un consenso riba e punto aki. Pero aki….hunto cu Profesornan Hirsch Ballin, Hoeven y Prakke y hueznan van der Poel, Wit y De Boer ta di acuerdo cu otro, cu por tin un situacion unda e Gobernadorta sinti su mes obliga pa actua como e cuidador di e structura constitucional a base di nan huramentacion y obligacion na mantene estado di derecho. “Nos a mira con den caso di Gobernador, por hasta oblig’e di ehecuta e funcion di cuidador di estado di derecho.

Pa esaki ta importante cu Gobernadornan, contrario na Rey, ta haya nan autoridad pa cuida e interes general di e paisnan autonomo den e parti Caribense di Reino. E Gobernadornan ta co-responsabel pa e tarea di garantia di Reino describi den articulo 43, inciso 2 di Statuut y como tal tin un cuadro di evaluacion mas amplio cu Rey.

Gobernador, den su capacidad di organo nacional, por sinti su mes yama pa wak mas leu como e hefe ‘inviolable’ (onschendbaar). Prome Minister ta carga responsabilidad na nomber di Gobernador, cada Minister ta carga responsabilidad pa nan decision di gobierno, ora e ta sinti cu e mester controla consistencia di e ordenconstitucional di e paisnan den relacion cu esun di Reino.

Ki ora tin limite pa firma

Esaki no ta nifica si cu e por actua sin mas, basa riba Articulo 21 di Reglamento di Gobernador. Esey lo implica cu e no ta actua como cuidador di e structura, pasobra condicionnan no tur ora ta preto of blanco. E ta nifica si cu no tur ora Gobernador mester djis firma na e hokki.

Pero ki ora ta yega na e limite? Esey ta un pregunta dificil pa contesta. Basa riba historia, por tuma nota cu e limite aki ta basa riba consenshi di Rey of Gobernador basa riba su conviccion religioso of moralidad. Pero mester puntra si esaki ta hunga un papel awendia.

Si parlamento tuma un decision cu por bay contra e conviccion personal di Gobernador, e por laga su reemplazante firma e ley. Y pasobra e ta un evaluacion personal, e no tin efecto pa e funcion di Gobernador. Pero ta diferente ora cu a yega na un limite cu un caracter constitucional, unda ta pone estado di derecho democratico y mantencion di Constitucion den wega. Gobernador e momento ey no ta actua basa riba un conviccion personal sino basa riba su tarea como cuidador di Constitucion. No solamente e ta un derecho, sino un obligacion.

Den e sentido aki, mester respeta e decision di Gobernado si e ta sinti cu a kibra cu Constitucion of otro ley di e pais. E pregunta ta si, ken ta carga e responsabilidad politico di e Gobernador como cuidador di Constitucion. Den un caso asina, e Minister cu no kier asumi responsabilidad pa actuacion di e Gobernado, lo mester duna cuenta na parlamento of mester entrega su retiro.

Gobernador semper por cay back riba su tarea di garantia, den caso cu estado di derecho democratico ta den wega, pa medio di keda sin firma e decision basa riba articulo 21 di e Reglamento di Gobernador. Pero e mester ta uno si cu Gobierno di Reino ta para su tras.

Ademas, Gobernador, basa riba e funcion di garantia, por dicidi pa keda sin firma como e ‘ultimum remedium’, e ultimo paso, despues di a trata di haci uso di tur otro posibilidad cu no a funciona. Autonomia di un pais ta beneficia di un Gobernador kende no ta haci uso di articulo 21, pues ta trata di evita escalacion.

Gobierno di Reino

Na di tres lugar, Conseho di Minister di Reino ta consisti di Ministernan di Hulanda y Ministernan Plenipotenciario di e tres paisnan cu ta actua riba instruccion di nan gobiernonan. E Gobernadornan no ta sinta den Conseho di Minister di Reino. Pues, e Ministernan Plenipotenciario ta dicidi hunto cu Ministernan di Gobierno Hulandes riba e diferencia cu nan tin cu nan Gobernador. E posicion di Gobernador pues no ta uno di igualdad y como tal, e ruta pa Conseho di Minister di Reino pa e motibo ey caba ta menos atractivo.

Na di cuatro luga, ta importante pa reconoce, cu Conseho di Minister di Reino no ta un Corte Constitucional, pero un organo politico cu ta tuma decision politico. Tabatin casonan caba con na 1998, Gobernador no a firma un decision di gobierno pa nombra un Minister (Glenbert Croes den Gabinete Henny Eman) pa motibo cu el a considera esaki contra su tarea di garantia basa riba articulo 43 di Statuut. Gobierno di Reino a bay di acuerdo cu e decision.

Sinembargo, dos aña despues, Gobierno di Reino a tuma un postura mucho mas reserva pa loke ta nombramento di Ministernan na Aruba y otro paisnan den Reino, hasta si tabatin riesgo.

Pero na 2014, Gobierno di Reino a duna instruccion na Gobernador pa wanta e decision di Ministernan te ora cu tin investigacion si nan ta cumpli cu reglanan di integridad. Y asina tin mas ehempel. Pues, hopi di e decisionnan ta basa riba e opinionnan politico den Conseho di Minister di Reino, cu no ta haci e trabao di Gobernador mas facil.

Pues, un Gobernador no ta haci uso di articulo 21 di e Reglamento di Gobernado sin mas, y ta haci uso di su responsabilidad y derecho pa keda sin firma unicamente si no tin otro opcion.