Na momento di drenta e sitio di Fundacion Eliezer, bo ta sinti bo ta bishitando un Jardin di Eden. E entrada ta conduci na un cunucu cu naturalesa bunita tur rond di dje. Tin animal, grano, greenhouse y un parke.

Cuatro persona dedica, apenas un manyen, ta traha diariamente pa yuda 15 homber cu e perde nan caminda den bida. Nan ta adicto na alcohol y/of droga, y ta biba na e fundacion pa rehabilita. E motivacion tras di e fundacion aki ta esun mas fuerte cu por tin: e doño, Gino Frans, tabata un adicto su mes. Te cu Dios a yam’e y a sak’e di e bida ey. “Dios a liber’e pero tambe a dun’e un yamado pa yuda otronan. Asina tur cos a cuminsa”, segun Monica Frans, esposa di Gino.

E clientenan ta cuminsa nan dia pa 5:30am cu un oracion. Nan ta tuma un seccion di Bijbel cu ta pone nan cuminsa e dia comprometi y positivo. Despues nan ta come nan desayuno y cuminsa cu e trabao. Tur tin un descripcion di trabao y responsabilidad.

Vanessa Maduro, administrador y ayudo social, ta continua: “Pa merdia nos ta come hunto, nan ta drumi y pa 3:30pm tin estudio di Bijbel. Esey ta e programa pa dialuna te cu diabierna. Diasabra nan ta bishita nan famia. Ta obligatorio pa e famia bin busca nan y trece nan back. Si nos tin duda, nos ta haci test ora nan bin back pa check si nan ta limpi. Si no, nan ta cuminsa full di nobo, pero cu dobel e peso.”

Esey ta nifica e dos luna pa detox lo converti den cuatro luna. E periodo di detox ta nifica cu no tin contacto cu sociedad, no tin telefon, bishita, nada. “Prome cu bo cuminsa e programa aki, nos lo duna bo un siman pa prepara bo mes. Esey ta determina si bo ta realmente dedica. Bo mester scoge pa esaki completamente, de lo contrario, no lo funciona”, Maduro ta destaca.

Full di nobo

Un di e clientenan, cu tabata adicto na droga y alcohol, ta bisa: “Mi tabata fada cu mi bida, mi tabatin mester di un cambio, y si bo tin e boluntad bo por hacie. Tabata dificil na cuminsamento, pero bo ta bira miho na caminda.”

E ta sinti na cas na e fundacion, e programa ta dun’e un cuminsamento nobo y e sentido di ta util. “Ta manera un baby cu ta siña gatia prome cu cana, bo mester haci cos full di nobo. Mi ta stima di cuida e cabay y buriconan, un cabay di mi mes ta mi meta, y talbes hasta mi propio rancho. Mi ta mira un futuro.”

Hasta e ta un lider awo, ya cu e ta yuda clientenan nobo, y su persistencia ta haci e otronan mas fuerte. “Mi kier yuda, Dios a manda mi aki.”

Lasonan dichoso

Monica y Gino a cuminsa cu Fundacion Eliezer na Hulanda, pero Gino a sinti e necesidad aki na Aruba, y pues nan a cuminsa riba caya di e isla. “Nos no tabatin nada mas cu fe den Dios y nos a acerca e adictonan, esaki tabata na 2008/2009. Despues nos a conoce un adicto na alcohol cu a ofrece nos un cas grandi pasobra e tabata stima loke nos tabata haci. Stap pa stap e clientenan a confia nos, y mas a busca nos. Un a hiba na otro, y Dios semper a guia nos. E ubicacion aki tabata un bendicion. E doño Hulandes, Fred Wappenaar, ta kere den nos y a ofrece nos e tereno aki, nos ta increiblemente agradecido. E conexion cu animalnan, un molino di awa, pa ta autosuficiente, pa siña e clientenan cultiva y crece y cuida… esey tur ta parti di nos vision. Nos ta aki pa nuebe aña caba, y banda di Fundacion Eliezer nos a funda e Cunucu di Cuido La Posada.”

E fundacion no ta laga bay asina facil, despues di e averahe di seis luna cu clientenan ta keda, nan ta keda den contacto y yuda nan reintegra den sociedad.

Monica ta bisa: “Pero den futuro nos lo kier contrata nan nos mes como empleado di nos negoshi di hydroponics. No ta facil pa wordo contrata pa companianan ora bo tin un pasado asina. Aki sikiera nos no ta mira esey como un desbentaha. Nos ta kere den cambio.”

E fundacion ta coopera cu Movimiento Misionero Mundial.

E ambicion y motivacion di e fundacion aki ta inspirador, ya cu nan ta yuda cuida esunnan cu ya no ta mira un salida mas. Pa cumpli cu nan meta, Monica y Gino ta ricibi cualkier ayudo. Donacion, material di construccion, mueblenan, tur loke ta necesario.

Pueblo ta bon bini pa bishita e Care Farm, y haya un tour. “Na momento cu bo bishita nos aki, bo lo sinti e necesidad. Den casi tur famia tin un adicto.”

Si bo kier bishita e fundacion por fabor yama 561-3792 y puntra pa Gino of Monica Frans. Pa mas informacion por bishita nan website: https://eliezer-fundacion.jimdo.com of nan pagina di Facebook: Eliezer Fundacion.