Duna paisnan den Caribe e oportunidad pa yama atencion di e Minister di Husticia y Siguridad di Hulanda y crea un secretariado di Reino pa atende cu casonan di interes comun riba tereno di husticia y siguridad. Esakinan ta algun sugerencia yamativo cu e Asina AIV, Adviesraad Internationale Vraagstukken, AIV (organo di conseho pa problematicanan internacional) tin pa Gobierno Hulandes. AIV ta e Colegio di Consulta pa Gobierno y Parlamento Hulandes riba e tereno di Relacionnan Exterior y den su ultimo rapport, a formula un total di 10 recomendacion.

Sobrevivencia

Paisnan di Reino Hulandes hunto mester haci miho pa probecha di posibilidadnan cu Statuut ta brinda, pa ehecuta e responsabilidadnan estableci riba tereno di siguridad y mantencion di ordo na forma preventivo. Esaki ta rekeri un laso di cooperacion mas fuerte entre e paisnan, for di un punto di interes comparti pa un relacion di Reino cu por sobrevivi den futuro tambe.

Contacto interno fuerte

Vitalidad y resiliencia di Reino ta depende hopi di un comunidad di ciudadano, empresa y sociedad civil bon conecta internamente. Pero un sociedad civil na nivel di Reino no ta uno cu ta lanta di su mes. Representantenan di pueblo y gobiernonan di e paisnan di Reino mester intensiva nan contactonan interno, sali hunto mas biaha afo y motiva y sostene iniciativanan di comunidad.

Hulanda mas envolvi

Relacionnan di y den Reino mester haya mas prioridad den maneho di Gobierno di Hulanda, tnto riba e nivel ministerial como pa medio di intensiva e coordinacion interdepartamental den e conseho di Relacionnan di Reino. E desaroyonan di siguridad internacional ta rekeri un actitud di Hulanda cu ta mucho mas envolvi y activo, cu mester postula su mes cu mas responsabilidad comparti pa elaboracion di un plan social economico a largo plazo pa tur pais den Caribe.

Europa

AIV ta haya cu mester por spera di Reino cu e ta duna un contribucion mas grandi na promocion di mantencion di ordo y desaroyo duradero y inclusivo den Latino America y Caribe. E ta implica cu banda di nan propio esfuersonan, e partinan Caribense di Reino mester di e sosten Hulandes pa un maneho di region ambicioso y coherente den cuadro Europeo. Hulanda y e paisnan Caribense di Reino lo ta bon sirbi pa studia si relacionnan mas fuerte cu Europa ta brinda mas posibilidad.

Teamnan multidisciplinario

Henter e cadena di Siguridad den e paisnan Caribense mester haya un refuerso structural. Esaki ta relata na capacidadnan pa servicionan di recherche y inteligencia criminal. AIV ta kere cu mester tin un team di intervencion multidisciplinario riba cada un di e paisnan pa bringa criminalidad, pero alabes mester amplia e milicia di Aruba y Corsou.

Ademas mester duna prioridad na visibilidad continuo di Kustwacht y presencia di Marina Real, pa asina por actua basa riba cooperacion di intercambio di y dirigi pa informacion.

Marechaussee Real y otro integrante di Defensa por haya un papel di sosten mas amplio pa yuda cu mantencion di ordo riba tera, na frontera y provee sosten militar. Ampliacion di presencia di Defensa ta inevitabel.

Cooperacion Merca

Cooperacion estrecho riba siguridad (militar) cu e aliado mas importante den region, cu ta Merca ta y lo keda esencial, segun AIV. E ta rekeri si fortificacion di e contribucion na e organisacion contra combatimento di droga Mericano, esta e Joint Inter-Agency Task Force South, cu tin participacion di Francia, Reino Uni y otro paisnan den region. Banda di esey, tin oportunidad pa mas cooperacion den e grupo di trabou Caribense di e European Intervention Initiative y e Maritime Analysis and Operations Centre-Narcotics.

Tratado di San Jose

Reino Hulandes, como e iniciado mester pusha e paisnan cu a firma pero no ratifica e Tratado di San Jose. Ta trata aki e tratado cu ta regla e colaboracion pa bringa contrabanda di narcotica y productonan psicotico sea pa medio di transporte aereo of via lama. Un di e paisnan cu a firma ta Reini Uni. Tambe mester wak con pa stimula paisnan den e Comunidad Caribense pa drenta e tratado, pa asina por crea un reparticion geografico. Reino lo por intensiva e cooperacion riba areanan specifico manera comparti informacion, segun e acuerdo pa coordinacion di crisis y combatimento di desaster.

Proteccion medio ambiente

Hulanda mester duna e paisnan Caribense den Reino mas ayudo pa mantencion di e ecologia maritimo esencial, ampliacion di e capacidad di recuperacion contra efectonan local di cambio di clima y transicion na un economia mas duradero y diversifica. Esaki na interes di e economianan di e islanan. Militarnan Hulandes mester tene cuenta cu mester bay duna mas sosten na operacionnan di ayudo di emergencia den area Caribense, pa motibo di temponan extremo, hasta pafo di e temporada di horcan.

Secretariado di Maneho di Reino

E desaroyo internacional riba tereno di siguridad ta rekeri cu Conseho di Minister di Reino ta haya un papel mas importante den formulacion di maneho. Un condicion importante ta e creacion y institucion di un secretariado di maneho cu ta traha pa henter Reino. Asina aki, Conseho di Minister di Reino lo por tuma e prome paso pa un vision di Reino riba tereno di mantencion di ordo, cu ta algo cu garantia di estado di derecho ta exigi. E fundamentonan pa un vision y maneho asina lo por sali di e asina yama Justitieel Vierlandenoverleg, pero tambe palabracionnan riba otro tereno di maneho.

Institucion di Reino Derechonan Humano

Finalmente, Conseho di Minister di Reino ta e instancia indica pa drecha e buraconan y violacion riba tereno di mantencion di ordo y derechonan humano, si e paisnan den Caribe mes y den cooperacion interno, no tuma e medidanan suficiente. AIV como tal ta conseha pa laga crea un modelo basa riba un Rijkswet cu ta percura pa reglanan di transparencia di maneho y finanzas publico ta garantisa, y e creacion di un instituto pa promove derechonan humano pa henter Reino, cu ta similar cu e Principionan di Paris cu ta mundialmente acepta. E paisnan tambe lo laga Gobierno di Reino yama atencion di e Minister di Husticia y Siguridad riba e terenonan menciona, si no a mantene na e normanan cu ta internacionalmente acepta.