Como e autoridad di turismo di Aruba y en conexion cu e re-apertura di nos frontera, A.T.A. conhuntamente cu diferente organisacionnan turistico ta desea pa informa nos comunidad di e situacion actual pa loke ta trata e industria turistico, conforme informacion compila na e momentonan aki.
Trafico aereo
Debi na e ultimo desaroyonan pa loke ta trata e pandemia na Aruba mes, durante september 2020 Aruba a conta cu un subida den cantidad di casonan di COVID-19 activo. A anuncia cu nos destinacion ta wordo mira como code oranje pa Hulanda y relata cu esey tabatin ahustacionnan den e vuelonan, entre otro.
Conforme AAA (Aruba Airport Authority) e aerolineanan cu a trece bishitantenan pa nos isla durante luna di september tabata entre otro American Airlines – Jetblue – Delta Airline – United Airlines – KLM, Air Century y Spirit. Ademas tabatin vuelonan di repatriacion cu a sali durante luna di september pa entre otro Venezuela.
Turismo ‘stay-over’
Durante luna di september 2020 nos isla a yama bonbini na un total di 14.697 bishitante ‘stay-over’. Di e bishitantenan aki, 13.576 tabata procedente di Norte America y 784 tabata procedente for di diferentepaisnan Europeo. 337 bishitante tabata procedente di otro pais/islanan den region. Mester tene na cuenta cu ainda e fronteranan cu Latino America ta cera pa Aruba – di cual nos ta spera un re-apertura pronto.
E bishitante y acomodacionnan
61.4% di nos bishitantenan a keda na un hotel y 35% a keda na un di nos timeshare resorts. 19.7% a keda den acomodacionnan alternativo. Tin un shift notabel den e tipo di nos bishitantenan unda por mira cu 65% (9.608 en total) di e turistanan a bishita nos destinacion pa prome biaha y 33% (4.777 en total) ta ‘repeat visitors’. Aki 2% (312 bishitante) no a specifica esaki y no a wordo inclui den e resumen. E edad di mayoria di nos bishitantenan durante luna di september tabata entre 30 pa 39 aña (3.744) y entre 50 pa 59 aña (2.850).
Turismo crucero
E industria di crucero a paralisa desde inicio di e pandemia y ainda no tin fecha concreto riba reinicio di operacion den e region di Caribe. E industria ta pendiente pa CDC (Centers for Disease Control and Prevention)aproba e recomendacionnan di e protocolnan relaciona cu COVID-19 pa barconan di crucero. E operacion di crucero ya a cuminsa den region Mediteraneo bao di e protocolnan aproba pa Union Europeo. Esaki ta bayendo bon y ta spera cu pronto CDC por duna aprobacion pa asina por re-inicia turismo di crucero pa nos region y pa nos isla ya cu e impacto economico ta fuerte.
E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na cu momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. Mester menciona cu no tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.
Tourism credits / Central Bank of Aruba
Di acuerdo cu Banco Central e asina yama ‘Tourism Credits’ (cual anteriomente tabata wordo yama ‘Tourism Receipts’) pa e prome kwartaal di aña 2020 a contribui cu Afl 1.017.9 miyon den nos economia, cu ta 7% menos compara cu e mesun temporada na 2019. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2020.
Mescos cu otro destinacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla y su turismo lo sigui florece.
