Siman pasa a celebra, mas tanto den silencio, e fecha riba cual e pais ‘Antiyas di 5’ a stop di existi, y a surgi tres teritorio insular cu un relacion directo cu Hulanda, y dos isla mas cu a haya e status di pais den Reino, manera Aruba tin desde 1986. En general e tono di e comentarionan no tabata di fiesta, mas bien di decepcion pa e desaroyo deplorable di e islanan despues di e fecha ey.

Esey no ta straña nos pa nada, aunke nos no ta comparti e opinionnan manera por ehemplo reuni den un publicacion di e site koninkrijk.nu cu a pidi varios politico di e islanan y Hulanda pa duna nan punto di vista riba e tema. E resultado ta un publicacion cu ta vale la pena lesa. E publicacion, yama “Koninkrijk op Eieren” ta obtenible via e website menciona. E opinionnan vocifera no ta varia tanto di loke nos ta tende durante henter e 10 añanan aki, sin cu ta mira tanto mehoracion na e islanan, ni den sentido economico, ni social, ni financiero. Loke di nos banda por bisa cu nos ta mira como un desapunto ta cu no ta mira tanto avance den loke ta propone di e diferente bandanan pa mehora. Di banda di Hulanda e posicion ta varia entre demasiado cautela den trata asunto cu e politiconan di e islanan, te na un posicion un poco exagera cu ta stimula solamente un reaccion fuerte di banda di e politiconan isleño. Di e banda di e politiconan di e islanan ta parce cu e motivacion mas importante ta e preocupacion cuanto ‘autonomia’ nan por perde eventualmente, den cualkier accion cu Den Haag ta tuma, como legitimo supervisor. Loke practicamente ta keda sin discuti ta e berdadero corelacionnan di poder dentro di Reino, y pakiconan ta asina.

Di banda di e islanan ta remarcable cu ta keda pone enfasis riba e hecho cu supuestamente Hulanda ta fayando den su obligacion pa completa e ‘zelfbestuur’ di e islanan, pa yega na termina e fase di ‘dekolonisatie’ y ta parce cu nan ta carece e madurez di reconoce cu nos a scoge pa e structura cu Reino Hulandes tin, pa un motibo obvio. Esey ta cu, mas cu den añanan 50 di siglo pasa, ta visto cu e islanan no por sobrevivi den e mundo aki riba nan mes. Pa e islanan ABC independencia ta un opcion imposible, pasobra si acaso nan bira independiente, lo no ta pa tanto tempo. Nos no mester di ripiti aki e argumentonan usa pa gobierno di Aruba mes, pa boga pa permanencia den Reino Hulandes, cu completo aprobacion di e poblacion.

Sin embargo, ora nos ta scoge voluntariamente pa permanece dentro di un structura mas grandi cu nos mes, mester ta logico tambe cu nos ta acepta e reglanan di wega den e entidad ey. Aki ta unda mayoria di politico riba nos isla lamentablemente ta keda keto, envez di reconoce cu nos no por kere di ta parti di Reino Hulandes, sin compromiso. Anto di otro banda, manera a sucede ora Covid-19 a cay aden, inmediatamente a cuminza, na un tono insolente, exigi di Hulanda pa cumpli cu nan “deber di yuda nos”. Nos politiconan lo tabatin algo di razon si nos situacion tabata uno di gran prosperidad, cu un gobernacion impecable cu ta cumpli cu tur norma cu ta existi, tambe den maneho y implementacion di e tratadonan internacional na cual nos ta someti. Nos tur sa cu esey no ta asina, y esey no ta fruto di Covid-19. Den caso di Aruba nos tabata para caba na rand di e abismo financiero y tin 5 aña bao di supervision di Reino, deficiente y ineficiente, pero en principio lo corecto pa haci.

Ta alegra nos cu den un reciente conseho di Adviesraad Internationale Vraagstukken (AIV), yama “Veiligheid en Rechtsorde in het Caribisch gebied” di cual den e edicion aki tin un resumen, nos por a nota un par di observacion cu ta na nan lugar, entre otro esun aki: ” Sensitividad post-colonial y interpretacionnan limitante di e Statuut, adapta na 2010, ta parce di ta ser emplea tanto pa Hulanda como e paisnan den region di Caribe pa enmascara e falta di voluntad politico. Toma di decision cu demasiado poco diligencia den Conseho di Ministro di Reino ta tene insuficiente cuenta cu deseo di e poblacion riba e islanan cu ta harta di (“die schoon genoeg hebben van”) corupcion y un desigualdad creciente.” Nos ta completamente di acuerdo; esaki ta toca e curazon di e asunto: Gobierno di Reino mester atende interes di e ciudadano Hulandes riba e islanan, no di e politiconan cu semper ta buscando cualkier pretexto pa sali di cualkier supervision, hasta si nan ta viola interes di e ciudadano Hulandes cu nos tur ta, banda di ta Arubano. Reino (Hulanda) tin un responsabilidad pa bon gobernacion pa su ciudadanonan, tur su ciudadanonan…

E Conseho ta remarca tambe cu no ta mira cambio necesario den Statuut, pero lo desea di mira un “practica radicalmente diferente”, cu mas colaboracion entre e paisnan den Reino. No tin nada di celebra, no na e otro islanan, ni cerca nos. Loke mester ta e berdadero voluntad di mehora e lugar aki. Nos no ta mir’e, ainda.