Jan van Nes di AFBA: Prolongacion di ayudo sin nada concreto ta crea mas incertidumbre

Jan van Nes di Aruba Food & Beverage Association (AFBA) hunto cu representantenan di otro gremio comercial, a bin vociferando nan preocupacion cu nan respectivo sector ta pasando aden pa logra sobrevivi contra e impacto socioeconomico cu Covid a produci riba nos isla.

E perspectiva ta scur, aunke van Nes a declara cu nan kier mantene mas positivo posibel, pero cada dia nan ta na expectativa di kico esaki lo trece pa nan. Pero e realidad ta otro! Sin e loon subsidie y sin e ayudo financiero di 4 mil florin cu e negoshinan ta hayando, dificilmente nan por sobrevivi. Nan ta yuda minimalisa un poco nan perdida operacional. Ya caba den e area di Palm Beach ya tin varios negoshi reconoci cu no ta operacional mas.

Na momento cu no tin mas subsidio di salario mas negoshi lo sigui e caminda aki. Pues si un compania no por existi sin ayudo financiero e tin cu bay failliet. “Pasobra pa cuanto tempo bo por mantene esaki?,” el a bisa

Gran incertidumbre

E ta haya cu pa nos isla e gran incertidumbre ta cu nos ta wordo confronta cu e instabilidad cu e ayudo aki ta wordo prolonga pa un luna. Despues e ta wordo prolonga pa otro luna y no tin nada concreto.

Awor nan ta tende cu FASE y subsidio di salario ta bay te december. Pero e incertidumbre ta cu si e ta bay te fin di aña, pero di otro banda, ocupacion den sector hotelero toch ta relativamente hopi abao, programa alrededor entre 30% pa 40%. Ta di imagina cu e negoshinan cu ta logra pasa e linea pa otro aña 2021, y si pais Aruba no tin niun areglo financiero, e negoshinan tin cu pensa riba un escenario bastante scur nan dilanti.

Encuanto si e prolongacion pa gobierno di Aruba firma un acuerdo cu Hulanda, ta un acto iresponsabel cu por pone den riesgo sobrevivencia di hopi negoshi y logicamente puesto di trabao. Van Nes ta kere cu e posicion di Hulanda ta varios. Aruba tin un Master Plan ariba mesa, pero e no ta bay sin mas, ya cu semper lo tin su reaccion bek. Pero si van Nes ta mira cu Hulanda ta dispuesto pa financia y yuda nos pa ehecuta e Master Plan cu ta hopi necesario. “Y banda di esey ta necesario pa Hulanda por duna nos respaldo financiero pa nos por sobrevivi pa e proximo aña,” el a expresa.

Autonomia

Encuanto e tema di autonomia, e ta puntra su mes cual pais na mundo aworaki ainda ta autonomo? “Ni Hulanda ta totalmente autonomo pa hopi areglo e ta depende di Bruselas, y e ta depende di Union Europeo(UE).” El a señala cu e tipo di discusion aki ta wordo haya hopi biaha den Parlamento Hulandes cu si nan ta realisa cierto acto, nan ta keda sin e derecho di por ricibi, siendo parti di UE.”

E ta haya cu esaki ta trece na e siguiente reflexion: Kico ta autonomia? Den nos caso e por bisa cu nos ta pleitando pa nos autonomia, pero si despues bo tin un economia cu ta na werki. Bo tin un economia cu practicamente ya no ta existi mas, ‘anto e balor di e palabra autonomia ariba dje, nos mester reactionering.’

Ayudo financiero

Aunke nan por a tende di gobierno cu nan a prolonga e ayudo financiero te fin di aña 2020, pero e hendenan cu ta den FASE, ya nan ta wordo ‘afgeschreven’ caba. Si den caso cu no tin trabao e persona su subsidio di salario ta wordo retene. Y si nan no tin subsidio di salario, e ta premira cu nan lo haya despedida of areglonan masal.

A base di un encuesta cu AFBA a realisa entre nan miembronan un 16% di nan a bisa cu sin loon subsidie nan tin reserva pa dos luna; y un 9.5% tin reserva pa un luna. Mayoria di nan a contesta cu sin loon subsidie, nan lo tin cu cera nan restaurant.

El a retira cu sin ayudo financiero mas di un negoshi no lo sobrevivi. Sinembargo bao e circunstancia actual, lamentablemente nos a custumbra cu nos tin 6 luna den e situacion aki y pronto lo bira shete luna. “Hopi hende por pensa cu si nos a sobrevivi shete luna, kisas e situacion no ta di e grave ey,” el a bisa. Ya cu nan por pensa cu si nan a logra sobrevivi e lunanan aki, nan por sobrevivi e tres luna mas cu ta resta di 2020. Pero e ta haya cu no mester lubida cu si no ta pa e ayudo di cada kwartaal di ayudo financiero entre otro di subsidio di salario, hopi di nan no lo sobrevivi.

Prestamo

E mesun encuesta a revela cu mayoria di nan no lo acerca banco pa un prestamo. E ta resulta un risico grandi pa un doño di negoshi crea mas debe financiero pa sigui sobrevivi den e contexto actual.

Van Nes a bisa cu un 3% so a bisa cu nan lo acerca banco pa prestamo, locual ta hopi abao. Nos ta den un ambiente di halto riesgo y poco restaurant por acerca un banco, sin cu nan tin un entrada a base di benta cu nan por cumpli cu nan debe. E ta kere cu e unico forma cu aworaki bo por bay un barco ta si bo ta pone como garantia bo propiedadnan.

Pero sector bancario ta consciente di mira cualkier negoshi, y mas ainda restaurant, como uno di halto risico. “Sabiendo esey hopi di nos restaurantnan a contesta cu realmente nan no acerca un banco, pasobra practicamente bo sa e contesta…”

Medidanan

E ultimo desaroyo di Covid na Aruba, unda nos a surpasa e cantidad di caso, a haci cu gobierno a bin cu medida di toque de queda unda nan mester cera mas tempran. Nan tin comprension riba gobierno nan medidanan, pero esaki tabatin su impacto caminda masha hopi restaurant a haya su mes cu nan benta a cay drasticamente. Danki na e loon subsidie nan ta sobreviviendo ainda. E no por imagina si e ayudo aki cay afo, un realidad mas duro lo drenta. E lo ta un realidad lamentabel caminda negoshinan mester cera nan porta, y tambe hopi hende lo perde nan trabao.

Finalmente, Jan van Nes di AFBA ta kere cu nos mester cumpli cu tur e protocolnan y purba di sali for di code oraño y code cora cu no ta bon pa nos. Aruba su nomber mester disparce for di e lista cu ta restringi e fluho di bishitantenan.

Pa loke ta Aruba mes, nos mester bira mas disciplina den e sentido cu e virus aki ta algo cu no ta bay disparce pronto. Nos tur mester ta consciente -segun Sr. Van Nes- cu e situacion aki por dura 1 aña te hasta kisas 2 aña. Tur esaki prome cu nos por papia ainda di un situacion normal, y den esey nos mester por duna tambe, el a laga sa.