Loke tabata anticipa caba, a sucede: lo tin un partido nobo bao liderazgo di ex-ministro Otmar Oduber. Kico esaki por significa den proximo eleccion, ta keda un pregunta. Un persona fuerte so no ta haci tanto diferencia. Mester di mas candidato fuerte cu ta representa algo den comunidad, o cu tin cierto atraccion basa riba: kico realmente? E mundo rond di nos a evoluciona lagando atras e diferencianan ideologico di siglo pasa. Ningun hende awendia ta puntra kico ta e ideologia di un partido, kico ta loke ta trece nan hunto como asociacion. Pero no ta parce cu e ideologianan ey ta haci falta, sigur no si e principionan pa cual un partido ta bisa cu e ta bogando, den practica no ta mira mucho di esey. Mas ainda den situacionnan extremo unda ideologia ta bira mas bien un pantaya pa sconde e abusonan mas grandi cu ta existi. Manera e situacion cerca nos bisiñanan, unda bao di e bandera di socialismo, igualdad pa tur ciudadano, etc., a comete e robo mas grandi den historia di America Latino, lagando e pueblo desampara, sin cuminda, sin medicamento, sin trabao, sin futuro. Felizmente nos miembresia di Reino Hulandes no ta permiti nos cay den e tipo di situacion ey.
Sin embargo, cada partido o movimento tin un pensamento central cu ta sirbi como guia den nan practica. Durante e rueda di prensa di ayera nos no a tende tanto riba e pensamento comun ey ainda. Esey no ta implica cu e futuro lider no a amplia riba kico por ta e linea central pa futuro. Den su concepto, e lo enfoca riba esunnan cu ta sinti nan mes laga atras den e desaroyo cu Aruba a pasa aden. Riba su mes un bon punto di salida. El a menciona algun di e gruponan ey den comunidad.
Manera por ehemplo e hobennan cu ta bay studia y parcialmente no ta bolbe, parcialmente si pero cu problema pa haya nan caminda aki. Esey ta un realidad grandi, pero tin otro angulo pa contempla e fenomeno aki. Ta conoci cu un parti grandi di esunnan cu bay afo, no ta bolbe o no ta bolbe cu un diploma den nan man. Ta dificil pa nos haci nos preocupacion e bida di hende cu a busca nan mes caminda na otro luga; esey ta pasa tur dia tur parti di mundo. Esunnan cu bolbe, cu un diploma, no tin garantia di trabao pasobra hopi ta depende di kico nan a studia y si den e mercado chikito cu nos tin net na e momento ey tin un cupo pa nan.
Di otro banda, nos no por bisa, y Otmar Oduber tampoco, cu e gobierno di cual el a forma parti tanto aña, no a haci un tremendo trabao caba pa emplea mas tanto hende posibel, den e departamentonan pero mas ainda na e despachonan di ministro mes, plus e creacion di entidad estatal ‘independiente’ cu ta excelente luga pa almacena hende cu tin compromiso politico cu e ministro concerni. Kico ta anto e proposito? Cu nos ta bay mira mas di e fenomeno aki, pa esunnan cu ta join su partido?
El a menciona tambe gruponan manera hoben, hende incapacita, diferente grupo cu ta depende di ayudo special cu no facilmente por organisa como proyecto priva. Ta p’esey tin gobernacion. Y ta exactamente eynan cu nos ta mira e fayonan grandi di e gobierno di cual el a forma parti tanto tempo. Laga hende biba den apartamento y crea e ilusion cu nan tur ‘algun dia’ lo logra traha nan propio cas. Propaga cu nos mester haci mas pa nos hobennan den dificultad y corta presupuesto di practicamente tur fundacion cu ta opera riba tereno social. Y pakico? Pa por sigui tene otro grupo contento, manteniendo un aparato gubernamental cu a bira impagabel, pero no ta existi e curashi pa cuminsa haci algo.
Di otro banda, a desmantela e departamentonan cu mester controla sector priva, na luga di duna e empresario honesto un man den su lucha contra competencia desleal di esunnan cu no kier cumpli cu nan obligacionnan como empresario y como dunado di trabao. Haciendo posibel tambe cu un grupo privilegia no mester preocupa cu paga belasting y ta biba super bon. Percurando tambe cu no tin un control adecua riba nos fronteranan ni den nos empresanan, permitiendo cu abuso na gran escala por a tuma luga cu trahado local y stranhero por igual. Esey tambe por bay drecha cu su partido den gobernacion? Pasobra esey mester sucede, si bo ta bisa cu bo kier mas igualdad.
Sin embargo, nos ta contando di unda Otmar Oduber ta bin, y no necesariamente unda e ta bay den futuro. Tur hende por tin un ‘fresh start’, si e tin e intencion di mehora e cosnan pa cual el a bisa cu e no ta reconoce su mes mas den e partido cu el a bandona, sigur cu e por haya e oportunidad di demostra esey. Mescos cu tur otro partido, grandi o chikito, bieu o nobo, e votado mester husga a base di loke nan ta bisa cu nan por y ta bay haci.
