Minister di Enseñansa, Ciencia y Desaroyo Sostenibel, Armando Rudy Lampe: ‘No ta corecto pa perhudica mucha pa motibo di debe financiero’

Durante un sesion informativo riba su pagina di Facebook, minister di Enseñansa, Ciencia y Desaroyo Sostenibel, Armando Rudy Lampe a aclaria algun preguntanan cu ciudadanonan a haci relaciona cu algun tema cu tin di haci cu enseñansa, entre nan e pago di schoolgeld.

Pa cuminsa, a trece dilanti pago di schoolgeld mirando e crisis cu Aruba ta pasando na e momentonan aki, si esey lo mester tuma luga of no. Pa cu esaki minister hende sin trabou y por lo tanto schoolgeld ta bira un peso grandi.

P’esey departamento di Asunto Social ta dunando un man na e famianan cu tin un dificultad y por haci un peticion pa ayudo di schoolgeld. Ademas el a sigura cu tin hurisprudencia riba e topico aki y tin algun mayornan cu a bay corte. E resolucion ta cu aunke enseñansa ta gratuito na Aruba, e directivanan di scol por pidi contribucion pa actividadnan extracuricular.

Ademas Lampe a menciona cu scolnan por pidi contribucion pa aircogeld, entre otro gastonan cu mayornan tin cu paga y cu no mester perhudica un mucha pa motibo financiero. P’esey nan a dialoga cu algun directivanan di scol for di aña pasa, cu no ta corecto cu pa motibo di debe financiero e mucha no por haya rapport of no por haya diploma. “Den casonan asina mester yega na un areglo di pago entre mayornan y scol, pa no perhudica e mucha den su desaroyo”, el a sigura.

Tambe Lampe a relata cu pa loke ta trata landamento escolar, e programa aki ta bay sigui den scol preparatorio y e meta di dje ta pa defende y scapa bida di muchanan den awanan di lama.

“E unico cos cu ta cambia ta cu en bes di hay’e den derde klas, nos lo pone den kleuterschool”, Lampe a informa.

Di mesun manera, el a papia di e actual discusion cu tin cu directiva di Colegio Arubano. El a splica cu den anterior directiva SVOA, cu su antiguo statuutnan dianan pasa a cambia, na unda tabatin un representante di e directiva ey, algo cu Lampe a señala cu esey ta un iniciativa di diocesis di Willemstad.

Esaki ta pa motibo cu mas cu 50 aña pasa iglesia catolico a funda Colegio Arubano cu tabata e prome scol secundario di Aruba, cu e idea di forma futuro lidernan di e nacion aki. Lampe a expresa cu despues di mas di 50 aña nan ta mira cu diocesis di Willemstad y su obispo a haya su mes den un conflicto cu e anterior directiva SVOA no tabata kier obedece e obispo y a entrega nan retiro.

Esey a pone cu obispo di Willemstad a bisa cu ta retira e ora ey e identidad catolico. Na e momento ey a manda un carta pa minister di Enseñansa y bisa cu ta retira e obispado di Colegio Arubano y a base di esaki, minister y Gobierno di Aruba a sigura cu no tabatin otro opcion sino retira e subsidio.

Na e momento cu Lampe a wordo informa di esaki, nan a retira e subsidio di Stichting SVOA y a base di esey e anterior directiva a bisa cu no por sigui maneha scol mas sin subsidio y a dicidi di retira. Despues di diferente deliberacion, obispado a haya full autoridad back na Colegio Arubano y den e directiva y a base di esey a restitui e subsidio y asina Colegio Arubano ta sigui draai.

Siman pasa riba iniciativa di obispado, Lampe a comunica e cambio di statuut, pa motibo cu a base di esey a restitui e relacion di subsidio cu Colegio Arubano. Y e obispo ta haya tur poder pa nombra tur miembro di directiva di Stichting SVOA.

Ta p’esey cu no por tin representante di niun organisacion mas den e directiva, tampoco di gobierno ni di minister. Pa e motibo aki OCCA tambe a keda sin representacion. Di esaki, el a sigura cu e ta kere cu ta un decision logico di parti di monseñor Secco, pasobra si e relacion di subsidio ta pasobra e ta un scol catolico, ta logico cu e autoridad catolico ta esun cu ta nombra su representantenan.

“No ta trata di diferencia di opinion entre OCCA y obispado, sino cu nos tur mester mustra comprension riba e obispado su decision.” Asina mes, el a expresa cu e participacion di OCCA ta valioso.