Despues di FASE lo bini programa “Aruba Kier Traha”: Gobierno a prolonga FASE te december, pero mester registra cada luna

Ayera tardi, minister di Labor y Asunto Social, Glenbert Croes, a anuncia cu Conseho di Minister a aproba di prolonga e ayudo di FASE pa e lunanan di october, november y december.

Pero bo mester registra tur luna pa haya e ayudo aki y e registracion ta cuminsa dialuna awor. E mandatario a bisa cu nan ta realisa cu e di dos ola di e coronavirus aki a dal Aruba mas duro cu esun prome. “Niun no a spera e golpi grandi di e di dos ola,” el a bisa.

E anuncio aki a wordo haci den cuadro di e firma di un acuerdo entre gobierno di Aruba y fundacion Ambiente Feliz cu a wordo apodera pa maneha e Centro di Cuido pa muchanan special cu ta den un situacion vulneral y cu ta rekeri di cuido y atencion compleho den caso di emergencia. E acto di firmamento aki a tuma luga den presencia di diferente instancia di tereno social.

Minister Croes a bisa cu esaki lo ta e ultimo biaha cu nan lo prolonga e ayudo di FASE. Pero esey no kiermen cu na januari 2021 pa dilanti, esun cu ainda no tin niun sorto di entrada, no ta bay tin nada.

El a agrega cu tur e ministerionan ta trahando riba un programa cu nan a yama: Aruba Kier traha. “Nos ta realisa cu ora FASE caba y loonsubsidie tambe ta bay terminal gradualmente, ta bay tin hopi hende cu ta bay ta sin trabao y sin entrada,” el a bisa.

E decision aki pa sigui duna FASE te december a wordo tuma a base di un recomendacion di Parlamento, specificamente for di fraccion di MEP riba e necesidad pa mantene e ayudo aki pa tres luna mas. El a reuni cu e team social y ayera tardi el a haci un recomendacion pa gobierno bin cu e prolongacion aki.

Sinembargo tin algun cambio. Tur hende cu ta den un situacion cu nan a perde trabao of entrada ta bay tin e oportunidad pa haya FASE, pero e mester aplica pa cada luna cu e no tin entrada ainda. Minister Croes a indica cu nan mester aplica den e prome 10 dia di trabao di cada luna. Esaki tambe ta conta pa comerciantenan independiente. El a bisa cu e pago di e ayudo di augustus y september pa comerciante independiente, esaki ainda lo wordo paga.

E mandatario a sigura cu durante e crisis di Covid-19 cu nos pais ta aden, gobierno no ta bay laga niun hende si entrada. Nan lo bin cu un programa unda for di 1 di januari pa dilanti bo por keda cobra 950 florin. Pero e persona ta bay firma un contract, unda bo ta crea e compromiso cu bo ta bay tuma curso di capacitacion pa haya e ayudo aki.

Ademas bo ta obliga di participa den e curso di capacitacion a base di e realidad nobo. Dor di e situacion di desempleo nan ta evalua e tipo di puesto di trabao cu ta bay keda disponibel riba e mercado laboral local pa e persona por haya e capacitacion necesario pa bo por haya un trabao.