Segun resumen di Departamento di Salubridad Publico ayera pa e situacion di Covid-19 riba nos isla, por a nota cu a registra tres fayecido mas pa e malesa.
Departamento di Salubridad Publico, DVG a informa cu e cantidad di fayecido a yega na 30 ayera, compara cu e 27 e dia anterior. Ta manda palabra di condolencia na e famia y sernan keri di e fayecidonan.
Ademas, DVG a informa cu a registra 40 caso nobo di Covid-19 ayera, di cual tur ta residente, pa un tasa di positivo di 27%. Ayera a realisa un total di 298 test, di cual 152 a ser haci bao di residentenan na laboratorio di hospital.
Tambe 79 persona mas a recupera di e malesa, mientras cu e cantidad di casonan activo a keda reduci cu 42 y a keda na un total di 602 caso.
Di su banda, hospital ta informa cu tin den total 33 persona interna. Di esakinan, nuebe ta den unidad di cuido intensivo, mientras 24 ta isola riba piso general.
Ademas, Hospital a comparti un grafico cu ta duna informacion tocante e evolucion di e malesa na Aruba. PR di Hospital, Charlaine Huntington, a splica cu riba e grafico por mira e casonan activo na Aruba desde dia 8 di augustus ultimo te cu ayera den color oraño. Tambe por mira e total di pashent admiti na Horacio Oduber Hospital te cu ayera riba piso pa pashentnan di Covid-19 den color blauw. Finalmente, por mira e pashentnan cu Covid-19 cu ta rekeri asistencia respiratorio (beademing; optiflow of intubatie) den color berde.
Mientras tanto, ayera nochi Crisis Team a duna di conoce cu pa e fin di siman aki no tin cambio den e medidanan na vigor pa cu Covid-19. Mirando cu no tin informacion nobo, no tabatin necesidad pa tene un conferencia di prensa ayera diabierna dia 2 di october, sino cu esaki lo tuma luga dialuna proximo, pa duna informacion tocante e maneho y ultimo desaroyonan pa cu Covid-19.
