Dialuna ultimo, Aruba a haya un noticia hopi tristo den oranan di anochi, na unda medionan local tabata informa e fayecimento di un ciudadano di nacionalidad Colombiano, di nomber Wilson Peña na e localidad di Sero Pita.

Por a compronde di parti di Cuerpo di Polis di Aruba, segun loke nan a comunica, cu “pa 10or di anochi, patruya di Santa Cruz ta wordo manda na un cas na Sero Pita pa un hende homber agresivo y kibrando cosnan den cas”.

Na yegada di patruya ta pidi pa refuerso di un otro patruya, “na dado momento e persona lo mester a bin pa ataca e polisnan na unda a saca e arma reglamentario y a los tiro”.

E homber en cuestion a wordo alcansa y na unda a pidi ambulance cu urgencia, na yegada di ambulance lamentablemente no por a haci nada mas, Dr. Texier ta constata morto di e meneer W.P.B. naci na Colombia di 48 aña di edad.

Bon Dia Aruba a tuma contacto cu e famia di Peña pa haya sa nan banda di loke a sucede dialuna pasa, pero pa via di e dolor cu famia ta pasando na e momentonan aki nan a dicidi di manda un comunicado pa prensa. Den dje nan ta expresa nan mes riba e tristo incidente aki, mirando cu segun nan a sigura, algun medionan di comunicacion a skirbi nan version speculando riba e suceso cu no ta cuadra cu e berdad.

E comunicado ta declara cu pa mas o menos 10or di anochi nan a yama polis pa asistencia pa papia cu nan tata, ken tabata bou di influencia di alcohol. E yamada tabata pa por fabor nan bay na Sero Pita, pa motibo cu nan tata tabata fastioso y birando agresivo verbalmente na cas. “Niun momento nos tata tabata destruyendo cosnan den cas manera vocero policial a duna di conoce den su entrevista”, nan a enfatisa.

Pa mas o menos 10or y 10 minuut, agentenan di polis a presenta na nan cas, pa ser exacto 2 unidad di polis, cual 4 polis a yega hunto (1 patruya di auto y 1 dog catcher).

Asina mes e famia a splica cu e polisnan a drenta na nan cas for di porta di sala. Den sala nan a topa cu nan mama sinta, e mama a cana bay cu e polisnan patras den porch, area unda cu nan camber ta situa. Peña tabata den camber na e momento ey pa wak TV.

Di mesun manera, nan ta conta cu 3 polis a drenta den camber, 1 a keda para na e porta. Nan a pidi Peña pa lanta for di cama pa nan papia pafo. Peña a puntra nan: Kico boso ta haci akiden? E 3 polisnan a keda insisti pa e lanta pa nan bay papia pafo cu Peña, cu finalmente a lanta for di cama y e polisnan a sali for di e camber pa atende cune.

Pero e famia ta manifesta cu na ningun momento Peña no a sali for di e camber y stap pafo den e area di porch. Henter e momento e la keda para na su porta di camber. Polisnan a pidie pa bira pa nan bay cune na warda di polis pa loke Peña a nenga rotundamente y a bisa cu e no lo bira pa nan bay cune.

Finalmente despues cu polisnan a keda insisti, Peña a bisa nan di warda un rato pa e bisti su T-shirt. Famia ta remarca cu na e momento aki ta na unda cu di biaha un di e polisnan a grit’e y bis’e: “NO bo ta keda eynan.” Pero como Peña tabata para den su porta di camber, e la bira y cera e porta di biaha. Nan a sigura cu banda di e porta paden e tabata tin e boter di alcohol cu e tabata bebiendo di tempran. “Ora cu e la sinti e polisnan ta bati y pusha na e porta pa drenta e camber pa sak’e pafo ta caminda cu Wilson a kibra e boter y a keda cu e pida di e boca di e boter kibra den su man”.

Den e mesun comunicado ta bisa cu para dilanti su porta di camber pa ser exacto 10or y 14 minuut, 5 tiro a sali tras di otro sin ningun advertencia y sin ningun palabra cu polis por a dirigi na dje. Ningun momento Peña haya chens pa ataca e polisnan manera vocero policial a indica, segun e famia.

Nan ta afirma cu e tironan cu a cay tabata di 2 diferente polis; di e 5 tironan e resultado tabata fatal hasta mortal, di su bariga bin ariba. Tur esaki a sucede den presencia di su 2 yiu y su casa, cu tambe por a wordo alcansa.

“Na mesun momento cu Wilson a wordo tira, e la cay abou. Eynan ta momento cu un yiu homber a grita e polis: ‘Kico bo ta haci, dicon bo ta tir’e?’ E yiu homber a mishi cu schouder di e polis p’e stop di tira y eynan e polis a punta e pistol riba e yiu homber tambe, na direccion di su bariga. E polis tabata tembla y tabata hopi spanta, sin sa kico pa haci, e yiunan a cuminsa grita pa yama ambulance.”

Igualmente nan a bisa cu e polisnan presente no a yama ambulance prome, pero mas bien nan a yama pidi refuerso, cu “na ningun momento nan no a core pidi pa ambulance manera vocero policial a menciona den su entrevista na e luga di e suceso”.

Pa finalisa, nan ta haci diferente pregunta pa Cuerpo di Polis di Aruba y Ministerio di Husticia, por ehemplo: Na ki momento un polis ta yega na e derecho pa kita un ser humano su bida? Ki ora si? Ki ora no? Despues di 4 dia ainda nan como famia no tin contesta pa e preguntanan cu nan a haci, ki dia nan lo tende y of lesa e declaracionnan haci door di e polisnan. Ainda nan como famia no por despidi di nan tata pa asina e por bay sosega na paz, ki dia nan lo haya contesta pa nan preguntanan?

Di otro manera nan ta puntra kico ta ser haci pa un departamento asina importante di Isla Aruba y cu pueblo ta depende completamente di un cuerpo policial pa para banda di e pueblo pa defende, cuida y proteha tur den cualkier situacion. Ora un caso di e manera aki ta present,a na ki momento nan por usa nan arma di candela si e otro persona no tin igual? “Nos tin un maneho y/of structura cu ta bisa prome stap 1 despues stap 2 y si no logra stap 3 y tira? Nos famia ta desea un splicacion y un aclaracion riba e uso di arma di candela desproporcional manera nan ta bisa pa nan defensa propio of ora nan sinti nan mes di a wordo ‘menasa’ pa nos tata. Ki dia nos lo haya husticia?”

Bon Dia Aruba tambe a tuma contacto cu Ministerio Publico pa haya informacion si e investigacion a cuminsa caba y con ta bayendo cu e proceso aki. Vocero di Ministerio Publico, Ann Angela a comunica cu efectivamente e investigacion ta andando y Landsrecherche ta encarga di dje.