Comando Sur di Merca (SOUTHCOM) a haci un donacion di $50mil pa Corsou pa paketenan di cuminda cu lo duna sosten na famianan afecta negativamente pa Covid-19.
Personal y famia di Consulado General Mericano na Corsou y e US Air Force Forward Operating Location a haci trabao boluntario na Banco di Cuminda pa pakete a alrededor di 1,100 pakete di cuminda.
E catalista pa e proyecto aki tabata e candela na e facilidad di almacenahe di Cruz Cora di Corsou, cu a destrui ekipo importante y aproximadamente 250 pakete di cuminda dia 28 di mei ultimo. Consulado General Mericano na Corsou a traha cu SOUTHCOM pa identifica y ehecuta un Proyecto di Asistencia Humanitario.
Dia 25 di september, personal y famia di Consulado General Mericano y personal di US Air Force Forward Operating Location (FOL) a haci trabao boluntario pa paketa esakinan na e Banco di Cuminda. “Hamber no ta mira color ni credo, y ta e responsabilidad di hende bon pa alivia e dolor aki. Den nomber di pueblo Mericano, mi ta encanta cu nos por haci e gesto di sosten aki. Merca a mantene un presencia aki na Corsou pa 227 aña. Durante e añanan aki nos a pasa den hopi temporadanan dificil hunto, como tambe temporadanan prospero. Nos lo sobrepasa e pandemia aki. Nos lo sigui busca forma pa traha hunto como partner y amigonan”, consul general Allen Greenberg a bisa.
Consulado General Mericano na Corsou y SOUTHCOM ta expresa cu gratitud e sosten y cooperacion di Banco di Cuminda, Ministerio di Desaroyo Social, Labor y Bienestar, y e supermercado Esperamos cu a haci e acto aki posibel.
