Tur departamento mester keda sin uza 10 a 20 porciento di sumanan aproba caba pa compra di producto y servicio. Esaki ta un di e medidanan cu Minister di Finanzas, Xiomara Maduro a tuma y a informa hefenan di departamento den un carta ayera. Bon Dia Aruba a haya bista den e carta aki.
Segun e Minister na hefenan di departamentonan, Gobierno mester a keda opera riba medionan financiero limita cu mester cubri tanto e operacion di aparato publico como tambe cubri e sosten cu Gobierno ta duna na esnan cu a perde entrada, manera FASE. Pero tambe, Loonsubsidie, sosten na Empresanan Mediano y Chikito, y aporte na e buraco financiero di AZV y SVB.
E medidanan di solidaridad cu a tuma, cu tabata e cortamento den salario y beneficio di empleadonan publico no tabata suficiente pa cubri tur e necesidadnan financiero aki.
Como tal Gobierno a bin cu instruccion nobo.
Asina no ta permiti ningun transferencia sin aprobacion di Minister di Finanzas cu mediacion di Direccion di Finanzas.
Mester baha costonan na un minimo y nan mester keda limita na e gastonan mas esencial pa por mantene e departamento den funcion. Tur excepcion eventual mester sosode cu aprobacion previo di Minister di Finanzas pa medio di Direccion di Finanzas.
No tin suficiente likides den caha di Gobierno pa ehecuta inversionnan cu ya a keda aproba den forma simultaneo. Tampoco por mara Gobierno na ningun obligacion, ni pa medio di sumanan cu ta aproba caba, sin autorisacion stricto di e Minister di Finanzas.
Administracion central di Gobierno pa loke ta e post producto y servicio ta cera awe y por haci peticion pa inversion te cu 30 di october.
