Parlamentario Shailiny Tromp-Lee (MEP): Solucion pa nos piscadonan no por warda mas!

Dia 4 di september 2020, 44 piscado a entrega nan preocupacion na parlamento unda nan a enfatisa cu nan tin un necesidad enorme pa haya claridad pa cu e situacion actual. Pa es motibo a yama un encuentro publico dia 25 di september 2020 hunto cu Minister di Desaroyo Teritorial, Infrastructura y Medio Ambiente, Minister di Husticia, Seguridad y Integracion y Minister di Transporte, Comunicacion y Sector Primario.

Durante e encuentro publico aki parlamentario Tromp-Lee a vocifera cu e ta comparti e preocupacion di e piscadonan, unda nan ta vocifera cu tur e limitacionnan desde 2001 ta haci’e dificil pa nan gana nan pan di cada dia. Tromp-Lee ta haya cu nan merece contesta riba nan preocupacionnan, pero mas ainda nan merece solucion.

Limitacion ta stroba nos piscadonan 

E problematica cu nos piscadonan ta vocifera no ta algo nobo. Piscadonan ta vocifera cu nan ta pro regulacion y ta compronde e importancia di sostenibilidad. Consecuentemente Tromp-Lee ta enfatisa cu sostenibilidad di nos naturalesa ta importante pero sinembargo esaki no por bay a costo di e pan di cada dia di nos piscadonan. Sustainable Development Goals (SDG’s) 1 cu 2 ta papia di por ehempel siguridad di cuminda y ta papia di piscamento como un forma importante pa por pone pan di cada dia pa nos famianan aki na Aruba. SDG 1 ta bisa cu nos tin cu, mas cu ta posibel, combati pobresa y nos tur akiden sa awe cu esey ta algo cu nos ta encontrando diariamente desde cu COVID-19 a presenta aki na Aruba.

Gedoogbeleid 

18 di mei 2020 Tromp-Lee, cu ta presidi e Comision Fiho di Labor y Sector Primario, a reuni cu Union di Piscado unda nan a presenta nan preocupacion y tambe a haci peticion pa pone atencion na esaki. Na e momento ey como presidente di e comision Tromp-Lee a tuma nota cu ministernan concerni tabata tratando e peticion di piscadonan y nan a vocifera cu lo bin cu un gedoogbeleid y cu lo tin un solucion na caminda pa e grupo di piscadonan. Sinembargo, 4 luna despues, ainda nos piscadonan ta sinta cu e mesun problemanan y sin ningun solucion. Tromp-Lee ta enfatisa cu e gedoogbeleid aki mester bin urgente of Gobierno mester presenta un otro posibilidad pa asina brinda nos piscadonan un solucion berdadero.

Parlamentario Tromp-Lee ta termina bisando cu ta sumamente importante pa brinda nos piscadonan e solucion necesario pa nan por sigui eherce nan ofishi. Pa brindanan e siguridad di por subi lama y bay pisca, claro na un manera bon structura y regula, sin cu nan mester keda wak patras ken ta bin controlnan. Pues parlamentario Tromp-Lee ta keda en espera di contestacion y solucion di ministernan concerni den e siguiente encuentro publico cu lo tuma luga diahuebs 1 di october 2020 pa 2or di atardi.