Dialuna ultimo, Parlamento di Aruba a tene un reunion publico cu miembronan di Crisis Team, minister- y parlamentarionan pa duna un splicacion riba loke ta trata e maneho di pandemia di Covid-19 na e momentonan aki.

Despues di varios ronda di pregunta, specialmente di parlamentario Mervin Wyatt Ras di partido AVP, dirigi na minister di Salubridad, Deporte y Turismo Dangui Oduber, el a puntra si e reduccion di e cantidad di caso positivo pa Covid-19 tin di haci cu menos cantidad di test haci y esey ta nifica cu ta haciendo menos test.

Oduber a expresa cu luna pasa den otro reunion publico na parlamento hunto cu crisis team a declara cu tabatin hopi caso activo di Covid-19. Tur dia tabata registra entre 80 pa 100 caso pa dia y na e momento ey, segun Oduber, e parlamentario Wyatt Ras a cuestiona crisis team y gobierno, bisando cu e situacion ta totalmente for di control. Pa cu e pregunta ayera, Oduber a contesta cu esey no ta corecto, pa motibo cu aworaki e casonan a keda stabiel. Nan ta test personanan conforme na e caso defini, ora un persona tin sintoma ta conseh’e pa bay haci test.

“Tur dia nos ta ripiti pa e personanan cu tin sintoma bay haci test, pero tin hende cu ta busca problema na tur solucion” Oduber a bisa.

El a informa cu ya caba tin 17.000 test haci, loke ta representa cu Aruba ta un di e pais UNDA mas test a wordo haci. Ora Covid-19 a yega na luna di maart nan a bisa cu e strategia tabata pa haci mas test, pa identifica e personanan positivo pa no sigui plama. A keda maneha e mesun strategia te dia di awe, pa test di un manera mas agresivo.

“Ningun momento na Aruba nos a nenga pa cualkier persona haci test desde 13 di maart te cu awe,” Oduber a declara

Parlamentario Wyatt Ras tambe a puntra minister Oduber si tin un cantidad considerabel di PCR test disponibel. El a declara cu na e momentonan aki si tin testnan disponibel, door di un cargamento cu a yega dianan pasa cu 3.000 test PCR y esey ta controla pa laboratorio HOH. Na medida cu e cantidad di test ta bahando, nan ta haci un pedido.

Pa loke ta trata ‘herd immunity’, Oduber a splica cu lo yega na maneha e virus aki a traves di un vacuna cu lo crea herd immunity, y cu na ningun momento nan como gobierno lo stimula contagio. Sino cu esey ta un consecuencia ora tin un pandemia, cu ta un proceso natural cu hopi hende lo contrae e malesa. Na e momentonan aki tin hopi estudio andando rond mundo pa mira con largo e inmunidad aki lo dura.

Di mesun manera, a cuestiona Oduber tocante e cantidad di ventilators cu tin na hospital y proteccion pa personal, algo cu Oduber a enfatisa cu tin suficiente material pa e siguiente cuatro luna. Ademas el a splica cu regularmente nan ta revisa e stock pa wak si tin suficiente, cual DVG ta controla. Di loke ta trata ventilator, na e momentonan aki Oduber a señala cu Aruba tin suficiente y banda di esey, gobierno Hulandes a bisa cu lo yuda cu 6 ventilator mas.

Oduber tambe a comenta cu na e momentonan aki tin 83 persona den cuido cu a haya Covid-19, di e cantidad aki 50 di nan ta den hospital.

Tocante leak di e lista di pashentnan cu Covid-19 cu a keda conoci algun simannan pasa, Oduber a informa cu den esaki tin un investigacion interno. Ademas a entrega un keho na Ministerio Publico (OM). Di e investigacion, el a menciona cu ya a completa esaki, a traha un rapport, y a manda esaki na departamento di Recurso Humano. Nan ta pendiente di e conseho di e departamento aki pa mira ki tipo di accion lo mester tuma.

E otro investigacion basa riba e keho di OM, el a sigura cu no por comparti e informacion ey pa motibo cu nan mes no tin informacion di e investigacion cu ta andando.

Di otro banda, parlamentario Ricardo Croes a probecha e ocasion pa puntra minister Oduber tocante e consecuencianan cu Parkietenbos por tin pa salud. El a sigura cu na aña 2018 ya caba DVG den cooperacion cu Organisacion Panamericano di Salud (PAHO) a traha un rapport, y un di e conclusionnan di esaki tabata cu e dump aki mester a wordo cera na e momento ey. Pero te ainda den aña 2020 esey no tuma luga, pa motibo cu esey ta un responsabilidad di Ministerio di Infrastructura y Medio Ambiente pa busca un solucion pa e dump aki.

“Nos ta espera cu pronto lo bin un solucion permanente pa e problematica aki” Oduber a finalisa.