Si 400 miyon florin no ta bini for di Hulanda; Gobierno lo cubri necesidad financiero for di mercado local of internacional

Minister Xiomara Maduro a duna un bista relaciona cu e yudansa cu gobierno a duna pa FASE den forma di MKB. E ta un yudansa di 4 mil florin pa kwartaal pa e negoshinan chikito y mediano cu menos cu 50 trahado. E gasto aki ta wordo cubri cu presupuesto di pais Aruba.

Pa loke ta e subsidio di salario esaki si ta wordo cubri cu e yudansa cu pais Aruba a haya di Hulanda, conforme decision di conseho di minister di Reino di dia 14 di mei ultimo. E yudansa aki a wordo ricibi for di april te juni, pero esun di juli a wordo condiciona ‘grandemente’ y riba e condicion aki ainda tin un dialogo cu ta sigui entre Aruba y Hulanda.

E mandatario a bisa cu gobierno a purba pa haya e forma pa paga subsidio di salario, y nan intencion ta pa sigui hacie a pesar di nan necesidad financiero. Encuanto e suma di 400 miyon pa atende e necesidad financiero proximo te cu fin di aña no mester wordo fia for di mercado local, el a bisa. Minister di Finanzas a bisa cu ya sea e ta wordo cubri for di mercado local of internacional, e ta keda un necesidad financiero.

Pa sigui atende cu e compromiso di subsidio di salario ta depende di e likides di pais Aruba y tambe di e fiansa cu nos por haya. “Kiermen si e placa no bini di Hulanda. E placa lo tin cu bini di otro caminda denter di Reino.” Of tambe for di mercado internacional.

E decreto encuanto emision di bono ta indica cu gobierno tin un necesidad financiero te december di 400 miyon florin. Un parti nan ta busk’e como un plan di emergencia riba e mercado local pa medio di e bononan emiti, pero tin mas manera, segun e mandatario a indica ariba.

Fondo inversion

Encuanto inversionnan pa restart nos economia, gobierno lo busca e fiansa aki riba mercado local “te caminda cu ta permisibel.” Pero inversion ta depende di nos situacion di likides.

Adelantando na cierto reaccion di diferente sector di comunidad cu gobierno mester a firma e acuerdo cu Hulanda caba pa tin acceso na e fondo aki, sin mester fia placa of bin cu bononan. Riba e punto aki e mandatario a bisa cu Hulanda no a indica “niun momento cu nan lo yuda cu fondonan pa cu inversion.” Pues den e yudansa di Hulanda pa atende falta di likides, no tabatin y no tin te ainda fondo pa yuda cu locual ta inversion, minister Maduro a bisa.

Tocante e canalisacion di fondo pa inversion pa medio di entidad (CHE), e mandatario a trece dilanti cu nan por compronde for di Secretario di Estado di Hulanda , Raymond Knops cu lo bay tin 500 Euro disponibel pa haci inversion den tur e islanan. Pero den niun caminda di e documentacion tin specificacion e suma aki destina pa inversion. Tampoco den e presupuesto cu Hulanda a presenta pa 2021, no ta poni cu nan ta bay yuda cu e inversion aki.