Mericanonan ta mustrando un fuerte disposicion pa biaha; ATA ta mira cu temporada halto na caminda tin oportunidad pa crecemento

Aruba Tourism Authority (ATA) a reacciona riba ultimo medida di Merca pa loke ta trata e biaheronan di New York. Ta asina cu den nan regreso nan mester bay den cuarentena obligatorio.

Te ainda no ta mucho cla con nan lo cumpli cu esaki. Of si nan lo permiti un opcion similar na esun cu nan a bin cune pa e estado di Massachusetts, caminda unabes cu e biahero ta presenta un test di PCR negativo lo permiti e regreso na su estado di origen.

Nan ta mira cu na medida cu New York lo sigui habriendo nan actividad comercial, y cuminsa flexibilisa nan restriccion pa avansa den su strategia di apertura, ta posibel cu nan ta desea di evita cu esunnan cu a biaha eventualmente lo por expande e virus.

E medida aki ta trata basicamente di e islanan Caribeño grandi. Sinembargo den nan excepcion nan no ta inclui Aruba. Ya caba tabata existi un medida similar pa estadonan specifico denter di Merca su teritorio pa vuelonan nacional. Pa evalua e impacto di e medida aki, Triple A (aeropuerto) ta den comunicacion cu e companianan aereo pa verifica si nan lo bini cu cambionan den nan reserva di vuelo of cancelacion.

Encuanto e comentarionan di e partnernan aereo, nan no ta mira basicamente nada nobo. Mayoria di e companianan aereo tabata na haltura di e ahuste di e politica aki pa New York. Ya cu e medidanan aki ta similar na e restriccion di biahe nacional cu a wordo implementa algun lunanan pasa, por ehempel na Florida. Sinembargo e demanda di vuelo pa Florida ta sigui fuerte a pesar di e rekisitonan di cuarentena. Nan ta mira cu den general e Mericanonan ta mustrando un fuerte disposicion pa biaha, a pesar di e reglanan di cuarentena pa Merca.

A.T.A. hunto cu Triple A ta sigui den contacto cu aerolinea nan. En todo caso feedback ricibi ta ilustra si cu mester sigui pusha. ATA ta mira cu e temporada halto na caminda tin oportunidad, y ta den e temporada aki bo por saca mas y esaki mester ta e meta!

ATA lo eleva nan agresividad di promocion, principalmente na New York y cu aerolinea nan y tour operadornan. Esaki tabata parti di e planning caba y lo sigui ta asina. Principalmente despues di e feedback inicial ricibi di algun di nos aerolinea nan despues di anuncio di Gobernador Andrew Cuomo.

Encuanto si e anuncio di Gobernador Cuomo lo cambia e escenario di nos turismo. E tendencia cu ta mustra tambe pa temporada halto ta di crecemento modera, claro esaki por ta diferente pa algun. ATA ta haya cu mester acelera e crecemento modera aki, y pa esaki ta evaluando diferente pasonan adicional.