Intervencion enfoca riba ofrece sosten, elimina obstruccion unda ta posibel, y tene presion riba gobierno di St. Maarten y Banco Mundial ta keda e maneho di gobierno Hulandes den e proceso di reconstruccion di e isla despues cu horcan Irma a causa destruccion mas cu tres aña pasa.
Den un carta cu Secretario di Estado Hulandes pa Asuntonan Interno y Relacionnan di Reino, Raymond Knops a manda pa Tweede Kamer diabierna ultimo, hunto cu e reporte financiero semi-anual 2020 pa St. Maarten, Knops a duna un update riba e proceso di reconstruccion.
A pesar di e influencia adverso di eventonan externo den prome mita di 2020, manera cambio di gobierno local na maart despues di eleccion na januari, y e pandemia di Covid-19 cu a yega na maart, a logra progreso den e reconstruccion.
Den total, tin ocho proyecto den ehecucion cu un balor financiero total di 230.6 miyon euro. E finanzas total deposita ta 262 miyon euro. Mientras e pago tabata un tiki slow incialmente, tin claramente un ascenso desde maart.
Basa riba ocho proyecto den ehecucion, mi ta spera di transferi e tercer tranche di 90 miyon euro ainda pa e aña aki, y un di cuatro tranche na 2021”, Knops a declara. Despues di horcan Irma, gobierno Hulandes a aloca 470 miyon euro pa reconstruccion di St. Maarten via un Trust Fund maneha pa Banco Mundial.
E ocho proyecto actualmente den ehecucion ta abarca reparacion di cas-, scol- y shelternan; e reconstruccion di aeropuerto; dos proyecto di maneho di desperdicio; programa di training y sosten financiero; reconstruccion di hospital; proyecto di sosten di empresa; y recursonan pa resiliencia comunitario.
Sin embargo, e pandemia a reduci velocidad di varios proyecto pasobra personal internacional y expertonan contrata no por a biaha na e isla pa algun tempo, y algun ainda ta unicamente disponibel na distancia. Knops a bisa cu e tabata comparti e preocupacion di parlamento Hulandes cu e reconstruccion ta bayendo mas slow cu lo desea.
“Ta den interes di poblacion di St. Maarten pa completa e proyectonan dentro di un periodo acepta. Y maske St. Maarten y Banco Mundial ta responsabel pa ehecucion di e proyectonan, e monitoreo di e progreso y intervencion, unda ta posibel, tin mi atencion continuo”, Knops a declara.
Segun Knops, en general, St. Maarten tin debilidadnan inherente na islanan chikito, manera un mercado limita, dependencia riba importancion, un forsa laboral profesional restringi, y un gobierno cu falta experticio necesario. “Den practica, esaki ta nifica cu hopi biaha companianan local no ta sufiencientemente ekipa pa bin den consideracion pa proyectonan grandi di infrastructura. Apart di esey, hopi biaha tin proceduranan largo pa permiso di trabao y residencia. Proceduranan di Banco Mundial ta experiencia como compleho y costoso den tempo.”
Gobierno di St. Maarten tambe tin un rol perhudicial, segun Knops. “Mi ta conclui cu e falta di decision y hasta oposicion di banda di St. Maarten ta conduciendo na retraso den realisacion di cantidad di proyecto. Reconstruccion di aeropuerto ta un ehempel.”
Intervencion di Hulanda ta enfoca riba sostene St. Maarten via asistencia tecnico, elimina obstruccionnan y tene presion riba St. Maarten y Banco Mundial pa tuma decision, enfoca riba proyectonan di prioridad, creatividad y pragmatismo.
Un intervencion ta relaciona cu plan pa establece un oficina local di Banco Mundial na St. Maarten. Segun Knops, un oficina asina lo reforsa cooperacion entre Banco Mundial y St. Maarten. E acuerdo pa establece e oficina local ta rekeri adaptacion di legislacion di impuesto di e isla. E dobel impuesto cu companianan stranhero y consultant involucra den ehecuta proyectonan di Trust Fund ta enfrenta por keda resolve cu legislacion adapta. Banco Mundial ta cla pa set up su oficina unabes cu tin acuerdo na luga.
Knops a declara cu desafortunadamente, e ehecucion y implementacion di proyectonan ainda ta bayendo mas slow di loke el a spera.
